*||        KAP TAHIH IN        ||*
_(10/02/2019)_

_*L⭕VE    ST⭕RY*_

_By_
_*TangpaMinneo*_

Sun nilhum a na kitong chu kagim val’in matah imutding tia anneh jou a lupna kajot paile hiche nilhah khel² chun ei hin text atam dehset in, keijong ning kihel pumin Facebook a status ki update ho kavet lele laitah hin nungah khat lhase tah a thu hin post khat kahin kamudoh e. Athu hinjih chu kasim suh² in ahile koima hetphah louhel in athusei ho chun ka lung atongkha lheh jeng in, a profile ka check pai tan ahile tuibong lang a Bethel veng a um, amin chu Shishi kiti khat ana hi e. Amel chu kavet le kamukhah abang lheh jeng in, ka vet suh be le a dongmapa toh ana ki post na lim ho kamudoh kit in, ka lungthim a chun, _“Hibang a kilom lhon a ipi dia kimoh khen thei lhon hamo?”_ katin kana lungdon pi lheh e. Pasal pa in akhen dan chu hintin, alha set dan vang chu midang kikhen a ki lhaset toh abang pon, thulah lou keichun kana pohnat pilheh jeng in ahi. Chubang a imutsoh pa chu hiche thu kahinmu chu ka lipset jeng in, _“Ipidia hibang a ki lungset jiuva kikhen thei u ahidem? Oleh, kikhen hi ki lungset hinkho mangho chena lhongpi ham?”_ tin lungset ipi ham ti hephalou kei lungthim chu ana dongkheh tai. Kana kigel laitah in ka loipa Mamang inin phone eihin bol in, _“Min, hungloi o. Lampi a nungah khat gari katolna a ka sukha e. Hospital a pohlut ngaiding ahie. Tu mama in o. Khomoi hindel o”_ ahinti chun kaloipa nopmo sahding deilou jeh in, ka half pant pum chun ka garineo kaki start in kengkoh khao khitman lou hel in ka umna SEMOL a kon’in KHOMOI kahin delsuh tai.

Khomoi leibul kaphah hin lampi pang a mi ana dimset in kenjong gari ka kham in kavet le kaloipa ana um in, gangchel in car sunga ka hengdoh un district hospital kahin del taove. Nungah nu chu amai thi adimjeng in, kho helou in athi abang tan, haina hu neilou in aumtai. Gari tol kahijeh chun kino thim tah in katol in, Mihem khat hinna ding mun del akihi jeh chun breaker umna lamjong helou khop in dunglen vailen kahin lhahpi tai. Kaga lhun u chun emergency ward a ka tollut lai uvin, doctor ho’n ahin buipi lele tauvin ahile minute 10 jouvel hin ahung haidoh tan, hichun lunggel ahung nopdom tai.

Houpi thei ahi nailou jeh chun koi ahi akihethei naipon, amin le aumna hetthei na ding I-card ho la khatcha akipoh khah lou jeh chun ima akihethei poi. Jan nidan 11 lang alhing tan, hichun themkhat houpi thei ahung hitan, keichu loule ai chole a ka lhai lele jeh chun ka um manpon, ka loipa in ahoupi in ahile amin ahinsei doh thei in hichun gangchel in a inko te a hetsah uvin, amaho jong ahung lhung pai tauve.

Damdoi chohna a pat plastic dimset a damsoi kahin khai a ward sung lutding katile mi ana dimset kitta’n, ana eulha jeng uvin, kaloipa abolchah diu kahisah in lunggim nan kadim tai. Kadin lele chu doctor pan ahin mudoh in _“Hungloi tango. Nang naki ngah hichume”_ tia eihin sen jeng phatchun ka lhailut jel in ka thilchoi chu kapetai. Inmai lang a ei soldoh tauvin ahile a inko te toh kahung kihou tauve. Chubang a ka dipchah laitah in, Mamang le kei kom’a chun kipa thu achuti seijeng tauvin keini chu lungdang tah in kakiveto lhon e. Anu in, _“Nao teni,tuni na naonu lhon nahin mudoh lhon hi kakipah val uve Boi. Damsot lhonin lang, thilpha nabol lhon hi keihon lesah jou hih u jongleng Pathen in atamjo in nahin ledit peh lhon teihen”_ atin lhilong pum in asei tan, kenjong kiphatlam tah in kaloipa suhkhah ahidan kasei le, Anu in, _“Ki phatlam lhon hihbeh in. Nilhah anne ding a kakou le a room kikhailih kigo ding kisa a ana um ahi. Ka lungna val a kapho le hung jamdoh a hichea pat ka holmo ahi. Athi mel kamu sang a hitia ka chanu haina hu neipum a nei nungmu sah lhon hi kakipah val e Boi.”_ atitan, hichun ka lungkham na lhon ahung oldom e. Kaki houlim² uvin ahile doctor ho’n nungah nu kisuh khah na a thisan aha lonval jeh a thisan khaipeh ding thu ahinsei tauvin, Anu kavet le la alungkham mel kamu phat chun kave joupon, a pethei ding dinmun a umding koima aumlou jeh chun kei kahung kipedoh kittai.

Room kaga lut kon’in Pathen kom’a taona kanei tan, _“Paa. Tunia hi hiche ka hinkho a ding a thisan kapeh masat pending hi genthei te chunga alhun ding jeh in namin ka thangvah e. Adamlou nu damna hitei ding in na anga kahin lhan e”_ katin ka luttai. Thisan ahin lhohlha tauvin a dammo nu khaipeh din achoidoh tauve. Keijong ka tha abei thimjeh chun hilai a chun kaki cholden tai.

Kho helou in kana imulha tan, jingkho ahungvah hin hospital sung a kana um chu gangchel a kagel le kalung ahung dong man in, hinlah thu umdan ho kahe pai in kaga potdoh le ka loipa le nungah nu anu chu hiche nungah nu koma chun ana toulhon in ana lulhu det² lhone. Doctor round ahung tan, Anu suhkhah ding chula nom kasa kitpon, lekha a ajih chohding ho jouse chu achoding in kache kittai. Hichan jong chun hiche nungah nu mel chu kamu naipoi. Kahung kile lang in ana khangdoh lhontan anu chu akiphatlam kei in hinlah ka lhamon in Mamang jong tot bolthem ahijeh chun totna kaseikhom uvin ka nuikhom kit tauve. Jingkah buneh phat ahung lhing kitta’n, Anu le Mamang chu hotel a bune ding in kasol in kei ka umden tai. Ka umthim mo kei in, lou lekha ho chu kaven ahile amin Shishi, Bethel village tia kijih kamu chun ka lungmit ahung hah doh in, _“Janlhah a facebook a kamu nuchu ahidem?”_ tin kei le kei kaki dong tai. Hichun _“Ka dang achah val’e. Tui neipe uvo”_ tia onem heuva hung kisei chu kaja in kakihei le ka buipi nu chu anahi phat in gangchel in akom a bottle kalan akam a donsah ding katia amai kavet chun, Oh!!! Facebook a kana mu Shishi chu ana hitan ahile kaking dot jeng’in ka veden tan ahile bottle chu ahin tham in, hichun kenjong olchan kadonsah tai. Amel chu atah in ahoijo in pasal mitvet dingchun melhoi na tah khat anei in, vet nom² aum e. Gah houpi ding chula mi adamlou ahijeh chun aham ngapchat louding kahe kit in ka houpi ngam kitpoi. Chomkhat chu kihoulou beh in kaum lhon in, chomkhat jouin Mamang teni jong ahung lhung lhon tai. Keijong anne dingin ka chephei in hinlah hotel sung a chun ipi kaneh ham? tijong helou in koima eisol na loubeh khat chun, hiche numei nu hinkho kahin hetnom na’n kadim tai.

Hospital kale lhun hin Mamang le Shishi nu chu pamlang a ana um lhonin, kenjong ima seilou in window a kon chun Shishi chu kave tan ahile guhthim in ana lhisoh tai. Galut jengdi chula nom kasa kitpon, hinlah a hinkho thusim chu thudu keiman kahetnom lheh jeng’e. Sun nilhum in ka lung amoh bui² tan, kakitim joulou phat in Anu kamoh doh tai. _“Henu, nagelthei dileh na chanu hinkho thusim nei seipeh o. Ipijeh a hitia hi umham?”_ tia kadoh jengle hiti him ahinsei e. _“Amin Shishi ahi. Adang sei thupi ding aumpoi. A kilungset pi pa in ahin khen jeh a hitia hi umkha ahi. Ipi kilungset ham? kahe hih e. Ipidia tulai nungah gollhang aki lungset hohin nahin lungset lou u khatjeh a hinkho kisan na it jilou u ham? Najiding hilou khat hibang a na lungset ule na jiding nu/pa chu itobang in na lungset tadiuvem? Nangho bon hichan a naki lungset u leh na hingnu le na hingpa in ichan a nahin lungset uva na hinkho u a itding hitam?”_ atin alhisoh tai. Kenjong kadohbe in, _“Henu, ipijeh a pasal pa chun akhen jengham?”_ kati leh, _“Anule pa te’n a phatsah lou ahi. Tulai a neilou ngalou te ding in leiset a mun a ong tapoi. Ichena lang² a mi muset kichang ahitai. Chihnan hinnei uvin”_ tin ei donbut in ahile kenjong thu umdan ho kahin hethem tan, hichun kenjong Shishi hinkho kikhelsah ding lungthim kahinnei tai.

Hospital a kaum sung u chun inlang kapha kha tapon, thu jong phone a ka nute kaseipeh tho ji in, chuna ban a kisil khalou akihi tahjeh chun inam jong akisuh tapoi. Perfume a kidoi ding ahi tahlou jeh in kaloipa kisil ding in in a kasol in ama ahung lhun in kei kache kit in hitichun kaki lhah lele tauve. Mamang in asuhkhah ahijeh chun sum lutding ho jong Mamang in, _“Keiman podoh nang’e”_ atin, hinlah Shishi nu ada in, hijongleh Mamang in ama account a kon in sum a draw ji in sum lut ho chu ahin pedoh thu² tai. Shishi nu in, _“Keiho insung mitmo jeh in nangni na genthei lhon valta e na? Min. Nei ngaidam uvo.”_ tin ki phatlam tah in aham in ahile Mamang in, _“Henu, imajouse kei mitmo jeh ahie. Keijoh nei ngaidam uvo. Min, nang in jong nei ha buipi val tae. Nachung lhon a kakipah e”_ ahin tikit in ahile ka vesal in, _“Hung kikam thep sah hih o. A tah² to nahung kilou e”_ katile kabon uvin kahung nuidoh kit uvin, chomkhat kah² chu lungdon suhlhap nan ka nuikhom jiuve. Mamang le Shishi nu chu Shishi dam le damlou buipi in aum lhonin, keivang Shishi genthei kile na ding joh kahol pantai. Amani ana lut masa lhon tan, keivang pamlang a kading in kaki ngaito den tan ahi. Window a konin guhthim in a umchan ho kave jingkei tan, hitia kavet jing laitah chun amel hoina ka mudoh cheh² in ahile kalunga deina khat ahin neidoh tan ahi.

Ka umkhom pet ule ima tilou dan in aum ji in, hinlah ka dalhah teng ule vang guhthim in alhi ana long jingkei e. A umchan chu ka lum vetjou tapo’n, moh lung in ka lungset doh tai. Pasal khat hina in vang, numei idei tho laise in nom akisa na in, ihin lungset doh tah² le vang genthei kipan ahitai. Nikhat jong window a kon’a kavet laitah hin aki hei lele in, akom a bottle kitung alah kigot le drip akikhai jeh a alah phahlou chu alah kigot kamu in ka deljel in ka petai. Aman acham a donthei loujeh chun hitichun achoiden in kenjong ka hethem pai in ka donsah tai. Hiche nikho a kaki thopi na chu ka lung akipah lheh e. _“Min, kakipah e”_ ahinti chu ka kingdot in, _“aare. Shi. Hoia kona kamin nahet ha?”_  katile _“Keimin nang in hia nahet na leh?”_ ahinti kit phatchun kakimoh nuisat lhon in hiche nikhoa a kipa mel kamu chu, kiseival jeple vantil mu kabang jeng’e.

Hiche nia kipat chun kahung kihoudoh lhon tan, ahile ka lung kipa nan adim in, hinlah akah lah tengle guhthim a ana lhiso jichu kamu ji phatle vang kenjong aguh in kalhi kana kitheh jin ahi. Nikhat akapet kaga tohkha in, _“Shi. Ipi buina nanei ham? Ipi na lungnopmo piham o?”_ tia kadoh le akun suh in, _“Min, ka hinkho hi ahing dinga jong kakidei talou ahi. Hinlah, athi ding a Pathen in eiphal nailou hinte. Janlhah a chu keile kei kithat ding a kigel a leia kon’a kichom lha dinga kaki got le kaki lho khel a kanung lhuh ahin, hiva chu naloipa in ei suhkhah dan a um kha ahibou e. Kei jeh in nangni na genthei val lhon ta e. Nei ngaidam lhon o na?”_ ahiti in, kenjong kadohbe in, _“Na hinkho thusim chu kenjong kahet nom nah e”_ kati le a dongmapa toh akingai lai thuho abon in amit a mitlhi pum chun ahinsei tan, kum 2 val kingai lhon ta a hinlah nulepa deisah achan lhon loujeh a khenna ato lhon chu ahinsei tan ahile ka lungset na akibe cheh² tan ahi. Hibang a numei khat in pasal khat a lhahlel vangchu kagel le ka datmah lheh e. Athu asei chai chun ahung kinuh dohtan ahile kenjong kalhem in, _“Shi,. *KAP TAHIH IN* Pathen in nangdia agonlou joh in gel in lang na malam dingjoh ngaito o”_ katipeh in, ka lhem tan ahile amanjong, _“Henge. Hitia kilhep tailou chu lampi dang umlou ma ahitai”_ ati in, chomkhat jouin Anu le Mamang ahung lut lhon in nehthei ahin choh lhon chu kaneuvin totna kasem khom kit tauve. Hospital a kaum sung u chun akom lah a damlou um honjong nom asa lheh uvin, keiho totna sem chun kanui khom jiuvin, ka hetkhah lou mi tampi toh kahung kiheto e. Hapta khat lhingset ka um uvin, ka hung potdoh kon uvin kakomu va umho chun ei lhalel kei uvin, _“Um nalai tangu vo. Min. Nangho pot leu chun lunghel umval di ta hila”_ atiuvin, hijongleh doctor ho thupeh ahijeh chun ki lhalel tah in kahung kikhen tauve.

Shishi te in kaga lhung tauvin ahile a in u chu akitup chet jeng in, inbang a lim kitah ho chu kavet le tan ahile sepai limkhat kamu in, kenjong Shishi kadong pai tan ahile, _“Min, kapa ahie. Kum 4 chesa a chu ana umlou ahitai.”_ ahinti chun alim kitah chu hoisel a ka thah vet le athini kijih chu kamudoh in, kana doh khah chu kaki phalam lheh e. Hichun vailhun maicham kasem un, Pathen koma kipa thusei le kei le Mamang chunga kipathu phon na pum in taona kamang uvin, Shishi damna ding toh gom in ka tao uve.  A insung u hahsat dingdan chu kagel le keijeng in jong hahsa kasa in, kiseibe leh, Shishi Jong insung a chanu changkhat a aneiu ahijeh chun Anu in homtho tah in abol in, alungset lheh e. Hichea kon chun Shishi phone number kahin kipah doh tan, Mamang in jong akilah in nilhah khat a din kahung kikhen tauve. In kaga lhun chu jong kikaplha kabang jeng in, kalal danchu nungah jong kagel ngapchat tahih e. Bujong nelou hel in ka imu in ajing in sun pung 12 lang in kahung khangdoh bep e. Kanu in la kalal ahetjeh chun ei thou nom pon, keichula athi kana bah dan ahi. Katho a pung kavet le kamoh nui in, jingkal bu le sunbu sahkah mo in kahin netai. Chujou in ka phone kavet le Shishi akon miss call kamu in, WhatsApp kavet le _“Min. Ipidia kan call le na lahlou hamo? Shishi kahie.”_ ahinti chu kamupai in kenjong ka reply in, _“Ka ha imutval intin ima kana jahlou ahe Sorry”_ tin kathot in ahile ahin view pai in, aki phatlam na thuho asei in hinlah ken ka lhamon in thu chom² kasei lhon le nilhah anneh phat ana hikit tai.

Niseh in kaki houmat jing lhon tan ahile ki ngamsung na khat chu aum tan, a dongmapa toh akingai lai lhon thusim ho kadong ji in, thudang² ho jong kasei jilhon in totna kasei peh jile amajong ahung kipah thei pantan ahile keijong ka hinkho anom chom lheh e. Loile gol a kihe mai² dan in kaum lhon in, lungset na thu seiding chu ipi a kagel hitam? Ei kithat ding ka bahsah jeng’e. Ama loiho kaki hetpi ho toh jong ama thu kasei jiuvin, mipha ahidan le akitah na ho eisei peh uvin, _“Kihel o. Kisih pon nate”_ eiti jiuvin hinlah lungset thu gasei pat dingchu kagel le ama lungnopmo laitah ahijeh chun ima kasei ngam pon, eihin muda bepding kati aja in ka lunga kagel ho khatcha kasei doh theipo’n, aloiho kom joh a chun Shishi ka lungset dan ho kaha seijoh in ahile aloiho joh chun aha hetjoh dan in aum doh in, ka jachat le kaki sonlel danho kasei jile, _“O homo. Na hinkho in nungah kimu pon nate. Um theimbeh jengta’n”_ tin eihin dai jiuve. Hinlah ken ka lunggel a chun, _“Akipa na thei ding bol a, eihin lungset doh tengle seiding”_ tia ana kigel lha kahitai.

Nilhah khat Mamang in phone eihin bol in, _“Min, hungo tuni Shishi te in a gache te. Pha² hinam gave hite”_ tin eihin tem in, keijong ka lung lamtah ahijeh chun kakigong gangchel in SEMOL a pat Bethel veng kajonsuh lhon tai. Kaga lhun lhon le Anu toh bu ana neh lhon laitah ahijeh chun lutpai ding nom kasa lhon pon, inmai a chomkhat kading lhon in chomkhat jouin kaga lut lhon tai. Keini eimu lhon chun Shishi chu akipah lheh jeng in, gangchel in cha ahin om in, chomkhat kihoulim toh gom in cha kadon un kaki tot lele uvin ahile nilhah nidan 7 ana val tahjeh chun umnom lheh jong leng vaigei ahi tahjeh chun kile ding kati lhontan ahile Shishi in lampi Chan eihung thah lhon in kahung kikhen tauve. Jan in Shishi ka chuti gel² jeng tan, ka lungset na vang ana sang man lheh dan ahitai. Whatsapp a status ho kavet le ki lhaset na ngen ahin post ji in, ka lungthim a chun ama donbut na tobang in, _“Idia lungneo ji nahi ham? Na lungset kei kaum e. *KAP TAHIH IN*“_ kati ji in, hinlah atahbeh a seiding chula kaki pum ngapchat kit jipoi. Ama ding gelna a ama hetphah lou hel a genthei chu kahi mai e. Phat che dungjui in kihou dan jong ahung kikhel jep² tan, kenjong, _“Themkhat beh kisei hen”_ kati jin, tot toh gom in ka khohsah dan thuho kasei ji in ahile aman jong kipah tah in eihin donbut jin, ka lunga kinep na lentah eipeh dan in kahe e. Hiche phat laitah hi exam jou holiday kinei laitah khu ahi in, result ahung out a lekha aban simding hung kisei a thu kija ho vangchu keiding in lunghel ei kipe be in, Shishi kangaina ahung sang cheh² tan, phat chutih chan sei dohlou a ka um chu kakisih lheh e.

Ama kigel lhah na bangchun nursing jilding in Imphal lang a vaikon doh ding in aum tan, achedoh ding nilhah hin a in uva eikou in, ima choilou a cheding nom kasah loujeh chun diary khat ka chohpeh in packing anal na theipen in kabol in kachetai. Lamlhung kei in lunghel nan kadim in, hinlah hiche nikho changei  jong chun ka lungset na kana seidoh ngam deh naipon, ka lungset na thu hojong ka loipa ngaitah Mamang jeng jong kana seipeh poi. Hijeh chun aseidoh ding dan hhasa kasa lheh e. Ajeh chu ei kithopi ding kanei lou ahimai e. A inmai u kalhun le kamoh lunghel in, jing nikho a kon a kamu kit tahlou dingchu kagel le lhaset na leh lung kisih nan kadim lha jeng’e. Insung kaga lut le avon ana kigot laitah ahi in, kenjong kaki thopi in kagon chai lhon chun kenjong kathil choi chu kape tan ahile aman jong kipah tah in eisan peh e. _“Min, cha beh don ta na?”_ atin, cha ahin om in, kadon khom lhon in, hiche nikhoa ama cha om kadon chu kakipana aseije abei hel jeng’e. Alangkhat a lunghel nan kadim kittan ahi. Lungguh a kagel jing lungset thimthu ho seijeng ding la seiding kati tengle pasal kahina a lunglet kabol thei him² poi. Ka hamdoh kigot jongle kangai val jeh chun ka mitlhi joh along masa kigo jin, amai vet a thu chom² sei chu ahijenge. _“Shi. Lekha pontho tah in hinsim ta na? Nang potdoh le chun ka lunghel di danhi. Na hungdoh ding ni kana ngajing ding ahie”_ katin ahile ahung nui in, _“Keijong ka lunghel dan. Ngai naum val uve”_ ahinti chu ka lungsung chu kipa le lunghel aki halchop lha jengtai. Ki lhalel tah in kahung kikhen lhon tan ahi. Hiche ni jan chu kho jong vahda jengle kati nalom² e. Nilhah in a whatsapp status a diary kapeh lim ahin tahdoh in, _“Min. Kipa umval e. Nungah hoitah hin kimuo.”_ atin, keichu guhthim in ka lung ana thim in, _“Kenvang nangbou kadei e”_ kati in, Shishi ka Lungset na vang, atamjo ka lungthim toh kakihou jing tan, kam in aseidoh joulou thucheng hijat chu ka lungsung a ka I’m mang den jitai. Jan jong ka imu thei tapoi. Khovah kei in lunghel nan kadim in, Kanu ngaina in jong hitichun ka lunghel khapoi tileng kajou louding ahi.  Jing nikho Sunday nia chesoh ding ahitah jeh chun keijong ajing nikho in matah in devotion a kajao in alhung kei in Shishi ding in Pathen kom’a ka tao tai.

Amajong akalsong doh tan, aga lhun chun phone eihin bol in, _“Min. Ka lhung ta e. Ka umna dinghi a strict dan. SUNDAY boule phone ei choisah ji diu dan ahitai. Kan call jidi chuo. Ka lung ahel val e. Mangpha o na? Ka submit ditai “_ atin kei ei hamsah manpon, a cut pai tai. Ka lunghel valjeng tan, Shishi ngaina in ahpul in aphah ahcha ngui chetchut kabnag jengtai. Kon la ei hetphah peh lou. Kenjong niseh in eihin call ka ngah jing tan, hinlah kakinep na abang ji poi. A umna uva landline a kon in khatvei eihin call in, _“Min”_ tia eihin kou chun ama ahi kahepai in, bazar kaum pet ahivang chun kakipah val in, kipana mitlhi ana long lha e. Chomkhat kakihou lhon in, a gilkel ji thuho ahinsei chun ka dip adap in, _“Na nu ahunghat le nehthei kan pohsah ding ahie”_ katile akipah val in, kenjong hiche nikhoa a kon chun sum kakhol in Shishi nehthei ding cartoon dimset in ka heng in, apeh dingdan ka gelmo jel kittai. Akah le letter jihtha ding kati jin, hinlah kaki phatlam kitji in, ajole loicha hina builo khabep intin, hinkho a ki jachat sang in, katin kajih kit tapoi. Ajing in Anu phai a acheding jeh chun nehthei kathot tai.

Ahungdoh ding ngah in phatle nikho Kasim jing in, itih tah le ka lungset na thuhi kasei peh dem tin keile kei ka chuti ki hou² jeng tai. Khohsah tah a landline a eihin call jichu keiding in kipana lentah khat ana hiji in, kaki housung lhon jongle phat ka homtho jilhon val in a hamding kaki chutho leu jeng ji lhon’e. Ka umchan lhon chula aki lungset ho kabang jeng lhon in hinlah ken ima kaseidoh loujeh chun imacha ana hithei poi. Khatvei ka natoh pet hin ka phone ka charge pet hin eihin call in, hinlah ka phone ka pohlou jeh chun kana japha tapoi. Natoh kangah a ka phone kavet chun miss call ana umtan ahile Shishi ahichu kahet phat in ka phone kana kipoh dohlou chu kakisih val jeng’e. Ipi kisei dingham? Aman la phat ong aneisun a eihin call chula hintin, gelleh aki letsah eihisah dingchu kanom pon, keile kei ka chuti ki samset² kittan ahi. Ajing jingkah hin eihin call tan, ka pick le ahung phun pan te, janlhah a ka pick louchu ahinsei in kabuidan ho kasei le ei hethem in thudang² ahinsei in achaina lang in, _“Min, Friday nile kahungdoh dihe?”_ ahinti chu ka jaman hihbeh e. Leiset a melhoi pennu kamuding chula ahikittan, ohe! Ka ngahlelta nalom² e o. Calendar kavet le Tuesday ahi nalai in, wall clock chu kiheh gang henlang, Friday kilhunsah doh le kati val jeng’e. Jan imumo jen in ahungdoh nile ka thusei dingdan ho kakigel in, insung a kachang in thusei dingdan kakijil vangchu ahah thou e. Houin sunga speaker ding kabang jeng’e.

Ka ngalal pen Friday ahung lhung tai. Jingkal langhin Ahung lhung in, chubang a ka imut noplaitah chun ei hin call in, _“Min, ka hung lhung tae. Hungsuh o”_ eihin tichun keijong bu neman louhel in, brush kakibol man ham² in kaki kapsuh jel jeng tai. Kaga lhun le inmai a ana um in, kamuchu ipi kisei dingham? Leiset Mihem mit in ima hiponte. Hinlah keima mitvet in vang, hitobang a melhoi hi um taponte tin ka lungset na chun ka lung a ahin sejdoh jeng theije. Kaga lutle touna eihin pe in chomkhat kakihou lim2 lhon in, chujou in bazar a vading ati tan, achang a soldoh ding nom kasah loujeh chun bazar chan kaga  thah in, lampi kanding ahiphat le akhut katuh jin ka hithei na chan in ka veng jing in ahi. Huimut dia jong kaphallou kiti jichu ahi jeng’e. _“Hungo. Hotel khat a nehthei neute”_ katileh, _“Kaki kino thim chuo. Nidang leh o”_ atiphat chun kenjong khoh kasa dehpon kahung phei hung kit tauve.  Munkhat lai a hin ahung dingden tan, message eihin thot in, _“Min, nang ana che jeng ta na? Kaloiho ahung ta e.”_ ahin ti phatchun kenjong Henge katin anungche ding in kaum tan, hinlah ka lung athi theipon, kathim jui² in ahile pasal khat toh ana tou in, pasal pa chu kavet le masang a ana kingai pi, a ex pa chu ahitai. Kamit a kamu vangchun ka tahsan theipon, aki thah ngalhon dan a kagel vangchun ahithei kitpoi. Ka lungnat danchu kamit ajing lha jeng in, akah le ka lung hang jin, Kei eisol doh a mikhat toh aki muto chu kagel le kalai ana val in ka umna lang jeng jong ka he poi. Ga koudoh ding katile la _“Mi alungset khattoh umkhom ta khume. Ija a dongma bon kihilou”_ katikit in lhase tah in kahung kile tai.

Nilhah a phone eihin bol vangchun ka pick tapo’n, message jong ka vetpeh tapoi. Whatsapp ka vet le  ngaidam akithum in, a umchan chu ka lungset kit in, kipah tah in ka houpi kittai. Ijat a ka lunghan ji vang’in ka lungset na’n a joval jeh chun ka lunghan nading hoa jong ei nuisah jinge. Lunghan na tampi neijeng jongleng, ama masang a kipa mel putjing ding kagel jin, ka lhaset nikho teng jongle a o kajah jiteng le ka gentheina jouse ka haimil pai jitai.  Guhthim a apul kadou chu kakigel le pasal kaki samo val’in, _“Phatkhat le eihin sitval inte”_ katin, hiche nilhah chun kahung kigellha tan, akoma ka lunggel jouse seiding in kahung kigongtai. Apat ding dan la kahepon, ka lungset danvang leiset a pao hijat aum vang in a hilchen thei ding um ponte. Kenjong nilhah hin ka call in, ka lunggel jouse chu kaban seilhah tai. _*“Shi. Phat sotpi loile pai in ihung kipol in, ka umchan jouse akon in jong ka lungset na hetan nate tijong ka tahsan e. Hinlah, kammol kahijeh in ka lunga um ka LUNGSET na jouse hi aseidoh dingdan kana hejou poi. Phat lemchang tampi kamu na’n, hinlah ka seidoh ngam na phat tunin ahung lhungbep e. Nunlui ngai a naka na ho ka vejou poi. Tuni a konin, ka lungset neisan peh in, na lonlhi thehhul peh ingting, na golpha pen le na lungset pen hijing tange. Shi. Na lunglam lou ahikhah jongle nei ngaidam in. Keivang nang a ding mong² a ka hinkho jengjong ka phal ahitai. Shi. Kahin lungset e. Neisan peh tei o na?”*_ katitai. Chomkhat jouin ahung nui in, kipah tah in, _“Min. Tuni chu nahung pasal nah e na? Hiche thu nahinsei ding hi sot a kon’a kana nga ahitai. Kei numei joh hin kahinsei na nga kahisah ahi nalai e. Phat chutih chan nei genthei sah. Ka genthei thoh cheng jouse nang in nathoh kit dihe. Ana ve o. Ka thusei chu hethem o. Ka lungset lou nahipoi. Na gel sang a kahin lungset joh nahi. Ahivang in tunin sangthei nai ponge. Hijongle aki lungset chu ihitai. Seilou a jong hetthem thei ahi”_ ahin tichun O Manipur! Anome anome.

Hiche nikhoa konchun ki lungset tobang in kahung umlhon tan, kasei vaigei jeh a punishment eipeh jehchun ei engbol in, _“Nei lungset em?”_ tia kadoh ji tengle, _“umm. Ka lungset chu. Ahivanga iki ngai lhon nailou chuo. Haimil hihta”_ eiti jin, kenjong, _“Nei lungset poule apha ahijenge.”_ kana tipeh jie. Hiche thuhi koima ka hetsah lhon pon, kenjong ka loipa Mamang jengjong kana seipeh khah poi. Kaki lungset na lhon jong kum 2 lam achetan, hinlah lungtup molso dingvang chu koiman ka pandoh ngam lhonpoi. Ajehchu Shishi in jong a inko te koima hetsah lou, a loiho jong hetsah lou. Keijong chutima kahikit e. Nilhah khat hi ka tot in, _“Shi. Itih le ikichen di hamo?”_  katile ahung le tot in, _“Aphat² in potante. Phante itini khatle ikichen le hitahta”_ atiji in, keini kingai chu totna a mathah kahilhon e. Hasei dingla alung noplou ding kadei kit pon,  akipa na ding ahipoule kajo chan in ka pang jing in ahi. A course kichai dingkon ahitan, ahungdoh dingchu khaltui bang kangah jingtai. December le ahungdoh ding eihin seipeh in, kakipa danchu aseije abei heljeng e. Ahung tengle kapeh ding von jong tampi kakoipeh tan, Christmas gift ding chuleh adang² tampi jong ka koitha e. Niseh a calendar vetjong vangchu khop aum thouve.

December ahung hitan, kangalel jing, ka lunglai pahcha jong jing nikho le hungding ahitai ti kahet phatchun sun nilhum in kaki sutheng in, vanleng a hungding ka bahsah jeng’e. Nilhah hin Mamang in phone eihin bol in, _“Min. Jingle Shishi hungding ahitai atiu hilou hamo? Oleh, na het louham?”_ ahin ti chun kajah ahung chathim in, _“Atiu hilou hamo?”_ tia amajoh kaledoh le, _“Min. Koidang lou tia nangkom a kansei jeng ahie. Nommo vang sahih inlang, Shishi khu Tuchung ahungdoh kah beh hin keia ding in joldoh tate na? Iti nagel em? Ka inko te jong jingle Shishi ahung dohding le chadom a chepai ding atiuve”_ ahinti tan, hiche thu kajah chun ka lungchang a koina ding kahe tapoi.

••••••••••••••••••••••••••••••••••••••••••••
*||    ===• INTERMISSION •===    ||*

_*Aban ana ngah Jing ute*_

_Akehkhat kahin jihdoh bep nalai in, atamjo avat nalaije. Saolheh jongle part 1 le 2 a chaitei ding katijeh a hung saokha ahi in, saolheh jongle pontho tah a eina simpeh ho chunga kakipana kahin phong kit in ahi._

_*KAKIPAH E*_

_By_
_*TangpaMinneo*_
_(+91 8131046031)_

_*Copyright © TangpaMinneo 2019. All Rights Reserved*_

*||       KA HINKHO KIKHEL SAH      ||*
  
   *L⭕VE     ST ⭕RY*      
_By-_
_*TangpaMinneo*_
_(14/02/2019)_

        _(so masa banjom)_
_(……hinlah seiding kahe tapoi)_

           *———(PART-II)———*
Ka khut a eikai in inlang changei in ei kailhung kei tan ahi. Inmai kalhun lhon chun kei insung lutding kajah acha ta’n, akhut lahdoh ding katile anom pon, ei tuh chahkheh in, _”Nei lha o”_ katile anomdeh pon ahi. Kada pum² in ei kailut in insung kalut2 lhon chun bench chung a chun atou in akap tai. Dinje touje kahe tapon, a lhiso ka vet joulou phat in akom a kaga touvin, _”Nao”_ katile _”Neikou hih in”_ intin lunghang tah in eihin houpi kittai. Kenjong ka seiding jouse ei kilahmang peh bang in jachat na joh in ei lekhu tan, inmai lang a ka potdoh kigot le ka potdoh kigot chu ahet phat in eihin del in, ei hin koi tan ahi. Mitlhi pum’in _”Heu. Nei dalha tahih o. Tukal ju jong don tahih o na? Lungset tah in tukal ka lunggim na ding in umji tahih in, nang naum loule phatseh in gichat nan kadim’e”_ ahinti chun Esther in ei lungset kahin hedoh tai. Hinlah kaki hetmosah in, _”Nao. Ipidia kei kaum loule na gicha jiham?”_ tia kadoh le kamai ahin tham in, _”Heu. Nei lungset em?”_ tin thudoh eihin nei tai. Thu chujat seiding ka lung a agin vangchun, _”Henge”_ tiding seh² jong ka seidoh thei kit tapon ahi.

Donbut loubeh a kaum chun ajah ahung jahcha in, akile hei mangjel tai. A umchan jouse chun achung a lungset na einei sah in, thu jouse banga seijeng thei hile ka lungset na hi phat sotpi kana im louding, lungset jeh a genthei jong helou ding chu kahi. Hinlah mijouse in agichat pa chun Esther kom a lungset thu seiding joh ka gicha jo tai. Kaneo a kon’a genthei le lunggim na helou bang a um kahi in, Esther kahin lungset a kipat chun genthei kahin hetai. Lungset ipi ham? tijong koima hillou in kahin hedoh tan ahi. Niseh in a umchan le a chaloh dan kahin ve tan, khosung a gollhang dang² hoa kon’a vendoh chu kakin ahung hijing tai. Esther hi lasah bolthei tah ana hi in, phat ahung che² in ahile houin sunga lasah hoa pan ahin lapan tan ahile khosung miho in ahin hepan tan ahi. Hitia mihon ahin het chu keijoh hi kana engse ji in, pasal dang toh akihou kamu pou² le ka lungthim chu meiam kisun khumbang in kaumji in, hinlah ka dongma ahi nailou jeh chun ima kana sei nom kit poi. Aman la ei lungset lheh in, ken ka lungset na jong seithei khopset ahi na e. Hinlah, kei kammol jeh in ijat vei eihin lunglah vang in a lungset na sanpeh nading phat tampi kana lhaso anahie. Kaki lungset lhon jong kaki hetto gel lhon ahin, hijeh chun kahung ki engbol to pan lhon tan, ama numei ahijeh chun aki polpi ding le aki houpi ding pasal chu atam lheh jeng in, amel hoi jeh chun ahin hel mi tamtah aume. Hinlah, dongma anei thu him² aki seidoh khapo in, chuleh keijong ama engbol bang kakisa kigo in numei dangho toh kivop ding kati jongle phat chesa a kahinna le kaki sahset ho mel a min eimu den jeh chun a genthei chu keibou kahijing tai.

Nikhat hi khanglai picnic cheding ahin ti tauve. Keihi kaki hetmosah in, Esther in jong eihin seipeh deh pon, jing nikhoa cheding ahitai. Nilhah hin Esther in _”Heu. Jinga dinga nakigot louham?”_ ahinti tan, kenjong ki hetmosah tah in, _”Ipi kin um ong?”_ kati le eihin vesal in, _”Henu in nangding numei khat gaveu te ati chu nahet louham?”_ tin eihin daikit tai. _”Chapang in seiding heta o. Nache nomle nang che o. Na umchan u vengam pong’e. Nungah gollhang ki mutona ding ahibou e. Picnic nacheding hilou ham? Nomtah in gollhang hotoh hinmang uvo. Keivang hung ponge”_ kati tan ahile amit a kon mitlhi olchan ahung longdoh in, _”Hitia houthei dingchu kahi hitam? Heu. Na umdan kavet le nidang na umchan toh akilou tahih e. Hiche insung a neihin puilut in, na lungset na neimu sah in. Numei kahina in vang ima kana seidoh ngam hih e. Nang sei kanga jingvang in nang in la nasei kit pon. Phatseh in jachat helounu kakisoh jitai. Aphatai. Tunia konin namai a kamel akimu kitlou nadin hiche in hi dalha tange”_ tin kotlang adel tai. _”Nao”_ katile adingden in, _”Ipi seiding um nalai ham?”_ ahinti kittan ahile keijong jachat na jouse pailha in athusei kajop tan, _”Ka lungset nahet nasa a phat chutih chan neina engbol ka thoh joulou jeh a na jahnomlou thu kahin seikhah ahie. Lungset tah in nei ngaidam o. *KA HINKHO KIKHEL SAH* nang idia ka lungset louding ham? Ka hinkho lhumkei in nang ka lungset na thu seiding hijongleng a kehkhat jengjong seichai jou ponge. Kei dalha a hiche insung na potdoh nikho chu ka hinkho beini jong hung hitahen”_ tin kaseitan ahile ahung kinung hei in ei kolchah in kadip a akingai in akap den tai. Hiche nikho chu kei le Esther ding a kipana pen nikho ahung hitan ahi.

Jing nikho in picnic a ding in kaki gong lhontan, bus a chun ka toukhom lhonin, nomtah in picnic bolna ding mun kaga lhung tauve. Gûn vadung kom ahin, amun chu nungah gollhang akingai/aki lungset hoding a lungset thimthu sutkhom nading a mun nomtah le lunghel umtah munkhat ahi. Hilai muna chun kahung kikhom tauvin, gollhang nungah dangho chu akham toh, akham loutoh adim lhajeng uvin, hinlah keini vang aningkhat a thipchet in kaki tung lhon’e. Aki lungset kahi lhon tahjeh in nidang bang lou tah in kahung ki jachat to lhon tan, kaki vetto jilhon tengle nervous nan kadim ji lhonin, kaki moh nuisat to ji lhon tai. Kanui mai2 lhon chun lungsung a seidoh theilou kipana chuleh lungset na thu ijat hamkhat apoh ahikit e. _”Nao. Nahinkho thusim themkhat beh nei seipeh tango na?”_ katileh _”Seiding jouse ka seichai tah chula”_ ahinti in, _”Ki lungset pi nana neikhah lou ham? Hibang a namel hoia”_ katileh jahcha thimtah in ahinsei pantai.

_”U-Lalcha. Nakom a ima im ponge. Henge. Ki lungset pi khat kana neie. Amin chu Goumang akiti e. Kakho u jong tuni hin hin seidoh jeng tange. Kangpokpi a *Vakotphai* akiti e. Amaho hi mi neijou te hi in, nungah hon ana dei lheh uve. Itih a jong dongma nei khalou nu nikhat kakpm a ka ginchat loubeh in lungset na thu ahinsei jeng in ahile kamoh lungdon lhah jeng’e. Kana donbut po’n, phat sotpi hitia donbut lou a kaum vangchun, numei dangho hile yes/no tia donbut dingbeh agel ding ahin. Hinlah kei lungsung a hiche jongchu aumpon, aman la aki letsah dan in eigel intin hinlah keichu chuti lampang hilou in, ka lung a dongma neding chu kapum gelphah loujoh ana hie. Nikhat ka in uva ahung vahlut tan, kakom a achuti taotho jengta’n ahile kana moh nop khah in, lungset hinkho ipi ham ti jong helou hel in lungset lampi a eihin lutpi tai. Kingai ki lungset kahilhon vangchun ipiti kiki ngai jiham? Jong kana hepon, chapang ngol bep2 kana hinalai e. Keiho insung a neile gou thua kahung kibui jou u chuleh kapenna Kanu le kapa hinkho ahungbei nung a puldou a kana ka² laitah hin ka chagat hinkho chu muneo nakhat eihin neikha tan, hiche laitah chu kenjong lungset tahbeh a kana lungset ahitai. Chuleh ama ding a ki phaltheng sel kana hie. Ka hinkho ho le ka inchen dan chu avet le eihin sit lheh tan, kahetlou in nungah dangho ahin hel pan tai. Alangkhat a mi haosa te ahijeh chun numei hojong adei atam lheh in hijeh chun numei akop2 in ahin kingai pipan tan, kei ei hepha kit tapon ahi. Kakigel le lhaset nan kadim in hinlah numei kahijeh chun ima kana bolthei pon, hitia apul kadou a kahinkho a genthei be sang in kikhen pi tange kati in, khenna thu kasei tai. Hinlah imacha injong eihin donbut tapoi. Kanule kapa thinung a ka numei hina ei jumso got pasal lah a jong ahungpang kha kit in, ka lungnat na asangval in, ka hinlo jong umlou bang a kigel a kingaise chu kana hie. Pathen in ka hinkho le ka thenna ei ventup peh jing jeh in tunichan in nangle Henu lungset nan tuni in hinkho thah eipe a *KA HINKHO KIKHEL SAH* nahi asah jouna ding kahepoi. Heu. Tunia na lungset kachan hi keiding a ka hinlo ahipen e. Nang in vang nei dalha tahih ta o. Heu”_ tin mi chujat maia chun kappum in eihin koi in, mi themkhat chun eihin mudoh uvin film live bangkhun eihin hohjah jeng tauvin ahile kahung kingdot lhon in jahcha tah in kaki nungngat to lhon tai. Kaki lungset chu mi jouse in ahin hetan, hiche thu chu Kanu kom ana lhung kittai. In kahung kile tauvin ahile inmai a Kanu ana ding in, insung kalut u chun eihin don lhon tan, _”Lalcha. Tuni ka thujah hi atah hinam?”_ tin eihin dong tan ahi. Kaki lungset lhonle tuni ka umchan lhon ahet ahi kahethem tan hinlah kqsei nom dehpon helou kakisah in, _”Ipi thuham? Maa”_ katile, _”Esther toh naki ngai ham?”_ tia eihin doh phatchun ka im nom tapon adihtah chu kasei tan ahile Kanu in, _”Lal. Naki ngailhon a naki lungset lhon chu keijong kakipah e. Hinlah chingthei lhonin. Mite vetset in umda lhon inlang, chuleh na ventup jingding ka nome. Ajehchu ahung kondoh na kihelou tobang ahijeh in khonung a ipi itolhon ding seithei ahipoi. Chen. Gaki chol tan nalal ding ahi”_ ati chun kakipah val in, _”Hitia Nulepa in iki lungset pi khattoh ei phatsah a ei kipapi chu leiset a kipana penkhat ahitai”_ tin keijong kisil ding in kache tai. Esther jong kisutheng tan, nilhah in houin kaiding kache lhon in, houin mai kaga lhun lhonle mihon eihin ve sau² uvin, itih a jong houin a amel kimu khalou pa houin kai a kache chu kidang asa lheh jeng uvin ei kipapi uvin ahi. Kaki lungset lhon ahi ahetjeh uchun abang in kilom eisa lheh jeng uve. Hinlah Kanu thusei kahin geldoh kit phat in kalung a chingthei tah in kaum kittai. Hiche nilhah a Esther lasa a hin koudoh u chun, ngaitah in, _”*Leiset a alengvai pen’a kana kigel lai jin, keisang a lengvai ho kamu teng. Pakai nei ngaidam in.*”_ kiti la ahin sah chun ama ongai toh, ala ngaitoh, amelhoi toh kave chim thei tapon, angol kana bang jengta’n ahi. Houin kikhen in mihon chibai ahin bol sau² jeng uvin, akoma kei kading in ahile ama jalchun ima bolthei lou keichu kamin phalheh jeng in, hibang a mi mantam khattoh kaki lungset chu vangpha kaki salheh jeng in ahi.

Kipah tah a hinkho mang tobang a umji vang chun akah le guhthim in a anhon na a ana lhisoh ji in, guhthim a aka jichu ken aningkhat a guhthim in kana muji in, ama genthei chu kavet le keijoh kana genthei joji e. Hitia aumjing chu ka lung anomthei tapon nikhat hi natong a kachena muna kon’a kahung kile chun olchan kotbeng a kon a kavet le a anhon na a ana lhisoh kit kamu chun kenjong akom kaga nai leh alhi gangchel in akitheh in kipah tah bang in aumtai. _”Heu. Nahung lhun hitam? Na lel em?”_ tin eihin dong tan hinlah ken ka donbut tapo’n lunghang thimtah bangkhun kave in ahile _”Heu. Ipidia hitia chu neivet hamo? Ka bolkhel um ham?”_ tin eihin dong kittai. Kenjong, _”Esther. Ipi dia guhthim a na lhiso jiham? Oleh, naum nahi nom nasah louham? Kenla kahin lungset lheh vang’in hiche kalval a in nom sahdoh nading neile gou kanei pon, nei ngaidam o na? Nomtah a kahin koinom lheh vang’in ka nei in atahjou poe.”_ katin ahile kakam eisip peh in _”Heu. Hitichun seihih in. Keidia hiche insung hi leiset a ka vangam ahitai. Hiche kal a innom jong kadei poi. Ka lungset nang anga kaum poule, keidin avat ima aumpo e.”_ ahiti kit tan ahile kenjong ka dong kit in, _”Ahile ipidia na lhiso jiham? Nao. Na mitlhi neimusah tahih o. Na mit a mitlhi kamu tengle ka lunglai hi ana val jin, ka thisan ki lhohlha abangjie”_ ti kasei tan ahile aman jong eihin koi in, kadip a amai abeh chahkheh in, _”Heu. Kalouding kativang in ahithei jipo e. Kanule Kapa ka geldoh ji tengle ka lonlhi hi ka seljou jipoi. Heu. Nei ngaidam o. Tukal kap taponge”_ atin _”Kap taponge”_  ativang chun ka anglai a akinuh den tan, hiche nikhoa konchun kaki lungset na lhon chu ahung sang dehset tan ahi.

Gampam a um ka unu in keiho insung thu ahin jahdoh phatchun lungdong tah in nikhat hi phone eihin bol uvin, _”Lalcha. Nangchu ajinei tai atiu atah ham? Nang pahi ka hetlou a dongma nana neidan hichuo o na? Kahung doh² le na nehkhop teh a mol nathoh d ana kisui ta o. Na jinei jongle `ji kahin kipui tai` tibeh nahin seimo ham? Henu to nang mong2 hi”_ atin lunghang thimtah khun ahinsei tai. Ka unu hi minom tah kitile mitotse ahin, akom a thu ima kana im jilou chuleh ka lunggel ima house kana seina ka unu ana hie. Hijeh chun kenjong kale donbut in, _”Uushi. Ka jinei poe. Hiti hi ahie”_ katin thu jouse le kaki lungset dan lhon jong abon chan kasei peh tan ahile chubang a mi lungset hethem kana hikhah chu ka u jong akipah lheh in, eihin daibe kit in, _”Akhutile. Ka naonu dingnu chu kamu nom nah e. Alim hinthot ta o. Pute koma chadop ding kiti jongle la pute tia seithei ding a nungsang la akihe pon, ipi hile Pathen in apha² eihin gonpeh mai uhen. Taona in ka jui jingute”_ atin ka hang-up lhontai. Midang² in ahet sangchun ka u kom’a ka seidoh chu kalung ana vah lheh jeng in ahi.

Keijong angaibang in natong in kakondoh tan, ka natoh na mun jenga jong Esther kachuti gel² jeng in, ama kipah tah a hinkho manna ding in ken nehding kahol in, sumle pai muna thei ahipou le hatah in kapang in thanom tah in na kana tong jin ahi. Hiche nikho chun dukan a Esther ding nehthei  kahin cho in, in kahung lhung in, _”Nao. Esther. Veteh nehthei kan chohpeh”_ titoh kopin insung kaga lut in ahile Kanu le Esther lungdong tah ana toulhon chu kamu in ipi thu aum kahe pon, kadong tan ahile Esther in ei donbut nompon, aka kigot phat chun Kanu in, _”Lal. Tuni chun *Vakotphai* a Esther palen te ahung’e”_ ahinti chun, ka chem kaga kilah in, _”Hoilai a um hitauvem? Kile u tam? Ipi thu soh jongle kakhut a konin kanao Esther koiman ei lahpeh thei ponte. A kingap cha² hung u hen. Abong² a ka sattan diu ahi”_ katin lhisoh leu in kaga hol kigo kigo tan ahile Esther kotbul a ana ding in, _”Heu. Mi natha sangin kei nei that masa o. Hijongle ipijeh a hung u ham? tibeh he masa golou a ipidia chem nalap ham? Pasal bolding ahipo e. Na bol pou² le ka ka kit dihe.”_ atiphat chun ka lunghan na jouse chu a onem heucha chun ei lubgdam sah kittai. Kanu in aseiban ajop pai in, _”Lalcha. Boi. `Pasal kahie` tin lang na tha jedoh loi kigo hih in. Tuni Esther palen te in nangle Esther kichensah ding thu ahungsei uve. Hinlah chomkhat amaho kom’a umding in asei uve. Naki chen lhonding asei u chu kakipah in, hinlah chomkhat hijongle Esther in ei dalhah dingchu kagel le ka lunghel masa e”_ atin, Esther in jong _”Henu. Pelthang kam ahi bou uve. Ka palen te in hitia keichung a thilpha agel diuvang van a aga e. Keivang che naisai ponge. Kanu le Kapa hinkho ei lahpeh ngam ule kei hinkho chu ipia agel diu jong ka tahsan poi. Gamsa bang a Kanu le Kapa thisan aso u jong phatante. Henu. Neisol hihbeh o”_ tin Kanu kengbul atuhin akap kigo leutan ahile alhiso kigot chun kei eihin vetle alhisoh ngam kit tapon ahi. Hichan gei a chu Esther in ei lungset ahi.

‌Kaki gel mathah tauvin, keijong ka lungdon kheh phat in ka u ka call in, _”Uushi. Hiti thu aum kittai”_ katin kasei kittai. Ka u in, _”Apha-ase ageldiu seithei ahipoi. Khonung a akhohse cheh aso sangchun Vakotphai a chun sol uvin lang, guhthim in nang in jong kajui in”_ atitai. Ka nule Esther toh kahung kihou tauvin ahile hitiding chun keile Kanu in pha kasah lhonin, hinlah Esther ada chahkheh tan ahi. _”Nao. Kasei ngai in Pathen in eini eikhen lhon ponte. Genthei te Pathen aumnai”_ katin ka lhem lungmong in cheding kati tauve. Ajan in Esther in kakom’a, _”ULalcha. Ka thina mun jonding kabang e. Iche na dingmun kavet le ka gicha masa e. Tua nang ka lhaso kitding kagel le thima kanom jotai”_ atin, ahung kimoh nuhdoh kittan ahile kaplou ding a kitem teni chu akaplou kaum lhon tapon, chapang bang in kaki angkoi lhonin kakap lhontai. Kenjong kagel le hahsa kasa lheh jeng’in, hinlah aphajo ahung lhunding deina in, khonung le pute lhaset ding deiloujeh chun kaki moh gellhah tan ahi. Hichun kanigel lhon in Pathen kom’a kaki lhan lhontan, _”O Chung Pathen. Kaki lungset dan lhon jong keini sang in nangma’n nahe giljo in. Keini ki lungset sanga nang in nei ngailut lhon jong kahe lhon e. Hijeh jongchun namin ka thangvah lhon’e. Jing nikhoa ka kalson na lhonding a nangma ka meivah lhon in hungpang in lang nadeibang in eipui lhon tan. Lubsget tah in, Pathen, kathi lhonding jongle nei thikhom sah lhon in lang nei khen lhon hihbeh in o Paa”_ tin lhilong pumin Pathen kom’a kaki phin lhontai. Ajing jingkah in ka chelhon ding konin Kanu in taona eiman peh lhonin, _”Boi. Damin hung kile tai lhon in. Na chena chan lhon a Pathen in namapui jing lhon tahen”_ tin eihin vailhah lhon in, keini jong lunggim le kipa tho in kahung doh lhontan ahi.
‌
‌
‌    *——–(END OF PART-II)——–*
_*PART-II hichan hin ana nga u hitin, aban nilhah dangle ana simkit taute. Pontho tah a eihin simpeh muntin a um kanam mite jouse henga kakipana sei joulou kahin phonge. Maban a jong neihin tilkhou diu ka ngaicha in, na support na ngaicha jing kahi.*_

_Thusim chungchang a *seinom, dohnom chuleh comment* na peh nomle ki phatlam louhel a anuia ka number a hi neihin houpi jingthei u ahie._

*KAKI PAH E*
“`Keima~“`
_*TangpaMinneo*_
_(+91 8131046031)_

_*Copyright © TangpaMinneo 2019. All Rights Reserved*_

*||     KA HINKHO KIKHEL SAH    ||*

                 *——(PART-I)——*

*L⭕VE     ST⭕RY*
_By_
_*TangpaMinneo*_
_(13/02/2019)_

Leading role.

“`Lalcha & Esther“`
_________________________________
Gollhang tahsa le mel kahin poh a kipat, kitile kahung ki kethoh sah a kipat a kon’a keihi mi kisase kanahi e. Ka chenna Lhangjol vangkho a jong numei chapang hon ei gichat pen u, a gilou a kithang Gollhang Lalcha chu kana hie. Vengsung a koiman ei munom pon, adehset in nungah hung khangdoh pan² ho in eina mu ngamlou u mikhat chu kahi. Chubang a ka gitlou vangchun tehse chatmo ho kave jou deh jipon, khohna khat a ka khoh vangchun hiche lampang a chun ngailut na khat kana neikit e. Hinlah vengsung a kei ei kivop pi le ei kipol pi ding mihem ana umlou chu ahimai e.

Kanu Kapa chuleh ka insung mite in jong alona je eihetlou u pasal khat kana hilai phatkhat laichun, jubel kitun na a kamel akimu jingin, chuleh khamna thei soh a kana tanden lai tah nilhah khat hin ni alhum tan, keijong ka ngaibang lampi let le neo kite tohsa chu avel in kahin tephei peh in vengsung a kahung vaphei laitah hin lampi panga nungah chapang khat ana tou chu kamu tan ahi. _”Ipi tidan a tuni chu kaphat thim khat ham?”_ tin kalung thim a kigel pum in hiche nungah nu chu kave in ahile a umchan chu mitoh banglou khat ana hikha e. Ka vet chenset le kamukhah mi ahipo in, ka kham vangchun ka lunggel a hiche numei nu chu kisei mai le *mingol* khat ana hikha tai. Asam chu kavet le samthi amukhah louna sotlheh dingdan chu ahitan, amel jong nen adimset jeng’e. Mihem chunga lungset na neilou bang a min eigel pa chu hiche nilhah chun hiche nungah nu hinkho dingchu kagel le ka voujang ahung na tan ahi. Eihin ve in, _”Heu. Kagil akel e. Nehding neipe o. Nehthei nei chohpeh o”_ tin dahdoh ngamlou in ahinsei tan ahile kalung akidang val in, hitia houpi thei kana hi lam chu kana kigeldoh vah poi. Kenjong ka sakhao kamai lele leh sum dangka 50 ka judon na a valdoh chu kape in ahile akipah in, alhaisuh jel in dukan a nehthei aga kichoh tai. A umchan chu kavet le kalungset lheh in, mibanglou a hinkho aman chu ka lung atheh lheh jeng in, koi ahi vang ima kahe doh naipoi.

In kaga lhun chun nidang banglou tah in thipchet in kaga lut in, nidang a insung kalut dingle kotkhah khatvei tei² hin pehging jingpa chu hiche nichun  Kanu in kidang asaval in, eimoh vetden jeng’e. Kanu in, _”Lalcha. Tuni ipi natiham? Na lung lhailou ham?”_ tin eihin dong in, hiche thudoh eihin neichu thu dang bang in kalung a aging tapo’n, Kanu in jukham le kitom mel a bou eina mujing chu kahin ki geldoh in lung kisih nan kadim jengta’n ahi. Hinlah ima in ka donbut po’n, bu eihin thuhpeh in kane vaset in, kaki sutheng in lupna kajon tai. Ka jalkhun chunga chun kaki gel² jeng in, _”Ipi atile hibang a phamo kahi ham? Kapen na Kanu jeng in jong miphalou bang a eigel thei hi ipijeh ahidem?”_ tin kakigel in ahile ka thilbol jouse kahung kisih in, alangkhat a nungah ngol nu chu kahin geldoh kittan, _”Hoilang mi hija. Anu apa umlou ham? Ipidia gilkel athoh ahideh o?”_ tin gamtin kahin gelkhom tan ahile ka judon a kick afuh thimjeh chun chomlou kah in kana nah hai kittan ahi.

Ajing nikho’n bazar a kachen von chohding katile bazar a mi ana dimset in, munkhat lah chu mi tamtah ana ki umkol in keijong ka lungdong kaga vet le janlhah a nungah nu chu dukan nei kolte mikhat dukan a nehthei alahdoh jeh a, houset le avoh ana kop u chu kamu kittan ahi. Ka penpi kanao khat toding dinmun a kahin gel le ka lai ahungna in mi jalah a chun ka ki thehlut in kaga kaidoh tai. Hichun miho kom’a chun, _”Na jat chanpi numei khat. Hichejong chu mitoh banglou nalai khat jatdang chidang ho khutthah lhaona dinga na phal ngam jengu ham? Na chanu hiti hin bolleu na vetjou diu hinam? Amona a na panpi loudiu le amona chunga khutlha dauvin. Mite vetset ichan nau hicheho hi ahi. Nahiti lou ule hiti pouvin nate”_ kati in dukan neipa kom’a chun, _”Hitobang a athua seilou a sele pha helou mikhat chunga nakhut nahin vellha le Lalcha koi ahi nahet ding ahi”_ katin dukan a alahdoh nehthei manchu kapen hiche nungah nu chu kahin kaidoh tai.

Kakhut a katuh a ka kaidoh tahvang chun amin jong kahe naipon, chuleh hoilai mi ahijong khatcha kana hekit pon ahi. _”Tun puileng hoilai a ka dalhah pa kitdi ham? Ka lung akham lheh tan, munkhat a dalhah jengding ahi”_ kati in lampi munkhat lai a chun nehthei ka chohpeh in ka dalha kittai. Hiche ni chun ju kana don tapoi. Kanu a lungdong cheh² tan, ka hinkho akikhel jeng chu Kanu ana lungdong lheh e. Ka judon ding adei ahipon, ka buina um ahisah jeh johchun eina lungkham pi lheh e. Chubang a Kanu thusei kangailou vangchun Kanu in vang ei ngailu jingnai ti kahe chen cheh² tan ahile ka lung kisih na ahung tam cheh² e.

Jukam nam loupet kahijeh chun Kanu in eihin houpi in, _”Lalcha. Na buina ipi umham Boi?”_ tin eihin dong tan ahi. Kenjong, _”Mama. Tuni bazar a nungah mingol khat mihon ana vo uvin, kenjong kavet le eimi numei khat ahijeh chun ka lainat pi in kahin kaidoh in nehthei kan chohpeh e. Mama. Lungset aumdan”_ katile Kanu in chubang a ngailut na neiding kahi ding chu atahsan pon hinlah ei kipapi lheh jeng’e. Bu kaneh jou uvin kenjong ka lupna kakijot kittan, ki ngaito hattah kahijeh chun gamtin kahin gelkhom kittan ahile sunlang a ka thilto ho kalung in ahung kilang in, _”Nungah nu chu hoia a imu tadem? Bu anehding hinam? Oleh, min ana engbol kitdem?”_ tiho ajat² kahin geldoh tan ahile ka imu thei tapon ka room le common room chu kasuh che katouche tan ahile Kanu alungdong lha jeng in, _”Lal. Ipi nati ham?”_ tin eihin dong kittai. Ka lungbuina ho kasei jeng tan, _”Mama. Hungo. Tuni ka dalhah na muna chun gave hite. Kalung athi thei hih e”_ katile Kanu jong ahungnom in meivah kaki choi lhonin sun a ka dalhah namun chu kaga velhon tan ahile lampang a dapsa tah a ana imut chu Kanu in ahin mutan, _”Lalcha. Veteh. Hilai a khun mikhat aume”_ atin kavet le ama ana hiphat in Kanu kaseipeh tan ahile Kanu in jong angailu lheh jeng in, hilai muna dap athoh chu avejou pon, keiho inlang a kahin puilut lhon tai.

Kanu in tuilum a om in, ahin sil ngim selin, gampam a lekha sim a um ka unu von dalhah ho chu a kivonsah in asam ho hoisel in ahin potup peh tan ahi. Room a kon’a Kanu in anne dinga ahin puidoh kamu chun ama ahiding chu ka tahsan thei tapoi. A limlui toh limgeh bang a aumpet limchu sun le jan abang jenge. A vouso ahoisel in, mingou ahi in, asam jong a kong changei apha in, anam suhjel jeng’e. Chubang a melhoi khat mingol mel ana putchu ka lai ana lheh jeng in ahi. Ka lungthim a genthei khat kithopi kahijeh chun kipanan kadim in, hiche nilhah chun hiche nungah nu hinkho chu *KA HINKHO KIKHEL SAH* khat ahung hitai.

Jing nikhoa kon chun Kanu toh akivop jingtan, Kanu in ucha bang in eibol uvin a ngailu lheh jeng’e.  Nidang chun ka houpi ule gicha jing tobang in aum jin, lhakhat jou hin ahung hamdoh jep² tan hichun amin kadong lhon in ahile *Esther* ahi ahin seidoh tan ahi. Nikho che dungjui in doctor ho koma kaga vetsah ji lhon in ahile ama jong ahung pil jep² tan, noptah a ki houpi theile ki voppi thei ahung hidoh tan ahi. A umna mun vang ijat vei kadoh lhon vang in a hedoh thei naipoi. Kanu’n _”Lalcha. Tua hibang a ibuipi lhon vanga a inko ten aholmo diu dan ka gel le a hahsa val e. News lah a flash bol hitin, a insung mi hol a pha ahi. Khonung le ibuilhon ding ahi”_ ahinti tan, kenjong pha kasah in Kanu seibang in kabol tai. Lha 3 lang kanga lhon vang in koiman ima ahung sei pon hijeh chun Kanu in ama cha bep² in ahin kisin doh tan, aki ngailu lheh jeng lhon’e.

Nikhat hi hospital a kapui lhon le operation bol ngaiding dinmun in ahung umtan, keini nucha in neile gou sumle pai la kanei lhon pon, sum holna ding la kahe kitpon ahile kalung akham val tan, kaki gel² le ka garineo pulsar khat johdoh ding in kahung kigellha in gangchel in dangka 60,000 in ka johdoh in hichea chun Esther operation kahin bol tauve. Pathen koma katao jingtan, Esther damna ding in Kanu toh maicham kasem jing lhonin ahile Pathen in katao nau asang in Esther operation jong lolhing tah in aki chaitai. Theatre a kon’a ahin puidoh jou u chomkhat jouin ahung khangdoh in eihin mu chun aumna kimvel lah chu ave lele jeng in, kei eihi ven, _”Heu. Nang koi na?”_ eihin tichun ka lung adong val in ima seilou hel in kenjong kamoh vetden tai. Kanu ahung luttoh akitoh chet in Kanu in aga houpi in ahile Kanu chu ave jangkei in, _”Nangho koi nahiu ham? Henu. Ipidia kei hilai a kaum theiham?”_ atin ahile kanu jong alungdong val in ima aseithei kit tapon, kaki moh vetto jeng tauve. Hichun doctor hokhat ahung in Esther kom a thu umdan jouse ana seitan ahi. Hichun kei le Kanu koma kipa thu seile ngaidam thum akop in, lhisoh pum in aumtan ahile keini in jong ka lhem lungmong lhon in doctor hoa kon discharge kamu phat uvin inlanga kapui lhon tai. Hiche nia konchun ki het chenset na kahin nei tauvin ki ngailu tah in hinkho kahin mangkhom tauve.

Eimi te ngaina in thilpha kibol na a jong phunse te ihi nau bangchun keini nucha natoh chu khosung’a hotel a bolding helou a touho kihoulim na topic ahung hikit tan ahi. Aning khat a eina seise mi ahung kichu tholeu tan ahile keijong nikhat kahung lunghang tan, khosung’a  kakisen in, _”A thinom² in tukal Esther thu hinsei kit uvin. Na in u toh kahal lih thading nahiuve”_ katin kaki tom lele tan ahile gollhang mi thum ahungdoh uvin kei voding in ahung ki goltoh chet uvin, kenjong ka nuisat in _”Nangho loi nahiuham? Hungtao². Tuni Lalcha nam najah diu ahi”_ katile khat ahung leng phei in tollai a kachil thang tan ahile adang teni in thingkeh in eihin jep lhontan keila ka khut goh in kapang in kaki habui val phat u chun khosung’a upa hon eihung phel khen nah² uve. Kanu in eihung phohthip in insung a ei kailut tan ahi. Insung kaga lut a Esther in eihin mu chun ahung peng in, _”Heu. Namai a thisan chu ka gicha val e”_ atin amai akisip in aka toh kopin apeng dentan ahile kenjong mirror a kaga kivet le ka chalpang munkhat laichu a thi analong in, gangchel in kaki suhtheng in band-aid kakibeh in Esther kom a kaga che kittai.

Thisan amua agichat danchu kagel le a hinkho chesa a thisan lonna khat ato ahiding ka gingmo tan, hijeh chun kenjong nikhat kaki houlim laipet lhonin kadong tai. _”Nao. Ipi tidan a thisan namu le hitia chu naum jiham?”_ katile, aman jong, _”Heu. Phatkhat laichun keiho jong insung mi kikim a nomtah a kalen nau phatkhat ana ume. Hinlah neile gou ki engset peto jeh in ka palen te muda kahung chang tauvin, kapa in a khuttah a ana lamdoh sa neile gou chule gam jouse ka palen te in mi upa ahinau aki lunglet pival jeh uva eina lahpeh u ahie. Hiche gohkeu chu hilou a kamitmu a Kanu le kapa hinkho eina lahmang peh u ahi. Kei jengjong pasal honkhat in ka numei hina a jumso ding eina got u ahin, Pathen in ei phalpon, kahung jamdoh le lampi a gari khat in eihin takhah chan kahe e. Aban kahe poi. Ipi tidan a hilai muna kahung umkhah hamjong kahepoi. Hiche thisan lonjan chu kageldoh jile thisan kamu jouse Kanu le kapa thisan long dan a kagel jeh a ka gichaji val a hitia chu kamoh umji ahie. Kei kanop a kaum jong ahipoi.”_ tia alhi longpum a ahinsei chun ka lungset lheh jeng in, hiche nikhoa a hinkho thusim kajah chun achunga lamdang tah in lungset na sangtah kahin neidoh tai.

Hitia hinkho nomtah ahin manthei tahjeh chun keijong ka lung among lheh tan, kaki pah lheh jeng’e. Khosung a mi konkhat in akicheng dan in eigel jiuvin, _”Lalcha. Itih kah a ji nanei hamo?”_ tin eihin dong jiuvin, akah le kajah ahung cha ji in, hinlah ka lunga chun ka jiding bang a kagel le ngailut na kahin nei cheh² tai. Alangkhat a Esther chu nungah ahi heho in ka naonu, ka sopinu dan in agel uvin, aning² a ahin hel pan kit tauve. Kagel jile angol lai a donlou uva tua kahin kisemdoh phat a akichu tho jeng u chu ka engse in, _”Mitoh abahlou lai a bon mulou uva tua nei lahpeh kigot kit uham?”_ tin kalung a chun kamoh lunghan jitai. Nilhah khat hi keijong kaki gel in ka lungset na hi ka seidoh loule kahung vaigei ding kati aja lheh tan, seidoh jeng ding in kaki gellha ta tan ahi. Kaki gonjing laitah nilhah khat hi inmai langa pat in Esther ahung pengjah jeng in, _”Heu. U Lalcha. Henu.”_ tin chapang ka in ahung kapjah tan, kenjong kadel jel le inmai a pasal khat in kaimang ding a akhut ana tuhchu kamu in, kavoujang ana val’in pasal le pasal kivetlhah ding ahi katin asuh le apeh kakop le chatman louhel in alhutan hichun thopal a kaman gokeh khat chu kala in, ka jep kigot le Esther in eihin tuh in, _”Heu. Bol hihbeh o”_ tin kakeng a tuh leutan ahile a umchan chu kavetle kamoh lungset lhah in, thisan kaso a Esther lungnat na ding kaboldoh ding jehchun kalung kaki khaikhi in inlang a kahin puilut tan ahi.

Potdoh ding kakisah le Esther in _”Heu. Keijong kahung dihe?”_ tin eihin jui kigo in kanom pon ka chedoh tan, phat sotpi kana dalhah ta sa, ju kahin don kham kit in, ka lungset pen khat midang in ei lahpeh kigot chu kagel le kalai anaval in hiche pasal pa chung a phulah ding kaki go in mitsan leu in ju kijoh na a kon’in kahung doh tan ahi. Hilai muna kona kapotdoh chun inmai a Esther ana ding in eihin muchun atou in akap lhatai. Guhthim a kahin dalhah vang a ka judon namun chan eihin juilut ahichu kahe tan, kei mitmo jeh a ka lungset khat in gichat tijat helou banga jan nuia hitia lhisoh puma ka umchan ana vetchu kakisih in hinlah seiding kahe poi.

         *×=••INTERMISSION••=×*

_______________________________

*Aban ana ngah jing’u hitin, pontho tah eina simpeh ho jouse chunga kaki pana kahin phong’e. Adehset in tilkhouna jat chom² hin neiho jouse.*

*KAKI PAH E*
_Keima_
_*TangpaMinneo*_

“`Thusim chungchang a seinom, comment chuleh dohnom nanei le anuia keima number kipea hi neihin houpi jingthei ahi.“`

_(+91 8131046031)_

_*Copyright© TangpaMinneo 2019. All Rights Reserved*_

*||      ••• BORDER LINE •••      ||*

_*”Henu. Kadam nai. Na taona’n melma te meichang a kon ei huhdoh jing’e”*_

      *•••••••••• PART-III •••••••••••*
_(23/02/2019)_

_By-_
_*TangpaMinneo*_
_______________________________
“`Based on true story of a brave KUKI army across Indo-Pak border.“`
________________________________
_*so masa banjom*_
_(……”Boi. Kikim thu najah hitam?” tin eihin dong’e)_

Hitia koiman Kikim thu eidoh behseh loujeh chun kalung in gangchel in gellou ding tincheng ahin gel’in, _”Kikim in ji anei tai”_ ahinti chun seiding helou in, ka phone tol’a akheh lhah lam kana he tapoi. _”Boi. Soson. Hello. Nanao”_ tia phone a Kanu in eikou chu kamang bang in kaja in, donbut ding jong kagel thei tapoi. Lungthim kibot keh bang in ka tha ajoi lha jeng tan, onem heuva, _”Henu”_ tiding jong ka ngapcha tapon ahi. *Lungset kiti vang gunei ahi mong² e* ti kahe chentai. Genthei kile na dia kana lhen ka ngainu in la phungdang a pahdia lunggel anei ahitah jeh chun kei lunggel banna ding aum tapon, _”Ohe! Ka pummei keidia ka golngai pen hiding hitam?”_ tin kacheng kalo tai. Alam lhung louding ki lungset vang agil deh in, molso joulou ding lungtup jong asang deh e. Genthei phat kichaiding ngah jinga lungtup molso ding nikho kasim jing lai a keidia ka thina thu ei kisei peh bang in kalunga pohnat val jeh in pasal hina’n pojou talouvin ka mitlhi alongkang thei tapoi. _”Itih tah le ka lungset Kikim onem heuvin ka thohnat na jouse a mansah in, a lungset na lim noi’a ka toudem?”_ tia kana gellai in *”jinei”* kiti thucheng seh² chun lungtup mun lhunna ding lampi jouse palsang tah in agen tan tan ahi. Iti kou jongleng keiding a Kikim ka anglai in pom thei kit phat um talou ding ahijeh chun ka vetna jouse chun Kikim ei geldoh sah in, aguh in mitlhi kana kitheh tai.

Hitia Kikim puldou a kaum, jan duty kapoh laitah hin ka umna kom’a thingphung chung’a chun vakhu teni nupa lung kitoh tah a thingphung chung a atou lhon kahin mudoh tan ahile keile Kikim dan’in kagel in ka lunghel valjeh chun kenjong ka kappum in Kikim ka hin lachoi tan, _”Vakhu teni nupa bon kop’a lhavah noiya samnag jalkhom ta. Iding kangai tunia lengdang anglai a jal ding lung gel nahimo? Sulnung heilou dia che nahitah jongle, `Heu. Kakhentai` tibeh seina kham kahilou ham? Koi lunglai in dou nante tia nagel ham? Tua kei eilhem bi ding hoiba hitam? Senneo a pat kilungset na idia tua mitphet kahlou a na tansah jeng thei ham? Ilelsa thimthu chhegho hui lah a vai kithe bang lenmang sahdin vang kagel ngam la e. Tua kei koitoh laileng a na vangkho kahin mu tengle ipia kilhem ding kahim? Hitia nei dalhah dingle ka genthei na jouse jong na lahmang leh iti ham? Na angkoi jong ki-oi deh ponte. Numei lunglhom nahi Boi. Laikhat a lengkhom thei hile hen khenna kolni jong eini ding in soh ponte. Kachang in dingjou pong’e. Boi. Nang ngaia khulsin kachan ding melmu nom nahile ka melma te khutnung a ka longdamsa hinmu in natin ana lungmong tan”_ katin kalhi kaki theh tan ahi. Hitia ka hinkho man noplou danchu ka sepoy pankhom pi kaloi le pai hon eina vejou ta pouve. Akah le eihung dong jiuvin hinlah thil chom² in kalep doh ji in, aguh in kachang in kakap jingtan ahi.

Hiche nia kon chun ka hinkho man ahung hah jep² tan, ka thilbol ding jouse jong ka bol loi; kabollou loi kaum sah in, hiche jeh chun gotna tampi kana toh e. Gotna eipeh jeng vang uvin ipi kabol ham jong kahe deh pon, angol bang in kana umji tan ahi. An le tui jong deibang in kane thei tapon, kaneh nomlheh vangin ka hithei him² pon ahi. Akah le Kikim kahol ji in, kamang a kamu jiteng le katah a jong chun kahung kapdoh ji in, eilhembi ding mihem la aum ji tapoi. Sepoy kana pan chu kaki sih laichat e. Hitia ka lungset toh kikhen na ding bep ahi hepou² leng ana pang naisai louding kahi. Ka lungnat valjeh chun sepoy ho pou chung’a chun ka chuji in kasam se jah² jeng’e. Lungnop na kakipeh kigot vang’in phat sotpi apuldou na’n genthei najoh kahin thoh jingtan ahile ka tahsa jong akhesuh tel tul jeng’e. Kana kihet louvang a chu kana gonlih dehchet dan ahitai. Changkhat pu bang hinkho kahin mangtan, leiset hibang a len hi keiding in mun onglou bang le ki lungmon na ding mun umlou bang in kana kigel tan ahi. Nidang chun break kanei ji teng ule call ding kaki holthu tobang ahi ji tan, hinlah hiche nia kipat chun koima jong ka houpi ngap tapon, phone jongchu se tel deh ding kalung ajalha jeng’e. Thi puldou vang hahlheh jongle athoh dan khat aumnai, hinlah hinlai puldou kiti vang leiset a gotna phatah ahi. Sun khat lungmong chet a phat chesa ho gel a ka mitlhi kaki theh lai in Kanu in eihin call in, _”Boi. Na phat² hinam?”_ ahinti chun chapang ka in kakap nom in, inu kom’a kium hipou² le hiche ni vangchu kana ha ka lheh dingdan ahi. Hinlah Kanu lung genthei ding kanop loujeh chun kakam kasip in, seithei seimo in _”Henge. Henu. Kadam phat pet tiding ahijenge”_ tin ka donbut tai. _”Boi. Jahda hih in lang, Kikim gel² tahih in. Na lungnat dingdan kagel le kenjong ka pojou hih e. Hitia nahin moh dalhah thei chun khonung a na chenkhom pi lhung ding ka tahsan deh poi. Giltah in gel in lang, amilna ding geljo tan. Tulah kamang anom hih e. Kamang a kahin mangset jie. Boi. Hijongle lungneo deh hih in, na Chunnu keiman kahin taopeh jingnai. Genthei te Pathen aume”_ ahin ti chun ka lhaset na jouse ki lamang abang jeng’e.

Kaloi hom ka umchan chu ei datmah lheh jeng uvin, nidang a totna bol a kiseimo pa chu thipchet a kaum tahjeh chun ka Sir pa uvin jong ei dong tan, hinlah Kanu kangai dan in kasei jin ahile ei dai ji in, amaho pao in _”Hey. KUKI. Asalai thamkha nailou a ipidia tua lunglha dai paijeng nahim? Avat nalai e”_ eiti ji in, kenla donlou. Asei bep² achuti sei in, kenjong kagel bep² kachuti gel in ahi.  Akah le ka geldoh ji tengle ka lunghel lheh ji in, ngai lai banna vang ahahsa val’e. Sepoy training laiya bon punishment chujat kithoh a kikap lou a tua jinei na in vohlou a ei kasah chu kagel le kalai ahung na in, kaki gel² le Kanu thusei ho aban cha’n kalung a ahung kilang in,
ilding hah lheh jongle milding kahin gel tan, _”Ka hinkho genthei sah mihem khat chung’a lung kagel sang in ka maban ding ngaito jo tang’e. Kanu genthei na ding bep ahi. Kei lungnat na ding ahi bouve. Pathen in kei a ding a aphajo agon jing ding ka tahsan e. Ahoijo kaki mu thou² ding ahi. Kapa in chapa khat a eihin ngal a ipidia kei nungah a boiding kahim? Heraaaa. Kei le Pastor Sholal boilou di. Ija sum mu nabon hilou”_ katin keile kei kahung ki lhamon in ka duty mun chu kipah tah bang in ka jon tai. Lung genthei phat jong aum in hinlah nuina phat jong kahin nei jep² tai. Kipna ding kahin kihol pan tan, kalunga, _”Hinkho hi kipana ding ihol laise in kipana ding avat pon, lhaset na ding ihol jongle jong-eh vadung abang kit e. Eima lunggel in hinkho kipa leh lhaset na lampi anigel in apui theie”_ tichu kahin geldoh tan, lhaset ding koima kinom lou ahijeh chun kenjong kipana lampi jotding kaki geltan ahi. Kaloiho Punjabi sepoy ho toh chun kaki daiji in, ama hon Punjabi chondan ho eihil jiuvin, kenjong KUKI te chondan khandan kahil ji’n ahile kaki ngailut nau jong ahung kibe cheh² in, kipana ding le nuina ding tampi jong kasei khom jiuvin, Sir pa gei² in kanuisah jiuvin ahile kahung ki lungset lheh tauvin ahi.

Keiho lom(company) lah a chu atamjo kolte ngen ahijeh chun a khamul sao ngen ahi in, kahung kidai ji teng ule amahon la seiding hevah jilou kei a kamtam pen tobang kahijeh chun kasei loi² ji in, _”Tuisa jaolou a na opmul tupeh a ka gît diham?”_ tipou in kaki dai jiuvin ahile ka chuti nui poh lah² jiuvin, chapang ngol kabang kit tauve. Koi nungah thu kisei talou ahi. Natong a kache jiteng u jongle keichu thinglhang mi akihi jeh chun  ingaina a gul (snake) imu le kithat jimong ahi. Hinlah kol ho Pathen ahijeh chun katha jiteng le ei ve sal jiuvin, keijong engkhan san in kakigo jin kane kit ji in ahile eihin phin jiuvin, kenjong kale phin ji, _”Tua hi na Pathen u kaneh hija, kahung gilkel ni² le nangho kisan kaneh ding nahi nalai uve. Nangho jong sa hithou²”_ kati ji in ahile eimoh vetden jiuvin, chondan hesa tobang ahijeh u chun totna ngen in kakilah jiuvin kanui khom ji tauve. Training bol tillai a hindi pao ana kihelou, mi bol² ana kibol ji ahin, training lai nikhat dehset chu hindi pao kihelou, sap pa in amaho pao in, _”KUKI. Hiche table khu gatham in lang hung kile in”_ atichu kenjong set² ngailou ka lhaijel a table kandop phei leh ka loihon ei chuti nuisat u, hiche thuho poua chu kaki phin jiu ahi. Tunvang ama hotoh kinel nathei khamset kahin ki hetdoh tan ahile eihin daiji uvin, _”Nangpa Hindi pao het hi genthei aumval e. Apao tho keiho in bon seiding kihe jilou a hoilang a kon’a thu hijat nahin seidoh ji ham? Na val behseh e”_ ati jiuvin, sopi kingailu tah bang in ka um tauvin, keiho camp sungchu nungah kingai lou ahitai. Nungah toh iki ngaileh genthei na le lunghel na atam in, iloi ngaitoh ium le vang nuina le kipa na chuleh lungnop na atam jie. Hiche kahin het phatchun kenjong _”Tua kon’in vang kichih thei tang’e. Ka thoh na hi ka limdoh na hung hita hen”_ katin nungah kiti him² ka lunga aum thei tapoi. Akah lah le loilepai hina a khat le ni tou kahoupi ji vangchun, hitia gaki ngaipi/ki lungset piding mitvet in kana ve thei mong² tapon ahi.

Phone a Korea film hopou kave jiuvin, nungah ho chu _”Kei a nu ahe. Neichu hih uvo”_ kaki ti jiuvin, koima hetphah loubeh in keiho loichu barrack(sepoy ho umna in) sung ‘a chun loichal kibot kana bol ji nalai uve. Ama holoi chula thadol ngen, kagel jile hibang a tha lhasam a sepoy ahung moh lhaidoh u chu ka datmah lheh ji e. Midang honla kei ei datmah ana hikit in ahi. *”Jong in ama mai velou in mimai anuisat e”* kiti chu kana tho dan ahitai. Break kahin neiji teng ule ka phone cheh u kahin kilahdoh jiuvin, whatsapp a nungah ho limpou kave jiuve. Hilai a chun ipi lunggel kinei ji hitam? Chapang cha² ho pou akidei kitji nalai in, *Bongchal teh in hamdong adu jongvang aboi thouve na?*. Ikhan gol kive nom kitlou ma ahi. Tulai khang chedan hi ivet le numei hohi a chapang jong ki hansah kei, pasal hohi la ikum atam chan a kiki chapan sah kit ahi. Hiche vanghi kisei le koiho hamkhat inko in, *singra sunga ahlu um* adatmo abang jeng’e.

Jan leh duty akipoh leh, sunleh natoh ding aum kit ji in, tahsa’n vang ajolel na kom jong aumda poi. Imut na man phat aum beh pon, janlai a JCB kitol ginbang a pasal chujat inah hai noplaitah a koi sollou khat in amuh a ging litlet a whistle/referee… fririiiiiittttttt…. tia ahin mutji chu hachang jat aum ji dan² chu mit sanleu va kiki thouji a mit  ngui jinjen a fall-in kibol ji ahi. Abangloi akhangmang bang a a half-pant seh² toh hung chomdoh kigo loi. Ka thimah jival in, Pu Ngamsei lenna gam film a bang khun a whistle khu _”akamsung a kibeh lut peh hen lang, a imut na kisan a hinmut le phadi”_ kati ji in, ka chuti samset jeng ji tauve. Ki imubep ham itile whistle hung kimut, khovab hitam tia iga potdoh le lha ana vah emsel nalai. Inlang nlhangai aumji lheh e. Inmun a nomtah in kium henlang hile kho helouva mithi lup’a kilum nalai ding ahi kagel le kalai jong ahung naji in, hinlah kaki hanlah ji in, _”Kei genthei jongleng Kanu in nom sahen”_  tin kaki lhamon nah² jin ahi. Kaloiho abang chun, _”Eihon hilai a imumo leuva sum ihol diu. Khulang a iji ichaten imut pum’a bu aneh diu. Anom’e, anom’e”_ gollhang ho chun, _”Koi chanu nopsah na ding’a hilai a hi genthei kithoh diham?”_ tipou in kaphun jiuvin, keichu aninga amaho phun be in anui in kapang jie. Kol ho dehset chu ahto phunbang in rap song saho bang a ahung phun jiuchu vetnom² aumngap jie.

Kanu toh kaki houji tengle ka Sir pauvin _”Koitoh naki houham?”_ tin eihin dongji in, _”Sir. Ka jinu toh kaki houve. Naote tuition fee ding ahinsei e”_ kati jileh _”Oh! Sorry. Take you time”_ ahin tikit ji nalai in, kenla phaje kisa a kaki houpi jouse chu kajinu dan a kisei lha jita. Ka Sir pauvin ipi mong² angai to hita diham? Thilkhat bolding aum pou2 le kei eihin kouta lei². Ei engbol ham? Ei ngailut jeh ham? chula khat pen² hitei ding ahin, a ipi chu hitale kamin hi kounop asah ten hidi dan ahi. Kolte min chula akou hah thei dan², gangchel a kouding itile idang a ilei ohden jita, abon uva kouding hile vangchu ki nilhum maithei ahi. Numei toh phone a iki houle hekei kit nalai u ahie. Nungah ahikhah kalse chu eipao kijil na in mangji uvin tin, seimo na sa² in, _”Boi. Namin ipi ham? Kahin lungset e. Bu naneh tam?”_ tipou sei u vintin, ama ho kichai tengle iki houpi nu kase en kine kit. Nungah akul abang chun eihin houpi jiteng ule, _”Keia ding sepoy khat neina holpeh o”_ ati jiuvin, kenjong kaphin ji in, _”Adimset e. A khamul akengto changei a kailha, meihol sang a amai vomjo jong adimset e”_ kati jile ei nedoh deh² jiuve. Kaloiho abang kom chun, _”Son. Nangvang sum nahao di tahila na? Na ATM a kidol ding hinamo?”_ tipouvin eidai jiuvin, hiche laitah a ka lunggel khatchu ahile, tulai a sepoy pangho hi mi atamjo in, a genthei thoh le a ulsa lonna veta louvin, a ATM a 123 umjat  joh a vetauve ti kahin hedoh e.

Insung hahsa te akihi jeh chun, alen a pat aneopen changei keichung a kingai ahiphat chun sumle pai kimu jong kadei bang’in ka mangcha ngampon, _”Kanu le ka naote a gilkel sang in keijoh in thoh tange”_ kati jin, ka jahding banlai jong kanung hetlut ji in ka insung mite ding joh in kakoi jitai. Kanu in phone eihin bol’a sum le pai  angaichat thu ahinsei jitengle ka lhamon ji in, _”Henu, lungkham hih uvin, bat a lahthei na a ana la inlang, lo kahin lah tengle isah diu ahi”_ kati ji in, ima boldoh loubang a kaki gelvang chun sepoy kahung pandoh a kon’in, insung jong themkhat ahung hingdoh danin kamu in ahile Pathen ka thangvah chim theipoi. Katao ji in, _”Pathen, na lenggam a natong ding’a nei deilhen ahi kahe e. Ka panmun a kon’in nangman na lenggam na neitoh sah in. Dam joulou ding tasa damna neipeh a leiset mihem asang aja kilhaitet na a nei lolhin sah tah a ahile tuni hin, Kanu mitlhi long a ataon a ho nangman kipa na mel joh in hinle in”_ kati ji in, Kanu injong jingkah nilhah seh in keiding in agaoji in ahile ka khut a kachoi, kivenna dia kapoh ka meipum sang in ka Chunnu taona in galmi a kon’in eina lhatdoh jing’in ahi. Leiset a Chunnu ngailutna hi atepi thei thil leiset a aum poi.

Sun khat jong break kanei laitah hin ka ummo man chun ka whatsapp a message ho kave² in ahile phat masa lai a lungset lungtup molso pidia kana kiteppi sa Kikim toh kaki houna lhon kahin mudoh kit in, alim kavet le nidang a kana tuh akhut chu midang in atuh kamu chun ka lhaset valjeh in ka mitlhi kakitheh tai. _”Mil tang’e”_ tia kaki gellhah nung in jong a lungset na’n einung juijing nalai ahi kahe in, hinlah kinepna bei kahitai. Kaki gel chan’in ka lhaset na ahung tam cheh² jengta’n, pasal kahi vangchun kaki gel jile iki lungset pi khat in jidang ei neisan chu kagel in ahile naosen khat Anu in a dalhah a aka bang in kakigel in, gam valai a kachang in kana lhisoh² tan ahi. Janlai huilhi ahung nung’in, lungset thimthu ahin podem? ti in kalung in Kikim bou agel jing nalai e. _”Boikim. Numei lunglhom nahijeh in kahin oimo poi, genthei na joh in eikhen lhon ahi. Hiche genthei na hin na makho a nahin lamto da maihen. Mi phungdang chang hita jongle chun ka lungset nahe jingnai. Hinlah iba ilo dingham? Tuiboh sa kiloh kit theilou ahitai”_  ti in kachang in janlai lhavah noi’a chun alhem ding bei in kamao tan ahi. Lhaset pettah in vang kipana ding igel vang’in ahithei jipoi. Kilungset hinkho kaman lhon lai’a ka umchan lhon kagel ji in, sepoy kapan a kahung kichen joulhon tengle kei suty kichai kakile kon a aka ding dan le ka vailhun a akipa dingdan kana thopeh jiho kagel ji in ahile ka gel jouse chu keiding in lunghel le lhaset kibe na ngen ahijing tai. *Lungset val jong genthei na ahi in, ngaival jong lhaset na ahinom jie. Tahsan behseh jong kipal na ahiji in, kinep behseh jong lonlhi lonna in ana alamto nomji in ahi.* Ki lungset hinkho mansung a ki sonlel kiti hi khenna hung kipat na ahinom ji e. Ki sonlel jeh a keima hinkhoa jong khenna sohkha ahijeh chun kenvang lungset kiti kana tahsan thei tapoi.

Ka sepoy pankhom pi konkhat chu suty potteng le Kolkata a hotel dunga ageh den jiuvin, jinei le neilou thu umlou in nungah helna in akipei chavai denjong aumda poi. Tulai mi tamtah in asei lhangpi chu, _”Sepoy pangho le pehlum(football) pehthem ho numei a alang uve”_ tichu ahi. Hinlah Pathen lungset le venbit jal’in kenvang Kanu taona ocheng kalung a khivui bang in kaching jing’in, keidia lhilong pum’a ataona chun ka kipal na ding mun a kon eina vengdoh jing in, galmi te meichang a kon in jong ei vengdoh jing’e. Ka Chunnu taona mitlhi chu keiding in ka lumle pho thahat pen ahitai. Ka umnau munchu galhat na mun a akihet vangchun keiho umna mun laitah a chun vang galmi akimu beh pon ahi. Kakim kavel lah uva akah le thal ahung gingjap ji in, hinlah chutia gichat na theilom vang aum khapoi. *”Pathen in ka taona asang jingnai”* ti kahechen in niseh in Pathen kom’a taojing chu keiding in lhagao an tuipen ahung hitan ahi. Kikim in ei jinei san phat chun keiding in kilhamon na chu ka Chun ngai mama ahung hikit tan, mihon la adongma toh kihou na in phat tamjo amang uvin, kenvang Kanu toh kihou na in kamang theitan, ka dongma neilai in kinah kiphun na umji jongle tunvang ki lhamon na o ngen ahi tan ahile keiding chun hindan anop jeptan ahi. *BORDER LINE* a um akihi jehchun kiging jing’a um ngai ahi in, Pakistan border sepoy hotoh kaki gal nuisat jiuvin ahi. Aki gicha chu sepoy ho ahi tapon, Pakistan thingnoi hojoh ahinom jie. Hinlah Pathen venbit na jal’in firing katoh khapoi. Duty post le watch tower hoa iga kitun lutchu asan thei dan², Babel insong kisei bepkheh ahi in, ikaltou na le ikimsuh khu ki sim tohchet le pung khat sung moh lut maithei ahi nalai e. Gal hatna gam a gal toh khalou kahi vanghi ka Chunnu mitlhi a kon Pathen phatthei kachan na thupipejln ahi. Jan asot chan in lennagam ngaina in aki mathah den jitan, ivet na jouse chu lunghel nan eibom e. Khennung a nunlui khat hinthah ngaidoh kiti vang, lungthim natna lenloi tah khat ahitai.

Kaki lhep lungmong nading ham? ti in kaloi le pai hon nungah hotoh kihetto sahding eitiu vin, a number ho eipe jiuvin, hinlah kenvang kalunga Kikim bou numei dan’in kagel ji nalai in, chuleh numei jouse chu Kikim mel’in kamun, ei genthei sah a ei lhaset sah dingbou in kamu in ahile dongma neiding kalung gel’a alut thei poi. Chuna ban’a jong, mihon, _”Sepoy hohi numei a alang uve”_  atiuchu keichunga kana lhun sah nom pon, _”numei jouse hi isopi numei banga gelding joh ahi”_ katin, gaki khalah sah ding jong kanom deh kitpoi. Kaloi ho katot ji in, _”Eiho loi ijinei uva mi chanu genthei nadi bep. Lungmong in la ki umpi thei pontin, phatseh a ei lhangai a aumdiu kagel le kenvang ka pojou hih e”_ katin, Kikim in ei jinei san chu keiding in kihil na le khahdoh na lentah ahung hitai. Ajehchu, lungmong a ka lenkhom pilou jeh le akom a kaum theilou jeh a ka dinmun ding midang khat in ana lodim ahi chu kalung in keidin mit hadoh na ahung hitan, hijeh chun Kikim jong kamoh oimo nom tapoi. Keijong kaki oimo poi. Ajehchu insung genthei jeh a maban hinkho ding gelna a kalsong kahijo e. Tuchan in kipah tah in gollhang hinkho kamang nalai in, Pathen in pha eisah peh henlang, Pathen ging numei. Kanu le kapa ngailu ding khat kimuding hi kataona ahipen’e.

               “`THUKHI NA“`
_*Ihinkhoa thil hunglhung jouse hi ase jong apha a ilah le thil phatah asoh in, na lahkhel le vangam nakai na ding jong damun najotna ding lampi hikha thei ahi.*_

_*Nungah-gollhang ki lungset na sung’a hi ki sonlel kiti hi aumding mong ahinai. Hinlah, kitepna palkeh kiti vang, vangphat nan ajuiding hi koima tahsan ahipoi.*_

_*Insung genthei jeh in vah chavai kigo hih in, na insung genthei na kibe ding ahi.*_

_*Lhaset na ding atam’e. Hinlah, ikim ivel’a hotoh chamdel a ium teng kipa na loupi tah eilhut peh jie.*_

_*Kinep na beibang a hinkho naman teng, na Chunnu kana le na Pathen lainat dingdan gel masa in.*_

_*Panpi bei a naki gel tengle, janlai a mitin kilhep na chung chollha khu ve in, amacham a vah ahipoi. Nisa vah joh in a*_

    *||      ••• BORDER LINE •••      ||*

_*”Kei kadam laise’n Kanu genthei ponte”*_
        *••••••••••• PART-II ••••••••••*
_(22/02/2019)_

_By_
_*TangpaMinneo*_
_______________________________

“`Based on true story of a brave KUKI army across Indo-Pak border.“`
________________________________
_*so masa banjom*_
_(……ka chuti galvet jingkei in ahi.)_

Inmun kaga lhun chun Kanu in eihin galmu a konin kipa mel pu pum’in eina veve tan, kenjong Kanu kamu chun ka genthei naho jouse ei haimil sah jeng in Kanu chu kakoi in chibai kaki bol uvin vailhun maicham kasem tauve. Khosung chu kavet le lamdang kasa lheh jeng’in, sotthim pi ka dalhah ahiphat chun kavet na jouse chun ka neolai a kana lenna ho ei thah geldoh sah in ahile ka lungjong ahel ngap ji in, alangkhat a kaki padan vang, Pu Mithun Jangpao dialogue kitho le, *Wonderful society* ahijenge. Kikim melmu kal kangah lel lheh in, nilhah anneh jou hin kaga vahlut tan ahile kidang asa val’in kamka leuin ei chuti vetden jengta’n ahi. Kenjong katot in, _”Thilha neihisah ham? Nei chuti vet. Ka hoithim ham leh?”_ katile khatvei eihin chum in, _”Nahung ding nan masei le nathi diham?”_ eiti in, kaki dai lhonin phat sotpi tah kimu lou sunga lungguh a um ho jouse chu phat chomcha sungin kahin seilhon tan ahile kipa le lhaset kakop lhon tan ahi. Lhavah noia ingaipen toh lungset thimthu isut khom vang, kya baat hai? ahijenge. Eihin daiji in, _”Heu. Kolpao nathep di ta hio na? Nache masanga chula khatcha bon helou a. Naboi didan na?”_ eiti in, kenjong, _”Kei kaboi naisai hih e. Amaho joh aboi bouve”_ katin ahile lungdong pum’in, _”Itidan a ong?”_ tia eihin doh kitchun, _”Ken eipao kitho jichu”_ katile achuti nuiden jeng’in, akipa danchu kavet le keijong kakimoh papa jeng’in ahi.

In kale lhun in Kanu toh kaki hou lim in ahile kenjong ka umdan hou kasei oeh tan, Kanu in ajahdoh chun mittol leuvin eive in, _”Boi. Damsel a nahung lhunhi aphaset ta e. Aban a vang cheda jengta’n. Kagel jongle ka hithei hih e. Na damthei loutoh; na tahsa jong agong mong² ta e. Cheda tan”_ eihin tin in, kanung cheding chu Kanu apong nop tapon ahi. Hinlah Kapa in vang, _”Son. Kol thabei ho khujat in bon jouva iti *KUKI CHAPA*, napa in chapa a nahin, nangin najolel diham?”_ tia eihin tilkhou phatchun kalung ahung len chom dehset in ahile ka genthei na jouse haimil in ka masang a thing le song ijat umjong le pallhu ngapcha in kahung kithah gellhah kittai. Hichun Kanu kale lhamon in, _”Henu. Tua ka gentheina hi phat khatteng le ibon chauva inopsqh na diu joh ahie. Ipi na lungkham ham? A hahjo lai jojse kijouta hila. Saipi khubang a len vahjou pa, Pathen in eiho a ding in ima it ponte.”_ ti in Kanu lhamon le keima lhamon toh kop in, kipah tah in ankong kasoh khom tauve.

Mihem hin ikim-ivel a umho lunglhai na a iumdoh tengle mi phatthei na kichang ji, chuleh maban a jong genthei na le hahsat na tampi akipel thei e. Hitobang chun kenjong training kajo na kipa melchih na in khosung a tehse, achatmo ho jouse ka koukhom in, kipa ankong kasoh khom uve. Miho nuisat in um jongleng nikhat tengle vang Pathen in eihin tundoh ding kaki tahsan thou nalai in ahi. Kanu le Kapa in keichung a kinep na anei lhon mansah jengding chu kana nom thei him² poi. Hiche kingon a hung lha jouse chun kipa na leh phatthei bohna einei uvin, sum le pai neijeh a kabol ana hipon, hinlah ama hoa kon’a phatthei na kachan chu leiset a Kanu le Kapa ban a kanei ho ahung hitan, ka masang a kajot ding lampi jouse eiki vatngim peh abang in, gah kisei le hiche pettah a ama ho phatthei jal a kaki son dan chu IAS exam bolleng ka pass ding changei khun kana kisong leuvin ahi. Kalung among mama jengtan, hinlah kalung a hung kilang kit khat chu, Pu Ngamsei ham hile, _”Ka lungthim in ponkkk”_ ahinti in, hilai a kagel doh chu ka insung uva ka upa teu, ka *sating* sena ding te ahung hitai. *KUKI te* khankho chedol a chu *”Upa te iiki suh lunglhai loule vangphat na akichang poi”* tichu kahin geldoh tan ahile gangchel in ka hin kou tan, upate toh ankong sokhom na khat bolding in kahin gong tauvin, phatthei kahin kithum tai. Sepoy kahung pandoh chu ka insung titah lou ka upate jeng in jong eiki papi lheh in, _”genthei na chung nung thoh a ei panpi ding bei a hitam?”_ tia kana kigel lai a ei ngailu kana neijeh in Pathen ka thangvah e. Hiche nikho a ei phatthei boh na chu tua kagel le gimnei kasa lheh jeng’e. Agimnei e kati chu aselam hilou in, ngailut na chungnung a phatthei eiboh chu katijoh ahie.

_*”Lengvai; genthei; puldou pa. Chungmang Pathen in phunglai a gobang mânsah o. Gobang mânsah o namtin phunggol jalai’a. Jaitha phalbang hamsah o”*_
tin phatthei eiboh in ahile Chung Pathen kom’a phatthei eithum peh chun tuni chan in katha bei nile ka tha kidosah in ahung pangpeh e.

Sepoy training kanei na sung uva bon kahin kipoh jouse chu khosung a mipa ho, ka insung a kaki naipi jep² chuleh keiho banga loubol a kivah mipa hochu kape in ahile akipa thei dan² u chu kavet le ka hinna akibe dan in kaki gel e. Ajehchu, *”Gul chuhlou in gulgu ahepoi”* akiti bang chun ka genthei lai uva ipute khat in von se dehduh hijongle eihung pehji khu, koi branded von mantam tah² eikipe sang a ana kikipah jo ahi. Hima bangchun a kipa dan u chu kavet le kipana mitlhi along leuvin ahi. Pathenni kaikhom ni ahung lhung tan ahile keijong ka thanop na lamkhat chu music ahi in, guitar kan kipah a la kahin lamkai chu tulai paovin kisei le _*adan dan*_ kium thou ahe. Houbung miten ei kipa pi theilheh jeng uvin, damjou talou ding’a ana gelpau chu tunin vang damsel a sepoy pangthei kahi tahjeh chun abang in kidang saval in eimoh vetden jong aum da pouve. Houin kakai sung u chun mipa themkhat kavet le sepoy von kapeh ho houin a hin kivon lut loi kamu in, ka lungthim a kaki moh papa jeng tan ahi. Pathen ka thangvah in, _”Pa. Ka hinkho ana mangding tasa tunia damsel’a ka khosung mite chunga thilpha boldoh theiding a neikoi nalai jeh in namkn ka thangvah e”_ tin Pathen kom’a kipathu kasei chim thei tapoi.

Topic gahkhel kit leuhen: Kikim toh kaki lungset na lhon jong phat asot tan, lungtup molso ding kagel tahvang chun ka insung mite in vang phat vat asa nalai uvin eina phalpeh jep nai pouve. Kikim in jong lungtup molso a inchen semding lunggel aneitan, hinlah ka lhamon ji in, _”Tua eini iki chen a itih kah a iumkhom manding hina ong? Aban a suty kahung doh tengle katu le kabe kahin kipui a kahung thumdiu nahita e. Ana kigong jing o.”_ katile ama jong ahung nom ham² in, chomkhat sungbou ingai toh lenkhom phat aumjeh chun ka phat chu chom kasa lheh jeng’in ahi. Phalbi nilumko leh golngai kom’a tou koiba chim ding ham? Ingai khat kom’a itou le phat chelam helou in, jingkal anneh jou’a kitou bep ham akiti le nilhang kaiphat ana hijita. Niseh a touthei beh hile ka lungdam dom di hija. Sepoy holiday hung kihung doh vangchu ichenom na ngen, ibol nom ngen, isei nom ngen, imu nom ngen. Hinlah, koipa hamkhat ham hile, _*”Kabolding tamval a kamoh imut² ahitai”*_ atidan chun keijong bolding pen kahet jou tahlou jeh chun inmai a kakimoh tun ji in, atamjo in vang, kalungset Kikim toh lungset thimthu sut na in phat kamang ji in ahile adang a kaman sang chun mantam kasa lheh jeng’in ahi. Ilunggel a isei nom chula asang aja, sim joulou ahijeng in, hinlah kamcheng a seidoh ding chu lungmol le kammol keiding in a hahsa lheh jeng’e. Loile pai lah a totna isei le seiding ei kipe be akibang ji na in, hinlah Kikim kom’a kaum tengle akingai kahi lhon vangchun akah lah le ka jachat jilheh in, kana moh kitunden jitai. Sepoy training chaipa; nungah khat kom’a ima seingamlou pa kakisoh doh jitan ahi. Hinlah lungtup molso dia kitepsa kahilhon tahjeh in lungmon na kanei in, ei lungset na ka tahsan jing’in; ka songlel thei poi. Holiday hungdoh kitteng le lungtup molso ding in kaki tem lhon in, nop le da kibang in ka tohna ding mun *BORDER LINE* Jammu kahin jontan ahi.

Kache ding kon’in Kanu in ei vailhah in, _”Boi. Nahung kile ding kana ngah jing’e. Damsel in hung kile in. Pathen in tidam-ludam na nape henlang; bitkei in napui jing hen. Nidan seh in na Chunnu keiman Chung Pathen ang’a kahin taopeh jing nai”_ eitin taona pumin eihin soldoh tai. Alangkhat a Kikim in ei vailhah in, _”Heu. Chedia vang ka phallou nahi. Na jotna ding munjong galhat na mun ahikit in, kamoh tijat e. Na hung kile a ikitep na bang a lungtup molso ding nikho le phat ho ngah jing ding kahie. Heu. Hung vangpha’n o.”_ tia vengam loujen a ei lhah chun kenjong ka pasal hina jouse alengmang abang jeng’in, hiche nichu Kikim kangai na a sang dehset e. Leiset kikhen na gam ahijeh a kikhen louthei akihi louphat chun kenjong lunglhai sel le mailhai sel in ka lha in, damsel in kimu kit kahsea din mangpha hoipen kathot tai. Lunglen ana e. Puldou hi koi kapeh ding ham? Ponsil bang a lheh le thei hile kana ti lheh e. Khosung a kapi-kapute, chuleh chapang gei in chibai eihung bol uvin hah lheh jongle thoh ham² in ka nu anglum lai dalha in genthei na gam kahin jon’e. Oh! *BORDER LINE*. Ka lungthim a kakitep in, _”TAHCHAPA! Pasal hin’a hingding, pasal thia thiding kahi”_ tin kasei in, Kanu in ei vailhah na kamcheng haimil louvin ka malam kahin jontan ahi. Lunghel vang aumlheh e. Kanu toh kihou bang in kaum ji in, _”Henu. Pathen in eiho dia agon ahinah le, kahung doh kitteng, keima bou hitalou a ka rank toh hung vailhung ding kahi. Na vonchoi, keima neihin taopeh jing in o”_ kati ji in, Kanu lhangai na leh Kikim ngaina in kadim in ka vangkho jol ngai jongleng ngailou bang in lungsung lonlhi pumin mitlha det² in kahin dalha tai.

Huikong(aeroplane) a cheding katiule sum lutval ding ahijeh chun train joh a cheding katiuvin kahung kipan doh tauve. Kaloi ho anal cheh ho ma toh chun kahung kisuto kit tauvin ahile a jat² kan boldoh be kit tauve. _”`Train lah a homo(pasal, ki numei sah) atam’e` atiuchu. Ki chih thei tau”_ tin kahung kilem pan kit tauve. Ki dah lele jeng, homo ho hol lele kibang, jun sohlou pum’a homo hoa kon’a kivendoh na ding’a ida-iduoi a toilet a kikisel ji; akah le toilet a umding kaki chutho jiuve. Mihon ei chuti nuisat u. Keiho la jong ngol kilhadoh kibang kitjeng ahi. Train hung kikham na jousea kakum kigo tei² jiuvin, train toukha la koima kana umkit lou u, ka lamkai pauvin eina holmo jiuve. Kahung kihol mo teng ule mi chujat lah a chun ka o lheh² uvin kahung kisam to jiuvin, _”Oh! Nangpa. Hoilang a vah mangkei nahitah eimo?”_  tin kapeng jiuvin ahile miho chun ei chuti vet jiuvin, ka lamkai pau khutgu kane deh² jiuve. Hinlah ei hethem jiuvin, ama nung chu ei chuti jui lele sah jiuvin ahi. Anneh dingphat ahung hiteng le keiho le keiho kahung kilhem kit jiuvin, “Hilai station a hi thinglhang mi tampi ana thakhah u ahi” kati uvin ahile bune a chesoh ngam kaum kit tapouvin, train sung a chun gilkel kachuti thoh jiuvin, koima engbol louvin kana genthei lheh uve. Ka lamkai pauvin ahin hetdoh phatchun eihin hil uvin ahile keiho chu kaki vesal to uvin, amoding la koima kinom kitlou; nomtah nehthei ahi kahet phat u chun kaki khodh jel uvin, oi pohkeh deh² in kaga ne tauvin ahile hindan ahung nom dom tan ahi.

Kahung toujing lai uvin station khat a nehthei choding a kaga potdoh le mi genthei, in le lou neilou ho kamu chun ka voujang ahung na in, *slum area* kitia amin a kajah ji chu kamit a kamu phat in kavejou tapon, inchen genthei jeh a hahhsat na tohsa ke’n aguh in kalhi kana kitheh tai. _*”Leiset a a lengvai pen’a kana kigel laijin, keisang a lengvai ho kamu teng. Pakai nei ngaidam in”*_ tila khu kalung a ahung kilang in, _”Oh! A genthei pen kahi hitam? Tia kana kigel lai a jong keisang a genthei jo ana umdan hila na?”_ katin Pathen ka thangvah in, ama hodin jong katao in ahi. Ka neikham2 chun sumle pai kanei hochu ka hoppeh in ahile akipah theilheh jeng uvin, keijong ka hinkho anom chom lheh jeng’in ahi. Genthei te genthei na chu genthei te mama in ahetthem ahi mai e. Manipur khel khalou ngen kisuh to navang chu ipiba isei tahdiu ham? Min poison nehding in hinjoh jongle kicho jengding bang in aumdoh e. Gilkel dangchah nikho hunglhung jongle thoh ham² a, panla ding’a kalsong kana hitah jeh chun min ija seihen lang, thuboi jongle ka Chunnu taona jal’n ka machal jing in, ka lunglen nikom le ka lungset Kikim kagel ji in, inlang lhangai na’n kadim lha jie. Hitichun kahung kitol² tauvin, _”Lampi jongchu asao tave. Koi chapa sem hija hichan lom² umham? Leiset kichai nailou hamo?”_ tin kaphun lhung kei in, totna jat chom² kasem khom uvin, akah le uicha ki tehlih bang a kho helou train chung’a a ana ki nah hai jitan ahi. Imut nopdan vangchu kho kihelou, sappao a seiding a chu _I don’t know village_ ahijeng’e.

Phat chomkhat jouin Jammu frontier kaga lhung tauvin ahile kalung akidang lheh in ahi. India gamsung a dia *BORDER LINE* kiti jongle gal tamna pen mun ahijeh chun ka gicha ji in, hinlah alhung pan kahi jeh u chun chomkhat ei kichol sah uvin, hinlah hilai muna lamkai pachu agilou thim in ahile ei masa jep kit uvin ahi. Ki ngailu tah a hung kilhon, thinglhang mi ho jouse chu ka posting mun u achom cheh ahung hitan, hijeh chun kaki lhalel lheh jeng uvin, nupa kikai khen kigo kabang jeng uve. Inlang akingai leh, idongmanu akingai leh, tua iloi ho toh kihen kit dingchu, Ahah e! Ahah e! Sepoy hinkho vang. Hilai a chun “`Indo-Pak border“` veng dia lhendoh khat kana hitah jeh chun ka pummei choi in, ka duty post mun a ka chetai. Jingkho ahung vah le nilhum ka ngahlel jin, nisa ahung lhun tengle khovah kal kangah lel lheh ji in, nikho kahin sim jingtai. Gal hatna mun a um akihi jeh chun kiging jing a um angai tan, Humpi sachan bangin niseh in galmi ho a kon a ka gamsung mite vendoh dingchu kakin thupi pen ahung hitai. Gichat na jeng ahitan, itih ithi-ihin sei theilou khop a hinkho mangding a kalsong kahi. Gamdap ahikit jeh chun akah le imutso aum dehset ji in, koi duty poh malah in, _”Ki imu jenghen o? Nanop le thi uvin. Mihem vat dan² a”_ tiding chu lungjat aum lheh jie. Hinlah igamlei ventup na ding a pan la akihi jeh chun ipasal hina jouse podoh in kapang jingtai.

Nikhat le phat chom cha² bou phone aki choiman ji in, hijeh chun lungmong a idei chan seithei na phat aum behseh poi. Ihoupi nomngen kihisah ji; miss call imule red card eiki vetsah kabah sah ji in bannei cha in kahin call ji in, shortcut in kaban houpi ji in, achain a phat saopen chu Kanu chuleh Kikim houpi na in kamang ji in ahi. A o kajah ji tengle kalung ahel lheh ji in, chapang ka a kading chu lungjat aumlheh jie. Hinlah, numei akaleh alhemding pasal akihi jeh chun akipa na ding le alungmon na ding thuho bou kaseipeh ji in, phat ahung chal² a lungtup molso na ding phat ahung lhunding ngah jing pum chun ka ngaipen Kikim toh thu jat chom² kaki houji lhonin ahi. Inlang a kon’a hung kile bep akihi vangchun aban a inlang cheding phatchu aki ngah lel pai kittai. Anne joubep a akhut kisil pet’a _”Kagil akel tave”_ tia seipa dan chun inlang hungdoh bep pachun I lang chekit ding kangai lheh tai. Ka lungset melmu kal kangah lel lheh jeng’in, Chunnu pheichung a samang jal lai nikho ho kangai lheh in ahi. Deibang a houpi jingthei ahilou phat chun ka phat neisun² tengle ka seiding ho alomchang in kamoh seilhah ji in, amaho hamsah manlou in kana lhajie. Lhavah noia duty ihin pohvang chu lunghel le gichat akikop lha jeng’e. Inlang a insung mite le lunglai rose akigel toh *BORDER LINE* mun a galmi ho vettoh ahikit le lunggel chu apol lah² in ahi. Nikhat hi Kikim ka call le busy atiden tan, ka phat neisung chu ama busy call ngana in ka mathah den in koima jong ka houpi man tapoi. Ajing in ka call kitleh busy atikit in, _”Aboi hinte. Hinsei nalou diham?”_ katin jing nikho kangah kittai. Hinlah donbut na kamu dehpon ahile lunghan le lungdon na in kadim tan ahi. Kanu ka call le ka call dohjou kit pon, chomkhat jou hin Kanu in eihin call in, _”Boi. Nadam hinam?”_ tia eihin dohchun kenjong kipah tah in, _”Henge. Henu kadam na e. Pathen in tuchan eipui nai. Henu. Nang taona jal ahie”_ tin kaki houlhon in thudang ima seilou in ka cut pai lhontai. Jing nikho nga kitma ngai dan ahitai.

Jingkho ahungvah tan, jan imu moleu a kanga phat ahung lhungta’n phone ka chan² chun gangchel a ka switch-on le Kanu in eihin call pai in,
_”Boi. Kikim thu najah hitam?”_ tin eihin dong’e.

______________________________
*•••••••• END OF PART-II •••••••••*
______________________________

_*Aban jing nilhah a ding in kikoi kit taute.*_

*Pontho tah a neihin simpeh jeh in nachunga kipathu kahin sei e. Chuleh, thusim chungchang a nasei nom/dohnom/comment nabol nomle anoi a number a khu kihou jingthei ahi*

*KAKI PAH E*

_Keima_
_*TangpaMinneo*_
_(+91 8131046031)_
_______________________________
_*Copyright © TangpaMinneo 2019. All Rights Reserved*_

*||    ••• BORDER LINE •••    ||*

_*”TAHCHAPA! Pasal hin’a hingding, pasal thi a thiding kahi.”*_

       *•••••••••• PART -I •••••••••••*
_(21/02/2019)_

_By_
_*TangpaMinneo*_

______________________________

“`Based on true story of a brave KUKI army across Indo-Pak border.“`
______________________________

“`Introduction-“`
_Hiche *BORDER LINE* kiti thusim hi eimi, TAHCHAPA khat hinkho thusim tahbeh a thilsoh ahi. Thusim in atup le adoi pipen chu ahile; inam sung uva sepoy pangho, gollhang hihen lang, jinei-chanei ho hijongle, genthei athoh nahou le inlang a Anule apa, aji acha te a lhangai dan ho hetthem ding;chuleh namsung a sepoy pangho jouse jabol ding deisah ahi. Na dongma pa sepoy pang ahile nang lhangai a hinkho aman dan ho hetpeh ding gel in, na jipa sepoy ahile, nang le nachate nopsah ding dei jeh a a hinkho aphal geldoh jing in, Henu teho’n jong nacha te sepoy pang ahile Henu, nang ngai a vacha nou api lhangai a akam akah a apen khu geldoh u hite. Gam nompen a jong ichunnu toh umkhom ding ki ngaicha ahi. CHUNG PATHEN anga taopeh jing in._
__________________________________
*Ka hinkho thusim chu hiti hi ahi*

Keihi kaneova kipat a mi veise, damtih neilou tobang kana hi in, ka chennau Chandel district lang, kakhomin u vang hinsei da tang kating, hiche lai a chun thinglhang loubol a ahcha bang a kithai lele a mu masat neh doh masat kithoa hinna theiding lampi hola hung kivah kahiuve. Niseh nehding kihol thu le jingson janson ding ki maimo jen a genthei tah a hung khosa kana hiuve. Kaneo laichun lou kakon na uva damthei na in eina kikhen kangpi tahjeh in eihin podoh uvin, kakho mite in jong, _*”Soson* (keimin)_ vang, a damdoh ding tahsan aum hih e”_ tia mihon eina gel u mikhat chu kana hie. Lekha jong mibang in munhoi a kana sim joupon, kathi-kahin sahmo leuva umpa chun, Pathen thilgon jong hintin, aham² in class X kana chai in ahi. Kamang jengjong ana nomthei tapon, jankhat kamang in jong uicha khat in ka oi eipe peh in, kaloh asoh jingtan, kahin dingchu kei le kei jong kana ki tahsan thei tapon ahi. Keichu in a kachang a dalhah thei kahilou jeh chun loua naosen veding in ei na pui jiuve. Akah le _”Athi ding kahi hitam?”_ ti in tija tah in malam hinkho ding gelmo leuvin hinkho kahin mang e. Keiho hi ucha tamte kana hiuvin, hiche na kikah chun insung mipa, Kapa jong ana damthei kitpon, genthei kiti jongle, totna in kisei le *agen a kikhai* chu kana hiuve. Thinglhang loubol akihi jehchun genthei tincheng chu mitlhi pumin kahin thoh in ka hinkho chu kahin mang in, _”Jinga kathi dingham? Thai a kathi dingham?”_ tia lung gicha det² a Kanu ten eina tijat pi khat kana hi nalai e. Kaloi kagol ho chula, mi damthei hitauvin tin lhaile chople kitiho jong ana hat uvin, keichu mi nungdel in kapang jingtan, chapang kana hivang chun gellou ding tincheng kagel khom ji in, _”Pathen in hitiding a eina sem ahidem? Keijong kaloi-kagol ho bang in lhaile thei ingting hileng kanom tangeiye”_ tin Pathen koma kana kiphin ji in ahi. Dammo jalkhun a kana lup jing laihin ka Chunnu keiding in lhilong pumin atao jin, ka khahdoh a Kanu kamuji tengle kalung among jin, hinlah a mitlhi kamu ji tengle seiding helou in keijong kamoh lhiso jitai. Pathen in ka Chunnu taona asang in, thinglhang a loule ai, thingna-louna a kisem damdoi hochu Pathen in amanchah dan eihin hetsah tauvin ahile hichea konchun aban² in kahung kijen in themkhat vang kahin ahung nopjen tan ahi.

Class X kajo in jong tahsa damna in ajolou jeh chun lekha simna ding chu keiding a lampi kikhah abang jengta’n, ana damthei tama jongleng insung dinmun in vang ana tah joulou him² kana hikha kit e. Kakigel le kalha jong ase ji in, hinlah, _”Kavang le ham in atah joulou hitante”_ katin kalhi kaki theh jitai. Phat ahung chal² in hoilang a hungkon hiding ham? Sepoy kilah dingthu kaja in kenjong ummo man tiding ham? chun ka class X document ho kakipoh in, sepoy kila ding in kache tan ahi. Kanu in eina song pon, keima tahjong kana kisong pon, hinlah kaloi ho bol man chun thanop manin kaga jaotan ahile kahung lhaidoh jeltan, _”hiche vang kachunga Pathen thilgon mong² ahi”_ katin, kalhaidoh chun Pathen ka thangvah chimthei tapoi. Medical hung kivet dinghin kaki khoto lheh tan, a itih a ana damthei loupa chu medical a ka sochat dingchu *Van’a ga* kisei bepkheh in kagel in, hinlah Pathen kom a katao in, _”Paa. Hichan neihin lhuttah a ahile aban a kaki maito piding a jonghin nangman nei lamkai jeng’in, nakhut a kakipedoh e.”_ katin taona toh tho in kahung kive tan ahile ginchat khellam peh in Pathen in kataona asang in medical jong kahung pass kittai. Pathen in manna nom einei ahi kahe mong² tan, hichun kenjong tin le ha tho in kahung pang tan ahile genthei te Pathen in keiding in lampi ei honpeh jingtan, taona in ei mapui jingpeh in written kahin bol jongchun ei kithopi ding mi Pathen in eipe jingpeh in kahung pass doh tai. Mi asang aja lah a lhendoh khat kana hikhah chu kakigel le keile kei jong kana ki tahsan jou jipoi. Khosung mihon ei datman lheh jeng’in, _”Son. Nang nahungmoh lhaidoh vang. Patjang a sel kikai abang e”_ tin adai toh kopin ei kipapi theilheh jeng uve. Kanvang imajouse Pathen thilgon lele ahi kahe chen in, Kanu injong eihil jingin, insung genthei kahiu Pathen in ei hetthem uva keiho dia ki hinso na thei lampi eihin komu peh u ahi danho le ka malam hinkho kajot dan chu taona toh tho in eihil jing in ahi. Recruitment kajo tah vangchun ka potdoh dingchu Kanu in ei song joupon, inmai khokhel khalou pan gampam ka chotlut dingchu agel le eina lunggim pi mama jeng in ahi.

Hitia mi genthei tah khat kana hivang chun gollhang khat hina in kilungset pi Kikim kiti khat kana nei in, sepoy pangthei ding dinmun a kaum ajahdoh chun ama jong akipah lheh jeng’e. Kikim hi kisei le mingou ahi in, thao behseh lou, gong behseh la hilou; mihon ima in eigel peh hih jongle keidong in ka lungsung lengnu, *lunglai rose* atiuchu anahie. A gomsop in kisei le nungah melhoi tah, gollhang ahel ding kichutho hokhu ahi in, ama lungset kachan theichu vangpha kana kisa lheh e. Vangset na khat a kana vangset vang chun ei ngailu ding mihem kana nei nalai in ahi. Hinlah mi lungneo kenvang kana songlel lheh jie. Chomkhat jouin calling letter kahin mutan BSF a ding in kahung lutdoh tan ahile kanute’n *BORDER LINE*, Jammu, gal letol hatna mun a cheding kahijeh chun, ei lunggim pilheh in, hinlah malam hinkho a dinga kagel jeh u chun nomleng daleng _”Chelou thei kahipoi”_ kati in, kahung kigong doh tai. Kache konin kanunin eina hilin, _”Boi. Kol le vai lah a umding nahi in, mi muset na nahin toding chula hetsa ahi. Hijongle mitoh kina-kibou hinbol hih beh in. Insung genthei na kilesah ding nang nahitai”_ atin, ka damdoi ding eigon peh in taona ocheng in ei lhadoh tan ahile lungmong sel in kahung vaikon tan ahi. Training bolding a kache ding kon in jong ka insung mite ka lhahlel na ban a Kikim ka lhahlel vangchu, ohe! Ana val e. Damsung a kimu kitlou ding bang in kana kigel leuve. Hinlah chelou thei kana hitah loujeh chun ngailheh jongleng ngailou bang in kinungheilou beh in mitlha det² in ka penna vangkho, ka Chun le Jo, kangai Kikim dalha’n training nading mun Jharkhand a ki report ding in genthei na dingmun kahin jontai.

Kapen til’a kipat Manipur khokhel khalou pa chu mi jalah a angol kabang jeng in, thu kisei la kisa jouse chu kahet khatcha ajao tapon ahile ka dah lele jengta’n ahi. Mi thilbol jouse chu ase-apha helou in lamvet in kave den ji in, akah le kanuijong ahung ja jie. Northeast langa hung kipan hochu kaki ngailu dehset uvin, Bengali holeh kolho chun *Language problem* tin eina noise lheh jeng uve. Ama hon la ima a eimu lou, keihon la ipia kigel chom dehlou. Kaki nah lom² louvang u chun kana kimu nom ji pouve. Inlang a kahin dalhah Kanu le Kapa ho houpi na manphat jong kana mubeh pon, ahile ka lunghel na akibe cheh² jeng tai. Neh le chah ahung kikhel leh, inmun a inu angsung a naosen banga idei chan kiki thum a kiki phinji nalai ahi in, hinlah hilai muna chun ei le ei kikhohsah na ahung hitah jeh chun ka genthei na ahung kipan tai. Buneh ding akiti jongle bu a simthei la hilou, anchang khu thethu pou kine ji, inlang a ium le la bu man chet² kine ji ahin, inlang ka lhangai lheh jengta’n ahi.

Jan imut na manphat la um theilou, dan le mol nuia kium ahijeh chun munkhat ibol khel le tollai a kiop a inop ida kibanga gotna thohding hikit. *Kuki chapa* kahina lungchang podoh ding ana hipou² leng thingkeh pah lah² a kijep tona thei tahbah ahie. Eimi thinglhang a kon a hung kipan jong atam lheh in ahile lung mon² aum in, adehset in Manipur a kon’a hung hochu ki homtho tah in nupa ki lhalel kabang jeng tauve. Manipur a iumle meilhei hotoh akah le uilekel akibah ji vangchun, gampam a kisuto kahi phat u chun kakimoh ngai jeng uvin, tuile nga kabang kit ji tauve. Lunghel nan kadim uvin, inlang ngai ngen kahi jeh u chun, kei lunggel bang a kaloi le pai hon jong agel ding kahet jeh chun atot in kahung pang ji in, _”Loiteho. Ipi na lunggim piuham? Hilai a hi training a hung ihi pouve. *Pasal khompi mang* a ihung u ahibouve”_ tipou in katot jin ahile kaki moh nuisat ji tauvin ahi. Pasal seh² um kana hipou vin, numei jong tampi ajaovin, lupna gena achom² in eibol peh uvin, kaki muto jiteng ule ki ngailu tah in kaum jiuve. Pasal hobon chubang a ki lunghel jichu numei ho chu *seilou a mâng* ahijeng uvin, kenjong kaga totji in, _”Hibang a melhoi thei uva ipidia sepoy pentah nahung lhai u hamo? Nangho vang, pasal lahlou sagi sangin na mantam jouve”_ katin kadai jin ahile eina ngai thei lheh jiuve. Milah a atot a pang akihi jehchun loile pai hon eina ngaithei lheh jeng uvin ahi. Kaloi ho abang chu dongma nei a ainko ten a deisah lou toh, training kichai a kicheng ding a mouvon kichoh loitoh adim jeng uvin, keila ka lungset Kikim bou kachuti gel jingtan ahi.

Ohe! Training kahin bolpat u chu ipi kisei tadi ham? Ineolai a *sepoy* akitile lupmun a summu ding dan a kingaito chu atah a kahin thoh chun a hahsat dan vang, meidil a kium abang jeng’e. Jan la ki imu kha talou, imut phat ahitai tia imu dia iche jongle iki gelna a iki lhim laitah le mi hin koudoh kitji nalai u; van ivet le chung a chollha la vah emsel nalai. Hiche nuia chun ei kilih le sah jiuvin, bon lhoh lai hijongle _”*Bol’in*”_ akiti kalse chu ida-idoi a kiki lih jeng ji ahi. Mi veise ma akihi jeh chun hitia kahin bol² ule ka damthei nan ahin jou tapon, ka natnan eihin phah kigot phat in Kanu in kahung ding kon’a lou eisem peh ho chu kane ji in ahile ka phadom jin, lhai le chop kahin bolteng ule ka dip ahung nadoh kigo jin ahi. Hinlah kathoh tentun ji in, _”Nikhat teng ka ulsa lonman kamu teiding ahi”_ kati in, ka dip kakisip in, kahung pang ham² in ahile atamjo kahin jou tauve. Ka tahsa la akemsuh cheh² tan, bule me la akineh vanga oiva na thei ahi kit pon, ka damlou thu hin hedoh kitleu la, inlang a report chekit le ka fail del kit ding ahijeh chun ka thoh ham² ji in ahi. Phat ong kanei sung a ka inko te toh kaki hou tengle Kanu in, _”Boi. Naphat² hinam?”_ tia eihin dohji teng ule guhthim in imitlhi aki theh ji in, _”Henge Henu. Ima katipoi. Ka damsel e. Anop a nom ahibouve”_ kati jin, Kanu joh kale lhamon jitai. Ajehchu ka genthei thohdan thu jale ei nungkou nomding ahijeh chun kasei doh ngam ji pon, inmun a hibang chun kithoh le ki eujah jeng maithei ahi. Hinlah ka lung in, _”*Kei kahin laisen Kanu ganthei ponte*”_ kati in kakha kapet in kahin thoh tun² ji in, ka lunga kei le kei kaki hanlah ji in, _*”Ganthei thoh ding hena sa a kalhen”*_ ti in tin le ha tho in mitlhi lonni tamjongle keiman kana kitheh jitai. Kanu kangai leh, alangkhat a Kikim kangai leh, hinkho vang nopna him² aumpoi. Jan choldo phat kisan jong, lupna lingnei a imu bang in lunggel na in aki mathah den jitai. _”Kikim hin ipi lung ana gel tadeh o? Dongma dang ana nei kha tadem?”_ tin kana lunggim lheh jin ahi. Hinlah Pathen koma ka taokop jing in, ka masang lampi kahin jot jingtai. Training laitah a meipum kapding ahung kiti jiteng jongle kqdoi le tup nalai tahchu Kikim mai danin kagel ji in, kahin doi tohchet a kahin kap jichu, keichun la nungah ho mel bang a kana bola kakap vangchun mark kana mu hoilheh jeng ji in ahile kachung a hon eina pahcha lheh jeng uvin ahi. Hichan geia chu Kikim ka lungset nan ka malampi eina honpeh ahie. Genthei na tampi um henlang, tahsan a doujou lou natnan eitom jongle Kikim kagel doh jiteng le ka thohnat na kana haimil ji in, Kikim ngaia kamao jiteng jongle ka Chunnu taona ocheng chu keiding in ki lhamon na ocheng thupipen ahung hijing tai. Hitia chu Kikim jong ka Chunnu bang a kana monpi ka lungset khat chu ana hie.

Hapta lhungkei a phone mulou tobang akihi jeh chun phone choiphat akinei sun² le inko te le Kikim houpi dingchu ka ngahlel valji in kati kalu athah dohleu jie. Miss call ana kigollha ji in, ivet le iloi lepai chuleh insung mite ana hiji in, dohlou company call jong ana dimset jie. Miss call ana umho chu ile call tengle ajat² ahinsei jiuvin, _”Son. Mite vang sepoy apan kalse houpi thei ahi tapoe na?”_ tia hinsei loi aum in, kei chula koi nopsah malah in, _”Itih le inlang a suty kache in kahung umden dem? Kache pou² le kahung kinungle tahleh. Kon hilai a kolte kutgu aneh² jengding ham? Ama ho khutthah lhaona dinga umbon kihilou”_ katin aninga kei le kei kana kiphin lunghan na kom jong ana um dapoi. Jan imut chimlou jeh chun. Khatvej jong hi class kalah nauva kahung lulhuh, kamai a toupa sena a kahung kinei vangchu nople da umlou va _”Ao.ao. Idhar ao”_ eihin tichu seiding helou bang a bolin atiti kibol jeng. Ilu leilah ki phutlut a gamtin kigel ji ahi in, akah le ilunggel a chun senior hojong chu ijatvei hamkhat kana that man in, nivei thumvei lang thi jong ka lungthim a aum ki nalai uve. Ki nalthou dan chu ana hie. Training laitah a igilkel toh, Humpi ki sudoh akibah chubang laitah chun nikhat anne ding a queue a kadin pettah uvin kanung a Bengali hokhat in line ahin pal a ka masang a ahung dinchu keijong det² ngailou in bukong jepna in kanei in ahile kahung kipheng maito man uvin, Buneh jouvin punishment ahung kine kitta e. Bu ineh le kiva dom ahi in, punishment vang ijat ineh vang a ki valou ahi jeh chun kidu le kidumo le neh thou² ding chu ahijenge. Chubang dap laitah chun bonlhoh lai a ei kilih lele sah uvin ahile ka lungthim a Kanu in, _”Boi. Koima toh nakinah louding”_ ati kahin geldoh chun Kanu sei kangailou jeh a kathoh jeh chun kaki sihlheh jeng’in ka lungthim a Pathen le Kanu kom a ngaidam kathum tai. Punishment akineh le Bengali hochun a thohlel dehset uvin, _*”O Maa!”*_ tin apeng lih deh² jiuvin, hinlah keiho loichu thinglhang a hung kipan ki kou lau² in akah le punishment nehpet in jong kaki thim nuisat ji kit nalai uve. *Nehkhom atuie* kiti chu kahin thopeh uvin ahi. Sunday nikhat hi kaki cholpet uvin ka hinkho man kagel² le genthei kakisa val in guhthim in kalhi kana kitheh tan ahile hilaitah chun Kanu in eihin call chun _”Boi. Nadam hinam?”_ tia eihin dohchun kaki timjou tapon kahung moh kadoh tan ahi. Ka im joulou phat chun Kanu koma ka hinkho mandan jouse kasei tan ahile Kanu in jong ei vejou tapon hungdoh ding in ei kou² tai. Ngailut kiti jongle Chunnu ngailut na vang agil mong² e. Jopa ngailut na vang lamdang ngailut na ahi. Kapa in ei tilkhou jo in, _”Son. Pasal pi² Ipidia na lhiso ham? Ven. Nanghi Pathen in eiho insung mi lah a Joseph banga natundoh ahi. Na sopi hijat le Nanu le kei hi nang khut hat vanga hung hingding kahiuve. Pontho tah in pang in”_ eiti in, kagel le Kanu thusei la dih kasa in, Kapa thusei la dih kasa kit in, kaki gel² le Kapa thusei chun ka malam pi eihin peh joh jeh chun Kanu in ngailut valjeh a ei houpina ho ka nungngat in ka thoh tun² jengtai. Inu in ilhuh na muna kon eihung kaiding ahi in, ipa in vang ilhuh na muna kona ki thodoh a dindet dingdan joh eihil joh ana hie.

Pathen mapuina jal in training kahin chai tauvin, inlang a cheding kahin ti tauve. Training kabol sung uva sepoy von eipeh hou chu kahin ban hettup in, kahin kipoh tai. Inmun lhunding kalchu ka ngahlelta lheh jeng’in, Kanu le Kapa chuleh ka lungset Kikim melmu dingchu ngahlel val in, *Sakhi to a thancheng* kabang jengta’n ahi. Christmas mangding kabang jeng uvin, inmun lhunding kal chu ka ngahlel lheh jeng uve. Airport a angol kaga bang jeng tauvin, window lang a tou nomloi; thihse hin kipoh loi; sunsilk shampoo hin kipoh pa dehset chu tuchan hin Sunsilk ngen in kakou ji nalai uve. Ajehchu ka training bolnau mun a chu canteen a ichoh le thilman lhom cha² bou ahi. Window a tounom pachu iti tam itile, a toukhom pidinh pa kom’a chun, _”Kachil kaset nome. Window langa nei tousah uvo”_ ahin tikit nalai. Khatpa jongchu munkhat a ahung ki seplhu kitte. Anunga ho chung sena a ahung kinei le akam tam jep ti in kei mama chun kaga sei them sel in adamlou dan in kansei in kan huhdoh nah² e. Bathroom a khutsop ding kanti dehset u vangchun kaboi thouve. Ikhut ikoi le amacham a hung longjeng dan ahin in, ka tham² na uva angoljep khat in tap ahin khen bong kit nalai. Ki tousot le vangchu ki nekha teiding dan ahi. Ka touna a kon’a leiset kagah vetsuh le lunghel aum lheh in, Kanu ka geldoh in _”Henu. Nang jal a tunia hi leiset khellam a lengthei kahie”_ tin Pathen ka thangvah in, ka lungthim a _”Nikhat le vang. Kanu le Kapa jong ka tousah tei² ding ahi”_ Lenna in leiset ahin bokhum ding konhin kaloi hokhat hi seat belt ana kitoman kitlou. Lenna keng in leiset ahin het a, “Kiiiiittttttt” ahin titah khun amasang a touna a chun a chalpang aga kita kitle . Vo Henu! Ka chuti ki nuisat tho jeng uve. Kumlhah dingkon in Pu Mithun Jangpao totna dan in air hostess nu chu kahung kichu kit taovin, _”We’ll come again next time”_ katiu vin kahin dalha tauve. Kaha kumlhah ule keiho lah a nagoljep pa chun security ho koma a bag aga kithum kit in kamoh vet uvin, kamoh nuisat tho tauve. Hichun ka bag u ahin toldoh uvin, ki nuisat det² in kahung kilha uvin, ka inlam cheh u kahin jon tauvin ahi. _”Itih tah le Kanu le Kapa chuleh ka lungset Kikim mel kamudem?”_ tin tulihal airport a konin ka chenna vangkho jonding in bus a kahung kitungdoh in, lamlhung kei in ka khosung kimu pha nailou ahuvang chun kachuti galvet jingkei in ahi.
__________________________________
*•••••• END OF PART 1 ••••••*

_Aban jingle ana sim taote_

_*Pontho tah a *BORDER LINE*  eihin simpeh u muntin a um kanam mite jouse chunga kipana kahin phonge. Chuleh adehset in mun chom² a um kanam Chan khompi sepoy jouse ka jana Salam kahin bol’e. Nangho jal’a lungmong a um kahiuve. Pathen in na mapui jing tauhen.*_

“`KAKI PAH E.
Keima“`
_*TangpaMinneo*_
_(+91 8131046031)_
________________________________
_*Copyright © TangpaMinneo 2019. All Rights Reserved*_

ChoHAVANG LAI GOTUI AHUNG LHAH TENG

L⭕VE   ST⭕RY

By……
TangpaMinneo

Kum thum chesa nung ahitai, Young pillar college a class XI simding a thinglhang lang a kona ahung lhun, boarding a jong um joulou ahijeh a hi kham2 a in bahara a um anahie. Class ahung jao pat nikho hin angol abang jeng in, thinglhang lang lekha sim toh mite lekha simdan jong kikhe asalheh jenge. Lekha jong kikim in aneijoupon, a loile pai hoa jahthei ho chuleh college library a manthei ho chu hitichun ahinsim toupeh e. Lhakhat lhani ahung kaijou hin loile pai jong ahin nei pantan, hiche holah a chun aman ana kivop thei pi pen, Gugun kiti khat ana ume. Gugun hi hiche school a ding a chu abolthei kiti leh mijouse toh kihouthei anahie. Numei ho ahelou aumpon, pasal jouse toh jong kivop thei mikhat ahi, Thangboi Leh Gugun chu loiphapen ahung hidoh lhontan, lungguh a um thilho jong akisei peh to jilhon e. Nikhat school kikhen hin go ha juh in ahung ju in ahileh Gugun chu class kikhen vahjep ahijeh u chun ana masa tan, Thangboi chu ana dalha tai. Class nukhah pen kichai geijin jong go chu aphadeh naipon hijeh chun assembly bollou in mijouse chun ama ama vaipho(umbrella) kikhuh in, mini kikhuh koploi, achang a kikhuh loi aumin inlam cheh ana kijot tauve. Thangboi jong akihei phei leh akoma numei khat lungdong tah a ada lele chu amu in, vaipho neilou ahichu ahedoh in, Thangboi in anei ahijeh chun chomkhat go phatjep phatle kiche hen titoh nungah nu umchan chu ave in hichun ahetlou kah in mijouse ana che gamtan, go chulah phatlam amano hihbeh e . Amani bou aum lhon tahjeh chun Thangboi in hiche nungah nu komlang chu anaiphei in, “Hello sister, hungo kikhuh khom hite. Koi nanga ham?” atileh nungahnu jong chun “o.. thanks” tin hiche vaipho neocha nuia chun lam ahinjot khom lhontai. “Hoilang ho nahiham?”tia adohle Bijang ho ahidan ahinsei peh in, aumna lhon chu ana kibang kitdan ahe. Mainroad ahinphah lhon hin gari khat hattah in ahung lhaijel in akom lhon a tui kivei chu ahin chotleh ahung jon lah in, Thangboi in nungah nu chu a mantom in akhinphei in ama joh akido tai. Film kive bangjeng inte na a umchan lhon chu kive leh. Nungah nu chula apenjah in, aaaoooooo….. iba kilo d ha, akot ding pa lhopdeh ta. Naosen junche bang jeng dan ahe.😂😂😂😂… Chomkhat chu anuikhom lhonin hichun lampi pang a chun auto angah lhontai, auto anga kahlhon chun akihou lim lhon in ahile aminlhon ahung kiheto lhontai.

Thangboi and Boineng kilom nasah lou u ha? Khatteho……..
Boineng hi Bijang a cheng, a nulepa toh nomtah, kitile neh le chah lhasam loute ahiuvin, amahi mi melhoi chuleh numei changkhat ahie. Insung min duot tah a asin leh toh le thama a enlou u chanu changkhat ahi. Pasal mit latah ahin, a kampao jeng jong ngainom2 aume. Lekha lang iti le them tah ahilou vang in exam kiti ho chu fail kiti hi amakom a mun ana ongpoi.
Thangboi hi thinglhang kho Singngat lang a kona Bijang a lekha simding a in bahara a hung um ahi. Insung genthei te ahiuvin, lekha lama chuleh umchan langa mi seiphat chang gollhang phatah ahie.
“Khamo²” ahinti lhone, auto hung dan ahitai. Auto chung chu Thangboi ding in nungah toh lungmong a atou na masatpen hidan ahie, guhthim in ahung me chop jie. Alampi nopmo henlang saolheh jongle Thangboi ding in vang aeroplane a tou toh kibang dan ahitai. Hetman loukah in alhung lhontan, go jong themkhat² ju nalai ahijeh chun nomleh daleh vaipho nuia chun ahung dingkhom kit lhone. Boineng te inmai ahin pha lhontan, hichun Boineng in kipa thu asei in, Jing jingkah le kilhon khomdin akitem kit lhontai. Gate akhah tan, hichun Thangboi jong alungthim a chun ipi kipa na anei hitam? atoka kot pumchun lampi a chun akichom leuvin, chomkhat jouhin akinung heileh inchung lang window a kona Boineng in ahin vetchu amukit in, akihetmo sah in jahcha thim pumin inlam a achetai. Nilhah kho ahung jinkon, tehse hon aseileh nichang choplut kon hin, chavang lai ahitoh lunghel² umlheh hinte, window a kon a Thangboi in nisa lhumkon avet chu alunghel lheh in, mihem jong nikhat leh hitobang a hinkho hung lhumding ahi tin alung a chun gellou ding tincheng ana gel e. Jan imut ding tia jalkhun chung ajotlut le koi ki imut malah chun akigel den in, school kaina muna Boineng amua avetnom dan holeh a oso ho agel in alungthim a chun agingden e. Ipi ki lungkham pi di ham sapkang ten, “Love at first sight” atiu khu gollhang Thangboi lungthim a ana lutkha ahitai. A lungmit in alang jing in, atahsa poh danho leh a maiso, a kampao danho chu achuti gel in a hinkho a alungset masat pen numei nu chu Boineng ahung hitai. Vaipho nuia aumchan lhon agel2 leh hetman louin ana imu lhutai. Jingkho ahungvah e, alarm in ahin thoukhang in, anle tui akisuh toh in lekha chomkhat asim in school a ding ahung kigong tai. Ahungphei leh Boineng in a gate mai uva ana nga chu amun, ama ngah ahichu ahe in “nei nanga lel thou m?” atileh “nahung kailou kigot kahisah hita chume” tin ahin donbut in school lang ahinjon lhontai. Nom ngei inte na, a lungset pentoh lamjot khom chu koi chapa ham nom salou ding? Phalbi nilum ko leh golngai kom a tou aki chimpoi kiti chu ahijeng e…. School lampi chu saojep le nomcheh d hija na?…. …. Itih a school lhung lhon ham jong ahe manpoi. School aga lhun chun Thangboi hi arts stream ahijeh chun classroom akijot tan, Boineng jong a science student hina room chu akijot luttai. Room sung aga lutle Thangboi chu aman akihetlou vang chun amaiso chu nidang sangin kipana khat aumin, Gugun in agah dai in, “nangpa, tu jingkah ipi me nan kihon haa? Ole na imut khopval thim ham? Na maiso chu a wonderful society val e” atileh Thangboi in ale dai kit in “nungah khat in eihin kiss ahe” ale tipeh kit e. Break ahug hitan, Thangboi jong aloipa don talou in Boineng chu aholtan ahile Gugun chu alungdong lheh in, aguh in athimvet in ahile adah lele in, “hichepa vang hi adih tapoi” atin… Koihol nahi hamo? Kenjong kahetnom chuo”atileh Thangboi in “Madam nu kahol ahe” atileh anunglhon a madam nu chu ana um kitin, seiding ahetlou phat in, akijam mangjel tai. Jahcha puma alhaidoh le munkhat a mikhat aga phut kha in alu kisippum a agah vettou le… Vo henuuuu, koi amu hitam? Alu kisip toh nui akop tan, amu jousen adatmo lheh uve. Koi ahichu seilou a jong hetthei ahitai na?… “Nang kahol jeh a kaki jumso deh hichuo” atileh Boineng in adonbut pai in, “nangba kahol a keijong milah a angol kabah hichu” tin aki nuisat to lhonin nehthei apohlhon chu anekhom lhontai. Gugun chula aninga jahcha a kisih lihpai d hita….😂😂😂….
Thangboi toh Boineng hi alungthim lhon chapang cha ahinalai in, chuleh dongma kiti ana neikha lhon poi. Hitia lunggel kikhel na ahinnei lhon hi amani jong aki datmah lheh lhone. Hijongleh phat kikhel dungjui ya lungthim jong kikhel jimong ahijeh chun amani lungthim a chun nungah gollhang hina a ki lungset na chu ahung khangdoh tai. Hinlah kam a phondoh dingvang koiman angapcha lhonpoi, alungthim lhon a ki lungset gel ahilhon jeh chun seilou a jong ki lungset hinkho mang dan in ana umlhon tai. Boineng jong nidang phatdang a loi le pai ana pol behlou leh kipah khabeh lou ahin, hinlah Thangboi toh akihet a pat in kipana ahinnei in, anule pa in jong dongma neidinga aginmo lhon ahin, hinlah a phoh Ngam lhonpoi ajehchu chanu changkhat, ahtui dep a adeplhon ahin, akipa na achun akipa pi jinglhon e. Phatle ni ho ahung chal2 in Xmas ahung lhung kigo tan, school jong holiday kilha ding ahitai. Lunghel aumlheh e na Thangboi leh Boineng ding in. Phalbi lai dapsa pum a lhavah noi a noma lungset thimthu lelkhom ding vang chu ngalel aumlheh tai. Jing nikho le Thangboi jong a lenna lhanghoi veng jon a singngat bus a touding ahitai. Kikhen ding nilhah hin lunghel tah in aumin, “tu nilhah hi Boineng umhen lang ka lungset danho hi lung nachim tah in ki seidoh tale” tia akigel laitah in kot ahung kikeu vin, aga honleh kotkhah bula Boineng anading chu amun, akinglap jeng in, hichun Boineng in akhut a achoi ngong o(muffler) chu a opeh in “ana damsel ta o na? Hiche ngong o hin dap nasah phat le na ti hin lumsah henlang, phalbi hui in nahin japteng gelbang dappum a hinkho naman lou nading ahi.” tin imadang seilou in akile paitai.
Thangboi le Boineng hi seidoh theilou lungset nei ahicheh lhon in, hijongleh gol lepai a ki lungset bang in mihem mitmun aumthei poi. Ajehchu kamcheng a seidohlou hijongleh lungset nachun ana mapui jing lhonin kilungset chu ahilhon e. Khat umlouna muna khat mongjou lou, tuileh nga bang kiti chu ana hilhon e. Aloutheilou ahitah jeh chun Thangboi jong aponvai kigot in Singngat, Lhanghoi veng ahinjontai. In aga lhun leh nom asalheh in, anulepa toh phat sottah nunga aga kimutou chu kipanan adim in hinlah akipana kehkhat chu aumna mun Bijang a ahin dalhah hitan te. Xmas chu lunghel tah le Boineng ngai pumin amang in New year jong kum som kimang abahsah jenge. Anah² chun ahnmang chai ham2 in, angalel pen leh amel muding bou lhangai a aumna Boineng kom jotding chu angahlel lheh jenge. Langkhat a Boineng in ipiti hinkho aman tadem? tichu nangle nang ana kidong tan…. Hahaha..

School kaipat ahung hikittai. Angaina a class XI hohi kai baijep ahiuvin hichechu Thangboi vangphat na khat ahikite. Jing nikho a cheding ahitan, jan in a imuthei tapon, khovah loi² leh atilheh jenge. Anule pa in maicham asempeh in a lekha simna a hatah a hungpang din atilkho lhonin ajing in ahinsol doh tauve. A lenna lhanghoi veng ngailheh hijongleh a lhangai joh a lunglai a tuibang a veijing Boineng joj ana lhangai joh dan ahitai. School kai ahung kipan tan, hinkho nop kiti chu ahung umpan tai. Hichun Thangboi in lunggel khat ahinnei tan, “Boineng in ei lungset ding kakinem lheh in, hinlah seidoh louin umleng khonungle avaigei pa kahikhah ding ahi. Tu aphat ahipet hin seitange” tin akigellha tai. Gugun hin guhthim in Thangboi umchan chu aven ahile nidang banglou tah a kipana maiso khat anei ahijeh chun a kholdoh kigo tan ahile achaina in Boineng chung a Thangboi in lungset na anei ahichu kichen tah in ahin hedoh tai. Hiche nikho a kipat chun Thangboi ahin dai pantan, “O bhai, kavet² le nang vang Boineng a ngol kigo nahitai na? Nidang toh sunle jan nabang tabou e. Nahung thaojep e” tin ahindai in, hinlah Thangboi chu jachat nan adim e, ajehchu aneo apat a hitobang a nungah adei khahlou chuleh nungah thu seikhalou ahie. Gugun in aseibang ajomkit in, adai kit in, “bhai, Boineng in dongma anei nahetlou ham? A dongmapa chu apa police officer hibouchu.” tin atot in ahile Thangboi in atah ahisah in alungthim analheh jenge. Hichun alunga ana pohjing seidoh Dia ana gotjing lungset na seiding ati chu mei kimut mit abangtai. Hiche nikho a chun kikhel na khat ahinnei kit in, chuna ban a Boineng hinkho man chu aguh in aven ahile Gugun in asei pa, Lenpu naonu toh chun akiha pollheh in, alungthim achun ginmona khat aneitan, hijehchun akikangse pantai. School kikhen hin gate mai a Boineng in Thangboi ana ngah in,ahung potdoh hin “Thangboi, nahung chajong neihet sah hihbeh e. Hibang naki ngahlel a, hungo kilhonte” tia aseichun aki donbut nachu Boineng in ahethem thei tapoi. “Boineng, nangvang police officer mounu nahi d tahila na? Ochat naum uve.” tin adalha tai. Boineng in a nungkou vangin Thangboi vang akihei tapoi. Hiche nikhoa konchun anigel lhon in lungthim lamdang na ahinnei lhontai. Guhthim a lungset kipeto ahilhon in, hinlah thulam leng in lungset thu seidoh dia kigongsa chu alamlou a ana puimang tahjeh in phothip theilou in kilungset Thangboi le Boineng chung a lung genthei na ahinlhuttai. Lhakhat lhani lang pi kihoulou a aumlhon in, exam hojong hithei himo in ahinchai tauve. Class xii simding chu ahitauvin, hinlah tuchan in amani kah a kamcheng khat jong akilha naipoi. Thangboi in vang athujahchu atah ahinai tia akoivang in Boineng in ipi jeh Thangboi hinkho hobang a kikhel ham ti joh akholdoh kigotai. A umchan chu Gugun in aven ahile nikhat a athusei chu ahingel doh tan hijeh chun Thangboi koma aga chen, “Bhai, khatvei a ka thusei chu atah ahipo e. Ichangei a Boineng na lungset ham kavet kigot ahiboue. Ngaidam o bhai. Katot ham katileh nangni kikah a thil phalou bol joh kana hikha e. Nei ngaidam o bhai.”tin asei in, hichun Thangboi lungthim achun kisih na khat aumtan chuleh agolpa Gugun chung a jongchun alunghang thim in, “Bhai, kenvang ka ngaidam e. Hinlah guhthim a ka lungset pen Boineng kom a ka thusei ding jouse amang abang tan, chuleh gollepai a kaki ngailutto nalhonjong jopkit thei din ka tahsan poi.” tin room a konin apottai. Break kah chun Gugun in Boineng Kona thu umdan hichu asei in ahileh lungnommo tah a ana umjing Boineng in kipah tah in school kikhen angah lel kittai. Last period kichaiding konin Chavang lai thonggo ahung jukittai. Thangboi jong thase tah a gonoi a a bag kikhuh pum a ahung lhaidoh chun, apotdoh le school gate mai a Boineng in vaipho pum a ana nga chu amutan, ngaidam thumding in akigo tai. Hinla a jachat nan ajo jehchun, achephei kigo in ahile Boineng in ahinkou in, “Thangboi, neihet masang a bon vaipho nuia neidinpi theile ipi dia tunia hi na hetsa khat na nungngat a gonoi a chu dingle nahi ham? Thuchen hevah leng hitihchan pihi einin genthei kithoh ponte. Semthu thucheng hohin eini kikah a kihetthem louna hin pohlut kit da hen” tia ahinsei chun Thangboi in anungvet le Boineng lhisoh chu amun, “Boineng, ven, kei themmo joh ahi nei ngaidam in. Hijongleh tunichan in nang in loilepai a neikoi jeh in ken ima kaseithei poi. Hibang ka lungset na hi seiding kati nikho a hichethu kana jah jeh a kho hephalou kei lungthim hi semthu thucheng in a natsah in. Nakom a seidia kagotcheng jong eina lahmang peh e.” Hichun Boineng in lungdong tah in, “na thusei chu naseilou vang in sot a pat in kahe tae. Ven, nasei masang a kon a kana sanpeh nahitai.” ahinti chun …..KOIMIL GAYA….. nomlheh inte o. Ki lungset na lampi jotkhom dingchu ahi lhontai. Chavang thonggo noi a chun phat sotpi masang a kon a ana umsa lungset na chu ahin ledoh tan, ahung khangdoh tai. College kai jong hung nom mong² tante. Hichun vaipho neocha nui a chun ki lungset tah in lam ahinjot khom lhontai.

Amani hinkho hi kisei leh Boineng hi Thangboi sang a lha Ni (2 months) a tahjo ahin, hijeh chun Boineng in lungset tah a Heu Tia akou ji tengjong le Thangboi ajahcha ji lheh e. Ki lungset hinkho ahinman lhon a pat in hahsat na ijat umjongle ki ngailu tah in aumjing lhon in, khat genthei kom leh khat in atilkhou in, amani kikah a ki ginmo ti ho chu aumpoñ, thulam leng ahin jahlhon jongleh, tahsan tah sang in totna in anei ji lhontai. Exam jong ahungnai thim tan, school authority hoa konin, camping umding thu ahung ging tan ahile, amani ding in thanop aumlheh e. Ajehchu kimuto na phat hung tamin tin, nekhom thei donkhom thei hilhon ding ahitai. Hitia camping umphat ahung hiphat in class xii exam peding jouse chu ahung kijotlut tauve. Amani ki lungset helou chu a principal Pau seh² ahitan, teacher ho ahelou aumpoi. Hinlah phosal ding anom pouve, ajehchu amani hi department cheh a lekha lang a bolthei tah le, ki lungset hilhon jongle miho leh teacher ho mai a thilse bol loubeh, teacher ho lungset chang ahicheh lhon e. Hitia hinkho amanjing lhon lai in, nikhat hi bazar a lekha le thildanf angaicha ho chodia apot lhon a ahung kile lhon, school gate a phah lhonin Boineng alungvai in alhutai. Hichun akinthei pen in hospital nailam pen ti chun Sielmat hospital a chun a polut tai. Phone choi ahilou jeh chun kou bailam ding jong ahethei pon, a thilchoh na dia a sakhao a apoh sum ho a um sun² chu amang in a boipi tai. Nilhum ding hita, amani la kile theilou dia aumlhon tahjeh chun aumthei pen in school lang ajonin teacher ho ahetsah in ahindel tauve. Hichun anule pa hojong ahetsah uvin ahin dellut tauve. Ohe! Houpi theilou ding bang in aumin,a hung chaloh teng jongle a kamleh anah a konin thisan ahung long ji in, aloi le pai koima vetngam ana hita poi. Boineng nu chu salam in atha dan in lunggim valjeh in alhuji in, hijeh chun inlang a alepoh tauve. Thangboi le a classmate ho chuleh a teacher ho kitho in a chuti boipi tauve. Lekha sim khoh laitah ahijeh chun student jouse chu amaho nople da thu umlou in camp a lutdin alesol tauve. Hinlah Thangboi vang anom tapon, chetah sang chun a lekha ho akilah in hospital a chun Boineng boipi toh lekha sim akop tai. Jan imukhalou ahitah jeh chun atahsa chun alel thim in, hinlah amavang alungset pen dia genthei ahijeh chun akhoh sapoi. Sunteng le Boineng nu leh pa in a boipi ji ahijeh chun Thangboi class a ache ji in, hinla ipi kibol ham tijong helou in sun nilhum in lunggim nan amathah denji e. Alungthim a chun ama le ama akihou jin, “Boineng in hinkho being bang hinnei kha taleh kei ipi kati ding ham? Boineng, nao…. Kei khankho ding gellou bang a idia donbut thei louhel a imu mangdel kigo nahim? Ki lungset hinkho mangbep ihi lhon e. Boi, idia genthei na toh nei lamto ham? Ole lungset hi hitia ki genthei ji joh ham? Lungset lampi nei musah hi lamlhunkei a nei puilhung lou ding ham?” tin hetman lou in lonlhin ana longden jitai. Teacher holeh aloi le pai ho ahelou umlou ahijeh chun, koima a pohnat pilou aumpoi. Masang a golpha pen a ana nei Gugun jeng injong a lhembi jou tapoi. Ama dia lung kilhep na a lungset Boineng bou ana hitai. Class kikhen in gangchel in hospital lang chu adel in aga lhunleh vangphat umtah in Boineng chu ana toudoh tai. Aga lut kigotleh anulepa palang a apotdoh lhon in hichun Thangboi chu akoudoh lhonin ipipi ham adong lhontai hichun Thangboi in jong imajouse aseipeh tai. Hichun anun Thangboi koma chun,” Boi, Boineng hi athiding phat ki teppeh ahitai. Iba ilo diuham? Chung Pathen gonsa in kilah u hitin ki lhamon taute Boi. Na lhah joulou ding kahe e, hitobang ma a chu a Chunnu kenjong ka it ahi. Lhaset nale lungnat nan gelhih in, lungset tah in a damsung beh in a lhaset nading ima hinbol peh hihbeh in o Boi,” tia lhisoh puma ahinsei chun alungmo abang in, ima seiding ahepoi. Hichun room agalut le lungmong tah a Boineng anatou chu amun, amani din phat aumkittai, Thangboi chu akiphatlam thim in, hinlah jahcha pum in alut in akoma atouleh Boineng in akhut ahintuh in nuiheu in hitihin ahinsei tai, “Heu Thangboi, hibang a ei lungset nanghi keiding a ka hinna kibe na nahi. Itih chan pi ka hinna um tading in jong ka tahsan tapoi, hijongleh na khonung khankho ding kagel ka vejou poi. Idia eini chung a hibang genthei na hi hung lhung hitadem? Na anga lungmong a kichol dam dingbou kanom e. Uu, hinlah eini din phat alhom valtai.” ati chun akoi chahkheh in, “Boineng, koiham nadam joulou ding ahi tia sei, kei kaume,… Chuleh Pathen jong aume. Ipi na lunggim pi ham?” tia asei vang chun ahung kinuh doh ding kigo in, hijeh chun kitim ham2 in”ana umta o” tin washroom a alut in alhembi ding bei naocha a Chunnu ngai a aka bang in ha kapin akap dentai. Lungset lampi hin lholut bep ahilhon vang chun ki lungset na vang kum som val ki lungset ho sang in jong agiljoi. Hilai mun a chun akinuh dentan, a sotthim phat in, Boineng lungdong khante tin amai akiphet in alut kittai. Hichun Boineng ana imu tan, Thangboi jong akhut atuh in akoma chun atou in amai chu aven, amu masat nikho a African ho leh phatsotpi alungset na seingam lou a ana umdan ho chu athah geldoh in akah le anuija ji in akah le ahung lhisoh doh jie. Doctor round cheho ahung tauvin, akile ding kon uvin, doctor pan Thangboi kom a chun “nang a ipi nahi ham” Tia adoh le “a upa kahi e” atin, hichun doctor pan jong “Boineng hi jingle inlang a lepoh tauvin, damjou lou ding ahitai. Ka boipi ngapchat tapouve” ahintin ahile, Thangboi jong a lungchang a koiba ding helou in, doctor pa chu a sangkhol in inaman, “heyyyy, doctor nahilou ham? Nakin kibol tang, round chebou hilouham na bol… Hangggg?? A damjou lou ding hijong leh a damjou na thei dingchan na holdiu ahi. Sum ijat lutding hijongle apodoh ding kaki vat pouve ” tin akisen jah jeng in ahile doctor pajong ki phatlam in apotdoh tai. Jingkho ahungvah tan, Boineng nulepa hotoh kihoutoh in phailang a apo tauve. Sun in ki huilha toh gomin phaisung a vetna thei² Ave uvin Boineng chu Thangboi in a lengkou a atuh in avale pijin, anule apa in vang agalvet thotai. Phailang a apoh uhi board exam jou ahitai. Hichun garden lah ho a touna thei khat a chun nehthei nepum in aki dailhon in Boineng in “U Thangboi, hitobang nikho hila kivel mukit tapontin, tuni nikho hi Pathen in ana gontoh hile eini dia jong lungset lungtup molso nikho jong ana himaithei ding ahitan, i vangse lheh lhone na? I lungtup lhon hi numei ching le numei pha khattoh ana molso teijin o.” Thangboi in amai atuh in chomkhat pi a amuh le Boineng much asuto in hichun asei in, ” Boineng, ven , BOI, na Mai a lonlhi hi kaki tepna hetpah na ahi. Ka hinkho a ka lungset masat pen le nukhah pen nahi ding ahitai. Nei dalhah nikho tangle nang in chung Pathen aanga keiding a nahung taojing ding, ken hi leiset a hi nang puldou a hinkho kaman ding ahitai. Nang tailou koima toh lungset lampi jotkhom louding kahitai.” tin akhut atuh in inlam ahinjot tauve. Hitia phai a hospital, shija hospital a hapta khat ho tobang aum jou uvin, nikhat Thangboi bazar a nehthei chu in apot in, phone ahung ging tai. “Thangboi, hung loiyin boi…. Nanao Boineng in nahol hol jenge” Tia anu in ahinkou chun a khut a achoi nehthei jong gelpha louvin auto khat ahin man in shija ahindel tai. Lampi a traffic a jam kit in hichun bahara apen akeng in ahindel thotai. Alhunleh Boineng chu ana kap in doctor ho Leh Anu le pa te kitho in ana umkim vel uvin, akam le Anah a thisan long chu khamjou ana hitapoi. A lungchang in thisan ahin pehdoh joulou phat in ahaijou tapon, oxygen a bupeh un, hichun chomkhat a imu lhutai. Hiche nidan hin doctor honjong Boineng hi leiset a umlou din ateppeh tauve. Minute 5 jou vel in ahung hamdoh in, a Kam a oxygen kibupeh chu aladoh in hichun ahung paodoh in “uu, neipom o.” Tin Thangboi injong aphei akikhap sah in asamho ajut namoeh in hichun atou sah kitin, a anag chun apomtai. Ohe! Amani dia phat nunung pen chu ahung lhung tai. Hijeh chun anule pa jong doctor hotoh kihou in ache un, Amani vang lungset kamcheng sut joulou ding chu aphat neisun lhon chun asut pan lhontai.
Boineng- “U Thangboi, nang sang a hi leiset a lhakhat a hung Peng masa kahin, nang jaolou in hinkho kana mang in, lhakhat sung chu nang kana ngah in, tunjong nangsang a masa jo kitding kahitai. Na leiset hinkho nomtah in hinmang inlang, ka phattheina cheng hi nachung a ka ngah ahi. Ka chenung teng le hungkap hih in, uu, kalha lengvai khante. Lungmong in neilhan, neika tengle ka nuhgui abing jin, kachena ding lam a kache ngam jipoi. Uu, ka gicha val e. Nangbei a umding kahitai. Nidan khat jengcha bon na umlou na mun ki umnom louva tua phat sotpi nangbei a kaumding kagel leh chung Pathen jong lungmol kasa deh e. Hinla ka hinkho eisem peh pan akinung lah ding ahitai. Uu, hung vangphan o” atileh Thangboi in ima seiman talouin Boineng in achaina din a leiset a ahinna hu ana lan alaicha phat chu ana lhingtai. Thangboi, na vangse na lom e na? Kap jong kapthei talouin aumden tan, a pom ngaibang in apomin, lhakehsa angailai chu a anglai a pomin, ia seilou in aumden in chomkhat jouvin Boineng nulepa ahung lutle Boineng in amit Asin chu amun a houpi leh a donbut louphat in ahung kap tai. Hichun Thangboi ahung kingkhang in, a mit a kon in olchan lonlhi ahubg longdoh in, a koi chahkheh in hichun ahin houpin, “Nao…. Boineng. Tunvang nachetai na? BOI. Thoukit ding la nahi tapoi. Nahin kou leng na thou in nei hin donbut nadem? Ka lungset dan a kehkhat jengjong seisah manlou a nei dalhah jeng ham? Boi, leiset mihem kahinom tapoi. Idia hibang genthei hi nei tosah jengham? Lungset lampi a lhung joulou ding ihi tah jongle, hi leiset dalha masa ding keijoh ana hita leng kati ngeiye. ” atin akinuh dentai. Thangboi jong anule apa te ahung lut uvin, hiche ni result out nikho a Thangboi sangtah a ahung lolhin kipa pi ding nikho chu hospital sung a a mou lhonding nu Boineng kana joh in ana mang taove. Koiham Thangboi lhembi jou tading? A vela ipi kibolham jong hethei talou in alung meipi bang ajing in, phat chesa a khankho cheng geldoh pumin a nao Boineng longdamsa chung a chun senlai naobang ana kapden tai. Koiham ka ngailai in a khulsin san a lonlhi long lou ding le khankho Lui Cheng milding? Thangboi vang angol abang jeng tai. A Chunnu le Jopa jeng in jong a lhembi jou tapoi. Thoukit talou ding a vutsai chung a chun “hung thouvin boi” tin a nao Boineng lhangai in ana kapden tai.

“Thangboi le Boineng, na khankho lhon hi tulai khangdoh ki lungset hinkho mang hodin ki hilna hung hihen lang, lungset lampi jotlhung na hung hihen. Hinlah vangset na lampi a hin puilut dauhen.”

READER HO JOUSE CHUNG A KAKIPA NA KAHIN PHONG’E.

Keima-
TangpaMinneo
_(+91 8131046031)

*||        KAP TAHIH IN        ||*
_(10/02/2019)_

_*L⭕VE    ST⭕RY*_

_By_
_*TangpaMinneo*_

Sun nilhum a na kitong chu kagim val’in matah imutding tia anneh jou a lupna kajot paile hiche nilhah khel² chun ei hin text atam dehset in, keijong ning kihel pumin Facebook a status ki update ho kavet lele laitah hin nungah khat lhase tah a thu hin post khat kahin kamudoh e. Athu hinjih chu kasim suh² in ahile koima hetphah louhel in athusei ho chun ka lung atongkha lheh jeng in, a profile ka check pai tan ahile tuibong lang a Bethel veng a um, amin chu Shishi kiti khat ana hi e. Amel chu kavet le kamukhah abang lheh jeng in, ka vet suh be le a dongmapa toh ana ki post na lim ho kamudoh kit in, ka lungthim a chun, _“Hibang a kilom lhon a ipi dia kimoh khen thei lhon hamo?”_ katin kana lungdon pi lheh e. Pasal pa in akhen dan chu hintin, alha set dan vang chu midang kikhen a ki lhaset toh abang pon, thulah lou keichun kana pohnat pilheh jeng in ahi. Chubang a imutsoh pa chu hiche thu kahinmu chu ka lipset jeng in, _“Ipidia hibang a ki lungset jiuva kikhen thei u ahidem? Oleh, kikhen hi ki lungset hinkho mangho chena lhongpi ham?”_ tin lungset ipi ham ti hephalou kei lungthim chu ana dongkheh tai. Kana kigel laitah in ka loipa Mamang inin phone eihin bol in, _“Min, hungloi o. Lampi a nungah khat gari katolna a ka sukha e. Hospital a pohlut ngaiding ahie. Tu mama in o. Khomoi hindel o”_ ahinti chun kaloipa nopmo sahding deilou jeh in, ka half pant pum chun ka garineo kaki start in kengkoh khao khitman lou hel in ka umna SEMOL a kon’in KHOMOI kahin delsuh tai.

Khomoi leibul kaphah hin lampi pang a mi ana dimset in kenjong gari ka kham in kavet le kaloipa ana um in, gangchel in car sunga ka hengdoh un district hospital kahin del taove. Nungah nu chu amai thi adimjeng in, kho helou in athi abang tan, haina hu neilou in aumtai. Gari tol kahijeh chun kino thim tah in katol in, Mihem khat hinna ding mun del akihi jeh chun breaker umna lamjong helou khop in dunglen vailen kahin lhahpi tai. Kaga lhun u chun emergency ward a ka tollut lai uvin, doctor ho’n ahin buipi lele tauvin ahile minute 10 jouvel hin ahung haidoh tan, hichun lunggel ahung nopdom tai.

Houpi thei ahi nailou jeh chun koi ahi akihethei naipon, amin le aumna hetthei na ding I-card ho la khatcha akipoh khah lou jeh chun ima akihethei poi. Jan nidan 11 lang alhing tan, hichun themkhat houpi thei ahung hitan, keichu loule ai chole a ka lhai lele jeh chun ka um manpon, ka loipa in ahoupi in ahile amin ahinsei doh thei in hichun gangchel in a inko te a hetsah uvin, amaho jong ahung lhung pai tauve.

Damdoi chohna a pat plastic dimset a damsoi kahin khai a ward sung lutding katile mi ana dimset kitta’n, ana eulha jeng uvin, kaloipa abolchah diu kahisah in lunggim nan kadim tai. Kadin lele chu doctor pan ahin mudoh in _“Hungloi tango. Nang naki ngah hichume”_ tia eihin sen jeng phatchun ka lhailut jel in ka thilchoi chu kapetai. Inmai lang a ei soldoh tauvin ahile a inko te toh kahung kihou tauve. Chubang a ka dipchah laitah in, Mamang le kei kom’a chun kipa thu achuti seijeng tauvin keini chu lungdang tah in kakiveto lhon e. Anu in, _“Nao teni,tuni na naonu lhon nahin mudoh lhon hi kakipah val uve Boi. Damsot lhonin lang, thilpha nabol lhon hi keihon lesah jou hih u jongleng Pathen in atamjo in nahin ledit peh lhon teihen”_ atin lhilong pum in asei tan, kenjong kiphatlam tah in kaloipa suhkhah ahidan kasei le, Anu in, _“Ki phatlam lhon hihbeh in. Nilhah anne ding a kakou le a room kikhailih kigo ding kisa a ana um ahi. Ka lungna val a kapho le hung jamdoh a hichea pat ka holmo ahi. Athi mel kamu sang a hitia ka chanu haina hu neipum a nei nungmu sah lhon hi kakipah val e Boi.”_ atitan, hichun ka lungkham na lhon ahung oldom e. Kaki houlim² uvin ahile doctor ho’n nungah nu kisuh khah na a thisan aha lonval jeh a thisan khaipeh ding thu ahinsei tauvin, Anu kavet le la alungkham mel kamu phat chun kave joupon, a pethei ding dinmun a umding koima aumlou jeh chun kei kahung kipedoh kittai.

Room kaga lut kon’in Pathen kom’a taona kanei tan, _“Paa. Tunia hi hiche ka hinkho a ding a thisan kapeh masat pending hi genthei te chunga alhun ding jeh in namin ka thangvah e. Adamlou nu damna hitei ding in na anga kahin lhan e”_ katin ka luttai. Thisan ahin lhohlha tauvin a dammo nu khaipeh din achoidoh tauve. Keijong ka tha abei thimjeh chun hilai a chun kaki cholden tai.

Kho helou in kana imulha tan, jingkho ahungvah hin hospital sung a kana um chu gangchel a kagel le kalung ahung dong man in, hinlah thu umdan ho kahe pai in kaga potdoh le ka loipa le nungah nu anu chu hiche nungah nu koma chun ana toulhon in ana lulhu det² lhone. Doctor round ahung tan, Anu suhkhah ding chula nom kasa kitpon, lekha a ajih chohding ho jouse chu achoding in kache kittai. Hichan jong chun hiche nungah nu mel chu kamu naipoi. Kahung kile lang in ana khangdoh lhontan anu chu akiphatlam kei in hinlah ka lhamon in Mamang jong tot bolthem ahijeh chun totna kaseikhom uvin ka nuikhom kit tauve. Jingkah buneh phat ahung lhing kitta’n, Anu le Mamang chu hotel a bune ding in kasol in kei ka umden tai. Ka umthim mo kei in, lou lekha ho chu kaven ahile amin Shishi, Bethel village tia kijih kamu chun ka lungmit ahung hah doh in, _“Janlhah a facebook a kamu nuchu ahidem?”_ tin kei le kei kaki dong tai. Hichun _“Ka dang achah val’e. Tui neipe uvo”_ tia onem heuva hung kisei chu kaja in kakihei le ka buipi nu chu anahi phat in gangchel in akom a bottle kalan akam a donsah ding katia amai kavet chun, Oh!!! Facebook a kana mu Shishi chu ana hitan ahile kaking dot jeng’in ka veden tan ahile bottle chu ahin tham in, hichun kenjong olchan kadonsah tai. Amel chu atah in ahoijo in pasal mitvet dingchun melhoi na tah khat anei in, vet nom² aum e. Gah houpi ding chula mi adamlou ahijeh chun aham ngapchat louding kahe kit in ka houpi ngam kitpoi. Chomkhat chu kihoulou beh in kaum lhon in, chomkhat jouin Mamang teni jong ahung lhung lhon tai. Keijong anne dingin ka chephei in hinlah hotel sung a chun ipi kaneh ham? tijong helou in koima eisol na loubeh khat chun, hiche numei nu hinkho kahin hetnom na’n kadim tai.

Hospital kale lhun hin Mamang le Shishi nu chu pamlang a ana um lhonin, kenjong ima seilou in window a kon chun Shishi chu kave tan ahile guhthim in ana lhisoh tai. Galut jengdi chula nom kasa kitpon, hinlah a hinkho thusim chu thudu keiman kahetnom lheh jeng’e. Sun nilhum in ka lung amoh bui² tan, kakitim joulou phat in Anu kamoh doh tai. _“Henu, nagelthei dileh na chanu hinkho thusim nei seipeh o. Ipijeh a hitia hi umham?”_ tia kadoh jengle hiti him ahinsei e. _“Amin Shishi ahi. Adang sei thupi ding aumpoi. A kilungset pi pa in ahin khen jeh a hitia hi umkha ahi. Ipi kilungset ham? kahe hih e. Ipidia tulai nungah gollhang aki lungset hohin nahin lungset lou u khatjeh a hinkho kisan na it jilou u ham? Najiding hilou khat hibang a na lungset ule na jiding nu/pa chu itobang in na lungset tadiuvem? Nangho bon hichan a naki lungset u leh na hingnu le na hingpa in ichan a nahin lungset uva na hinkho u a itding hitam?”_ atin alhisoh tai. Kenjong kadohbe in, _“Henu, ipijeh a pasal pa chun akhen jengham?”_ kati leh, _“Anule pa te’n a phatsah lou ahi. Tulai a neilou ngalou te ding in leiset a mun a ong tapoi. Ichena lang² a mi muset kichang ahitai. Chihnan hinnei uvin”_ tin ei donbut in ahile kenjong thu umdan ho kahin hethem tan, hichun kenjong Shishi hinkho kikhelsah ding lungthim kahinnei tai.

Hospital a kaum sung u chun inlang kapha kha tapon, thu jong phone a ka nute kaseipeh tho ji in, chuna ban a kisil khalou akihi tahjeh chun inam jong akisuh tapoi. Perfume a kidoi ding ahi tahlou jeh in kaloipa kisil ding in in a kasol in ama ahung lhun in kei kache kit in hitichun kaki lhah lele tauve. Mamang in asuhkhah ahijeh chun sum lutding ho jong Mamang in, _“Keiman podoh nang’e”_ atin, hinlah Shishi nu ada in, hijongleh Mamang in ama account a kon in sum a draw ji in sum lut ho chu ahin pedoh thu² tai. Shishi nu in, _“Keiho insung mitmo jeh in nangni na genthei lhon valta e na? Min. Nei ngaidam uvo.”_ tin ki phatlam tah in aham in ahile Mamang in, _“Henu, imajouse kei mitmo jeh ahie. Keijoh nei ngaidam uvo. Min, nang in jong nei ha buipi val tae. Nachung lhon a kakipah e”_ ahin tikit in ahile ka vesal in, _“Hung kikam thep sah hih o. A tah² to nahung kilou e”_ katile kabon uvin kahung nuidoh kit uvin, chomkhat kah² chu lungdon suhlhap nan ka nuikhom jiuve. Mamang le Shishi nu chu Shishi dam le damlou buipi in aum lhonin, keivang Shishi genthei kile na ding joh kahol pantai. Amani ana lut masa lhon tan, keivang pamlang a kading in kaki ngaito den tan ahi. Window a konin guhthim in a umchan ho kave jingkei tan, hitia kavet jing laitah chun amel hoina ka mudoh cheh² in ahile kalunga deina khat ahin neidoh tan ahi.

Ka umkhom pet ule ima tilou dan in aum ji in, hinlah ka dalhah teng ule vang guhthim in alhi ana long jingkei e. A umchan chu ka lum vetjou tapo’n, moh lung in ka lungset doh tai. Pasal khat hina in vang, numei idei tho laise in nom akisa na in, ihin lungset doh tah² le vang genthei kipan ahitai. Nikhat jong window a kon’a kavet laitah hin aki hei lele in, akom a bottle kitung alah kigot le drip akikhai jeh a alah phahlou chu alah kigot kamu in ka deljel in ka petai. Aman acham a donthei loujeh chun hitichun achoiden in kenjong ka hethem pai in ka donsah tai. Hiche nikho a kaki thopi na chu ka lung akipah lheh e. _“Min, kakipah e”_ ahinti chu ka kingdot in, _“aare. Shi. Hoia kona kamin nahet ha?”_  katile _“Keimin nang in hia nahet na leh?”_ ahinti kit phatchun kakimoh nuisat lhon in hiche nikhoa a kipa mel kamu chu, kiseival jeple vantil mu kabang jeng’e.

Hiche nia kipat chun kahung kihoudoh lhon tan, ahile ka lung kipa nan adim in, hinlah akah lah tengle guhthim a ana lhiso jichu kamu ji phatle vang kenjong aguh in kalhi kana kitheh jin ahi. Nikhat akapet kaga tohkha in, _“Shi. Ipi buina nanei ham? Ipi na lungnopmo piham o?”_ tia kadoh le akun suh in, _“Min, ka hinkho hi ahing dinga jong kakidei talou ahi. Hinlah, athi ding a Pathen in eiphal nailou hinte. Janlhah a chu keile kei kithat ding a kigel a leia kon’a kichom lha dinga kaki got le kaki lho khel a kanung lhuh ahin, hiva chu naloipa in ei suhkhah dan a um kha ahibou e. Kei jeh in nangni na genthei val lhon ta e. Nei ngaidam lhon o na?”_ ahiti in, kenjong kadohbe in, _“Na hinkho thusim chu kenjong kahet nom nah e”_ kati le a dongmapa toh akingai lai thuho abon in amit a mitlhi pum chun ahinsei tan, kum 2 val kingai lhon ta a hinlah nulepa deisah achan lhon loujeh a khenna ato lhon chu ahinsei tan ahile ka lungset na akibe cheh² tan ahi. Hibang a numei khat in pasal khat a lhahlel vangchu kagel le ka datmah lheh e. Athu asei chai chun ahung kinuh dohtan ahile kenjong kalhem in, _“Shi,. *KAP TAHIH IN* Pathen in nangdia agonlou joh in gel in lang na malam dingjoh ngaito o”_ katipeh in, ka lhem tan ahile amanjong, _“Henge. Hitia kilhep tailou chu lampi dang umlou ma ahitai”_ ati in, chomkhat jouin Anu le Mamang ahung lut lhon in nehthei ahin choh lhon chu kaneuvin totna kasem khom kit tauve. Hospital a kaum sung u chun akom lah a damlou um honjong nom asa lheh uvin, keiho totna sem chun kanui khom jiuvin, ka hetkhah lou mi tampi toh kahung kiheto e. Hapta khat lhingset ka um uvin, ka hung potdoh kon uvin kakomu va umho chun ei lhalel kei uvin, _“Um nalai tangu vo. Min. Nangho pot leu chun lunghel umval di ta hila”_ atiuvin, hijongleh doctor ho thupeh ahijeh chun ki lhalel tah in kahung kikhen tauve.

Shishi te in kaga lhung tauvin ahile a in u chu akitup chet jeng in, inbang a lim kitah ho chu kavet le tan ahile sepai limkhat kamu in, kenjong Shishi kadong pai tan ahile, _“Min, kapa ahie. Kum 4 chesa a chu ana umlou ahitai.”_ ahinti chun alim kitah chu hoisel a ka thah vet le athini kijih chu kamudoh in, kana doh khah chu kaki phalam lheh e. Hichun vailhun maicham kasem un, Pathen koma kipa thusei le kei le Mamang chunga kipathu phon na pum in taona kamang uvin, Shishi damna ding toh gom in ka tao uve.  A insung u hahsat dingdan chu kagel le keijeng in jong hahsa kasa in, kiseibe leh, Shishi Jong insung a chanu changkhat a aneiu ahijeh chun Anu in homtho tah in abol in, alungset lheh e. Hichea kon chun Shishi phone number kahin kipah doh tan, Mamang in jong akilah in nilhah khat a din kahung kikhen tauve. In kaga lhun chu jong kikaplha kabang jeng in, kalal danchu nungah jong kagel ngapchat tahih e. Bujong nelou hel in ka imu in ajing in sun pung 12 lang in kahung khangdoh bep e. Kanu in la kalal ahetjeh chun ei thou nom pon, keichula athi kana bah dan ahi. Katho a pung kavet le kamoh nui in, jingkal bu le sunbu sahkah mo in kahin netai. Chujou in ka phone kavet le Shishi akon miss call kamu in, WhatsApp kavet le _“Min. Ipidia kan call le na lahlou hamo? Shishi kahie.”_ ahinti chu kamupai in kenjong ka reply in, _“Ka ha imutval intin ima kana jahlou ahe Sorry”_ tin kathot in ahile ahin view pai in, aki phatlam na thuho asei in hinlah ken ka lhamon in thu chom² kasei lhon le nilhah anneh phat ana hikit tai.

Niseh in kaki houmat jing lhon tan ahile ki ngamsung na khat chu aum tan, a dongmapa toh akingai lai lhon thusim ho kadong ji in, thudang² ho jong kasei jilhon in totna kasei peh jile amajong ahung kipah thei pantan ahile keijong ka hinkho anom chom lheh e. Loile gol a kihe mai² dan in kaum lhon in, lungset na thu seiding chu ipi a kagel hitam? Ei kithat ding ka bahsah jeng’e. Ama loiho kaki hetpi ho toh jong ama thu kasei jiuvin, mipha ahidan le akitah na ho eisei peh uvin, _“Kihel o. Kisih pon nate”_ eiti jiuvin hinlah lungset thu gasei pat dingchu kagel le ama lungnopmo laitah ahijeh chun ima kasei ngam pon, eihin muda bepding kati aja in ka lunga kagel ho khatcha kasei doh theipo’n, aloiho kom joh a chun Shishi ka lungset dan ho kaha seijoh in ahile aloiho joh chun aha hetjoh dan in aum doh in, ka jachat le kaki sonlel danho kasei jile, _“O homo. Na hinkho in nungah kimu pon nate. Um theimbeh jengta’n”_ tin eihin dai jiuve. Hinlah ken ka lunggel a chun, _“Akipa na thei ding bol a, eihin lungset doh tengle seiding”_ tia ana kigel lha kahitai.

Nilhah khat Mamang in phone eihin bol in, _“Min, hungo tuni Shishi te in a gache te. Pha² hinam gave hite”_ tin eihin tem in, keijong ka lung lamtah ahijeh chun kakigong gangchel in SEMOL a pat Bethel veng kajonsuh lhon tai. Kaga lhun lhon le Anu toh bu ana neh lhon laitah ahijeh chun lutpai ding nom kasa lhon pon, inmai a chomkhat kading lhon in chomkhat jouin kaga lut lhon tai. Keini eimu lhon chun Shishi chu akipah lheh jeng in, gangchel in cha ahin om in, chomkhat kihoulim toh gom in cha kadon un kaki tot lele uvin ahile nilhah nidan 7 ana val tahjeh chun umnom lheh jong leng vaigei ahi tahjeh chun kile ding kati lhontan ahile Shishi in lampi Chan eihung thah lhon in kahung kikhen tauve. Jan in Shishi ka chuti gel² jeng tan, ka lungset na vang ana sang man lheh dan ahitai. Whatsapp a status ho kavet le ki lhaset na ngen ahin post ji in, ka lungthim a chun ama donbut na tobang in, _“Idia lungneo ji nahi ham? Na lungset kei kaum e. *KAP TAHIH IN*“_ kati ji in, hinlah atahbeh a seiding chula kaki pum ngapchat kit jipoi. Ama ding gelna a ama hetphah lou hel a genthei chu kahi mai e. Phat che dungjui in kihou dan jong ahung kikhel jep² tan, kenjong, _“Themkhat beh kisei hen”_ kati jin, tot toh gom in ka khohsah dan thuho kasei ji in ahile aman jong kipah tah in eihin donbut jin, ka lunga kinep na lentah eipeh dan in kahe e. Hiche phat laitah hi exam jou holiday kinei laitah khu ahi in, result ahung out a lekha aban simding hung kisei a thu kija ho vangchu keiding in lunghel ei kipe be in, Shishi kangaina ahung sang cheh² tan, phat chutih chan sei dohlou a ka um chu kakisih lheh e.

Ama kigel lhah na bangchun nursing jilding in Imphal lang a vaikon doh ding in aum tan, achedoh ding nilhah hin a in uva eikou in, ima choilou a cheding nom kasah loujeh chun diary khat ka chohpeh in packing anal na theipen in kabol in kachetai. Lamlhung kei in lunghel nan kadim in, hinlah hiche nikho changei  jong chun ka lungset na kana seidoh ngam deh naipon, ka lungset na thu hojong ka loipa ngaitah Mamang jeng jong kana seipeh poi. Hijeh chun aseidoh ding dan hhasa kasa lheh e. Ajeh chu ei kithopi ding kanei lou ahimai e. A inmai u kalhun le kamoh lunghel in, jing nikho a kon a kamu kit tahlou dingchu kagel le lhaset na leh lung kisih nan kadim lha jeng’e. Insung kaga lut le avon ana kigot laitah ahi in, kenjong kaki thopi in kagon chai lhon chun kenjong kathil choi chu kape tan ahile aman jong kipah tah in eisan peh e. _“Min, cha beh don ta na?”_ atin, cha ahin om in, kadon khom lhon in, hiche nikhoa ama cha om kadon chu kakipana aseije abei hel jeng’e. Alangkhat a lunghel nan kadim kittan ahi. Lungguh a kagel jing lungset thimthu ho seijeng ding la seiding kati tengle pasal kahina a lunglet kabol thei him² poi. Ka hamdoh kigot jongle kangai val jeh chun ka mitlhi joh along masa kigo jin, amai vet a thu chom² sei chu ahijenge. _“Shi. Lekha pontho tah in hinsim ta na? Nang potdoh le chun ka lunghel di danhi. Na hungdoh ding ni kana ngajing ding ahie”_ katin ahile ahung nui in, _“Keijong ka lunghel dan. Ngai naum val uve”_ ahinti chu ka lungsung chu kipa le lunghel aki halchop lha jengtai. Ki lhalel tah in kahung kikhen lhon tan ahi. Hiche ni jan chu kho jong vahda jengle kati nalom² e. Nilhah in a whatsapp status a diary kapeh lim ahin tahdoh in, _“Min. Kipa umval e. Nungah hoitah hin kimuo.”_ atin, keichu guhthim in ka lung ana thim in, _“Kenvang nangbou kadei e”_ kati in, Shishi ka Lungset na vang, atamjo ka lungthim toh kakihou jing tan, kam in aseidoh joulou thucheng hijat chu ka lungsung a ka I’m mang den jitai. Jan jong ka imu thei tapoi. Khovah kei in lunghel nan kadim in, Kanu ngaina in jong hitichun ka lunghel khapoi tileng kajou louding ahi.  Jing nikho Sunday nia chesoh ding ahitah jeh chun keijong ajing nikho in matah in devotion a kajao in alhung kei in Shishi ding in Pathen kom’a ka tao tai.

Amajong akalsong doh tan, aga lhun chun phone eihin bol in, _“Min. Ka lhung ta e. Ka umna dinghi a strict dan. SUNDAY boule phone ei choisah ji diu dan ahitai. Kan call jidi chuo. Ka lung ahel val e. Mangpha o na? Ka submit ditai “_ atin kei ei hamsah manpon, a cut pai tai. Ka lunghel valjeng tan, Shishi ngaina in ahpul in aphah ahcha ngui chetchut kabnag jengtai. Kon la ei hetphah peh lou. Kenjong niseh in eihin call ka ngah jing tan, hinlah kakinep na abang ji poi. A umna uva landline a kon in khatvei eihin call in, _“Min”_ tia eihin kou chun ama ahi kahepai in, bazar kaum pet ahivang chun kakipah val in, kipana mitlhi ana long lha e. Chomkhat kakihou lhon in, a gilkel ji thuho ahinsei chun ka dip adap in, _“Na nu ahunghat le nehthei kan pohsah ding ahie”_ katile akipah val in, kenjong hiche nikhoa a kon chun sum kakhol in Shishi nehthei ding cartoon dimset in ka heng in, apeh dingdan ka gelmo jel kittai. Akah le letter jihtha ding kati jin, hinlah kaki phatlam kitji in, ajole loicha hina builo khabep intin, hinkho a ki jachat sang in, katin kajih kit tapoi. Ajing in Anu phai a acheding jeh chun nehthei kathot tai.

Ahungdoh ding ngah in phatle nikho Kasim jing in, itih tah le ka lungset na thuhi kasei peh dem tin keile kei ka chuti ki hou² jeng tai. Khohsah tah a landline a eihin call jichu keiding in kipana lentah khat ana hiji in, kaki housung lhon jongle phat ka homtho jilhon val in a hamding kaki chutho leu jeng ji lhon’e. Ka umchan lhon chula aki lungset ho kabang jeng lhon in hinlah ken ima kaseidoh loujeh chun imacha ana hithei poi. Khatvei ka natoh pet hin ka phone ka charge pet hin eihin call in, hinlah ka phone ka pohlou jeh chun kana japha tapoi. Natoh kangah a ka phone kavet chun miss call ana umtan ahile Shishi ahichu kahet phat in ka phone kana kipoh dohlou chu kakisih val jeng’e. Ipi kisei dingham? Aman la phat ong aneisun a eihin call chula hintin, gelleh aki letsah eihisah dingchu kanom pon, keile kei ka chuti ki samset² kittan ahi. Ajing jingkah hin eihin call tan, ka pick le ahung phun pan te, janlhah a ka pick louchu ahinsei in kabuidan ho kasei le ei hethem in thudang² ahinsei in achaina lang in, _“Min, Friday nile kahungdoh dihe?”_ ahinti chu ka jaman hihbeh e. Leiset a melhoi pennu kamuding chula ahikittan, ohe! Ka ngahlelta nalom² e o. Calendar kavet le Tuesday ahi nalai in, wall clock chu kiheh gang henlang, Friday kilhunsah doh le kati val jeng’e. Jan imumo jen in ahungdoh nile ka thusei dingdan ho kakigel in, insung a kachang in thusei dingdan kakijil vangchu ahah thou e. Houin sunga speaker ding kabang jeng’e.

Ka ngalal pen Friday ahung lhung tai. Jingkal langhin Ahung lhung in, chubang a ka imut noplaitah chun ei hin call in, _“Min, ka hung lhung tae. Hungsuh o”_ eihin tichun keijong bu neman louhel in, brush kakibol man ham² in kaki kapsuh jel jeng tai. Kaga lhun le inmai a ana um in, kamuchu ipi kisei dingham? Leiset Mihem mit in ima hiponte. Hinlah keima mitvet in vang, hitobang a melhoi hi um taponte tin ka lungset na chun ka lung a ahin sejdoh jeng theije. Kaga lutle touna eihin pe in chomkhat kakihou lim2 lhon in, chujou in bazar a vading ati tan, achang a soldoh ding nom kasah loujeh chun bazar chan kaga  thah in, lampi kanding ahiphat le akhut katuh jin ka hithei na chan in ka veng jing in ahi. Huimut dia jong kaphallou kiti jichu ahi jeng’e. _“Hungo. Hotel khat a nehthei neute”_ katileh, _“Kaki kino thim chuo. Nidang leh o”_ atiphat chun kenjong khoh kasa dehpon kahung phei hung kit tauve.  Munkhat lai a hin ahung dingden tan, message eihin thot in, _“Min, nang ana che jeng ta na? Kaloiho ahung ta e.”_ ahin ti phatchun kenjong Henge katin anungche ding in kaum tan, hinlah ka lung athi theipon, kathim jui² in ahile pasal khat toh ana tou in, pasal pa chu kavet le masang a ana kingai pi, a ex pa chu ahitai. Kamit a kamu vangchun ka tahsan theipon, aki thah ngalhon dan a kagel vangchun ahithei kitpoi. Ka lungnat danchu kamit ajing lha jeng in, akah le ka lung hang jin, Kei eisol doh a mikhat toh aki muto chu kagel le kalai ana val in ka umna lang jeng jong ka he poi. Ga koudoh ding katile la _“Mi alungset khattoh umkhom ta khume. Ija a dongma bon kihilou”_ katikit in lhase tah in kahung kile tai.

Nilhah a phone eihin bol vangchun ka pick tapo’n, message jong ka vetpeh tapoi. Whatsapp ka vet le  ngaidam akithum in, a umchan chu ka lungset kit in, kipah tah in ka houpi kittai. Ijat a ka lunghan ji vang’in ka lungset na’n a joval jeh chun ka lunghan nading hoa jong ei nuisah jinge. Lunghan na tampi neijeng jongleng, ama masang a kipa mel putjing ding kagel jin, ka lhaset nikho teng jongle a o kajah jiteng le ka gentheina jouse ka haimil pai jitai.  Guhthim a apul kadou chu kakigel le pasal kaki samo val’in, _“Phatkhat le eihin sitval inte”_ katin, hiche nilhah chun kahung kigellha tan, akoma ka lunggel jouse seiding in kahung kigongtai. Apat ding dan la kahepon, ka lungset danvang leiset a pao hijat aum vang in a hilchen thei ding um ponte. Kenjong nilhah hin ka call in, ka lunggel jouse chu kaban seilhah tai. _*“Shi. Phat sotpi loile pai in ihung kipol in, ka umchan jouse akon in jong ka lungset na hetan nate tijong ka tahsan e. Hinlah, kammol kahijeh in ka lunga um ka LUNGSET na jouse hi aseidoh dingdan kana hejou poi. Phat lemchang tampi kamu na’n, hinlah ka seidoh ngam na phat tunin ahung lhungbep e. Nunlui ngai a naka na ho ka vejou poi. Tuni a konin, ka lungset neisan peh in, na lonlhi thehhul peh ingting, na golpha pen le na lungset pen hijing tange. Shi. Na lunglam lou ahikhah jongle nei ngaidam in. Keivang nang a ding mong² a ka hinkho jengjong ka phal ahitai. Shi. Kahin lungset e. Neisan peh tei o na?”*_ katitai. Chomkhat jouin ahung nui in, kipah tah in, _“Min. Tuni chu nahung pasal nah e na? Hiche thu nahinsei ding hi sot a kon’a kana nga ahitai. Kei numei joh hin kahinsei na nga kahisah ahi nalai e. Phat chutih chan nei genthei sah. Ka genthei thoh cheng jouse nang in nathoh kit dihe. Ana ve o. Ka thusei chu hethem o. Ka lungset lou nahipoi. Na gel sang a kahin lungset joh nahi. Ahivang in tunin sangthei nai ponge. Hijongle aki lungset chu ihitai. Seilou a jong hetthem thei ahi”_ ahin tichun O Manipur! Anome anome.

Hiche nikhoa konchun ki lungset tobang in kahung umlhon tan, kasei vaigei jeh a punishment eipeh jehchun ei engbol in, _“Nei lungset em?”_ tia kadoh ji tengle, _“umm. Ka lungset chu. Ahivanga iki ngai lhon nailou chuo. Haimil hihta”_ eiti jin, kenjong, _“Nei lungset poule apha ahijenge.”_ kana tipeh jie. Hiche thuhi koima ka hetsah lhon pon, kenjong ka loipa Mamang jengjong kana seipeh khah poi. Kaki lungset na lhon jong kum 2 lam achetan, hinlah lungtup molso dingvang chu koiman ka pandoh ngam lhonpoi. Ajehchu Shishi in jong a inko te koima hetsah lou, a loiho jong hetsah lou. Keijong chutima kahikit e. Nilhah khat hi ka tot in, _“Shi. Itih le ikichen di hamo?”_  katile ahung le tot in, _“Aphat² in potante. Phante itini khatle ikichen le hitahta”_ atiji in, keini kingai chu totna a mathah kahilhon e. Hasei dingla alung noplou ding kadei kit pon,  akipa na ding ahipoule kajo chan in ka pang jing in ahi. A course kichai dingkon ahitan, ahungdoh dingchu khaltui bang kangah jingtai. December le ahungdoh ding eihin seipeh in, kakipa danchu aseije abei heljeng e. Ahung tengle kapeh ding von jong tampi kakoipeh tan, Christmas gift ding chuleh adang² tampi jong ka koitha e. Niseh a calendar vetjong vangchu khop aum thouve.

December ahung hitan, kangalel jing, ka lunglai pahcha jong jing nikho le hungding ahitai ti kahet phatchun sun nilhum in kaki sutheng in, vanleng a hungding ka bahsah jeng’e. Nilhah hin Mamang in phone eihin bol in, _“Min. Jingle Shishi hungding ahitai atiu hilou hamo? Oleh, na het louham?”_ ahin ti chun kajah ahung chathim in, _“Atiu hilou hamo?”_ tia amajoh kaledoh le, _“Min. Koidang lou tia nangkom a kansei jeng ahie. Nommo vang sahih inlang, Shishi khu Tuchung ahungdoh kah beh hin keia ding in joldoh tate na? Iti nagel em? Ka inko te jong jingle Shishi ahung dohding le chadom a chepai ding atiuve”_ ahinti tan, hiche thu kajah chun ka lungchang a koina ding kahe tapoi.

••••••••••••••••••••••••••••••••••••••••••••
*||    ===• INTERMISSION •===    ||*

*||    ••• KAP TAHIH IN •••     ||*

     *———- (PART 2) ———*
_(11/02/2019)_

_By_
_*TangpaMinneo*_

*______________________________*
*so masa banjom~*
_(hiche thu kajah chun ka lungchang akoina ding kahe tapoi.)_

Kipah tah a ka lungset Shishi lamto dinga kigongpa chu lunggim najoh in ka dim kittan ahi. Jingkho hungvah dingchu kaki khoto lheh jeng tan, ka mit kasing thei tapoi. Ka loipa thusei chu a ogin a kichai tah vang in ka lunga aging jing tai. Jan khovah in imumo helin kaki gel khovah den tan, jingkah kho ahung vahlhah gei in ka imu thei dehpoi. Shishi mel mungam louin kaum tan ahile inmai jengjong ka potdoh nom tapon, hijeh chun insung a kaum chahkheh tan ahile Shishi in eihin call in, _“Heu, ipi dia ka inhva nahung lou hitam? Kahung ding nahet hilou hamo?”_ tin eihin dong tai. Nidang a kamin a eina kouji ahin, hiche nikho chun *Heu* kiti thucheng chun ka mitlhi ana kaidoh jou e. Adamlou dan in kakisei in call ka hang-up paitai. Hijeh chun keiho inlang a Mamang toh ahung lhon in, kenjong kagal muchun ka lungmit in nupa tobang in kamu tan ahile kalung natna ahung kibe cheh² kittai. Ahung lhun lhon chun aphunding akichu thojeng lhon tan, hichun kenjong insung a katousah lhon in, Shishi chu cha omding in kitchen lang a achetai. Hichekah chun Mamang in kajah a, _“Min. Tuhi chance ahe. Ana sei ta na? Ken keiho inlang a a answer kana ngading ahitai”_ atin apotdoh paitai. Chomkhat jouin Shishi in cha ahin domin, _“Mamang lah ong?”_ tin eihin dong in, _“Achetai”_ katile, _“Apotdoh chuba akijensel e. Ningnoh sahbep”_ atin kakom a ahung touin, ka leng a kingai in, a umchan kavet le ka lungset na asang cheh² tan midang ang a apah ding chu kagel le ka lai ahung na in, akhut katuh in, _“Nao. Hungo tuni mama in kicheng tate”_ katile eihin ve in, _“Tot dehduh hih o. Kichen chu thilnom nahisah ham?”_ eihin ti tan ahile ka lunggel ima ahetlou jeh chun ima kasei nom kitpon, hinlah ka maiso akikhel chu aman jong nom asa kitpon, _“Heu. Na lungnopmo toh tave. Nanga ding kahie. Kon ipi seijongle nangdia kitepsa kahitai”_ tin eihin koi kit in, _“Phat hung che² le kei neihin dalhah a midang nakoi ding hi kamu masa e”_ katile ahung lunghang thim in, _“Ipi sei kisa nahi hamo?”_ tin eihin dong kittan ahile aban kaseibe nom tapoi. _“Shi. Igeisang khah ding kati aja e. Hungo che tate”_ katikit in ahile apum nop tapon, hijeh chun kenjong kaseibe nom tapoi. Ima seibe talou in ama jong in a achetan nilhah in Mamang in eihin call kittan ahile ka pick ngam tapon ahi. Ka lunggel aki not lha jengta’n, ka lungtup ka suh bulhit le keiho insung kikah a ki ngailut na atan ding ka gicha kit in, ka genthei nikho tengu le eina kithopi te insung chu Mamang te ana hijeh chun alung natna diu kana bol nompoi. Hinlah, hiche nikho chun insung ding gelna jal a ka lungset Shishi ka lhaso ding chu  ahi kittai.

Nilhah in Shishi in eihin call tan, _“Heu. Neihung kipui to”_ tin kappum in ahinsei tan ahile thu umdan hochu seilou in jong ka hethem tan ahi. Hetman loubeh in keijong kamit a konin ka mitlhi ahung valha tan ahile seiding kahethei tapoi. Kam nei kahivang in kaham thei tapon ahi. A pao masa ding umlou in ama akap in, ken itih a kajah ngamlou ka lunsget Shishi ka ogin kahin ja kittai. Kenjong, _“Shi. *KAP TAHIH IN*. Ka lungset nahe jingnai. Ka lungset valjeh a tuni a jong chu kasei nomlou a `kicheng tate` kahin tikhah ahi. Hinlah nang in na hethem poi”_ katile ahung ha ka cheh in, _“Angai po e. Kei nang tailou midang to kicheng ponge. Heu. Nei lungset lou hitam?”_ tia eihin dohchun ka mitlhi ka seljou tapoi. Phone ka cut in ka room a guhthim in kaga kap tai.

Kalunggel asan val jeh chun kho helou in kana lhutan, ajing jingkho vah in kahung khangdoh in ahile ka lupna a Mamang le Kanu ana umchu kamu in, _“Mang. Bu naneh tam?”_ katile _“Pung khu ve o”_ atin kavet le sun pung 11 lang ana hikittan, phat sottah chu kho helou a kana umdan ahi. Kakigel chan in Shishi bou ka lunga akilang jingkei in, janlhah a akihou u chu iti kihou lhah u ham kahe nomlheh tan, Mamang kadoh le kipah tah in, _“Min. Nang hapan jal in janlhah chun kanule kapa ho chuleh Shishi nule pa ho ahung kihou toh tauve.”_ ahinti chun ka nuimo sasa in kanui in hinlah hichethu ahinsei chun kalunglai tengcha a kisun bang in ana valjeng e. Polam mitvet in kaloi ngaipen chu ahin, hinlah ka lunggel a chun ka melma tobang ahung hidoh kittai. Ka lungthim a chun Shishi jong anom dan in kagel tan ahile lhaset nan kadim in, kahin jong kakisih lheh jie. Ka dammo kahchun ana thipai jengleng kana ti lheh jeng’in ahi.

Maimit kasing thei poi. Kamit kasin le Shishi ka lungmit in kamu jin, mou von a akivon a phungdang ajotding nikho kamu masa tan, a melhoi na kachan khah louding chu henasa in ka kapi tai. Ajing nikho in ama ana lhung masa in, chahphung lah a ana ding in, gal a kon a eihin mu chun keilang ahin del in, kenjong kadel phei in kakhut kajah in kajiding bangkhun ka anga koiding katile kakom ahung lhun kon’in mia ahiding kahin geldoh in ahile kading den in, kaki nunghei le kipah tah a eihin delnu chu kappum in kanung a konin eihin koi in, _“Heu. Ipidia tunia nei nung ngat jeng hitam? Kei suhkhel ipi um hamo?”_ ahin tin, ka mitlhi kasel in, aguh in kaki theh in, akhut kalahdoh peh in, _“Shi. Hiti dingbep a kilungset ina hilhon ahi maitai. Tunin genthei ken na anga ka bolthei aum tapoi. Chabel dopsa nahitai. A vaigei chu kahitai. Chen, iki tepna cheng angdang a ga molso tan”_ katile akinung hei in, _“Heu. Nang mildia neisoldoh ngam hitam? Nangdia kitepsa ka lungset nahi tuni chan in nang a ding in ka lhandoh jing nalai e. Hinlah nei paidoh ahitah jongle Heu. Nei lhahna bang in keijong mitlhi pum in angdang a gaoah tange. Ka insung mite in eisol a che invang kakigel poi. Nang seijoh kajui a cheding kahi”_ tia kappum in ahinsei chun ka lhaset na akibe cheh² in, amai a lhisoh louding a kaki tim² vangchun ahithei tapon, ka hung kapdoh tai. _“Nao. Nunlui tin akhin kou ngam poi. Hinlah tunia konin vang, khankho luicheng milta hite. Na phungchan na a hung vangpha’n lang phattheina jouse kahin thumpeh e”_ katitai. Ka thusei jong kicheh tah in ka seidoh thei tapon, Aman jong alhi akitheh in, _“Heu. Phungdang chang dia neisol jongle lungset tah in na lungsetna toh nei pehtha in. Tunichan a na lungset na jal a hinga, na thisan jala hinkho kaman ahi. Nang lungset ding in neiphal nalai o. Phungdang a chuldinh hita jongleng na lungsetna hi kipoh den tange”_. Kenjong _” *KAP TAHIH IN*. Na sei house itih a kadana umkha em? Kipoh in. Nangdia kana katdoh sa ahitai. Koima dang changding jong ka gelthei poi. Mang ka lungset nahi nangchung a monmang jeng hen. Ka hinkho a ka lungset masat pen le achaina bang nahitai”_ katile ima seibe talou in alhi akitheh in a chemang tai.  Athoh hah e. Atepi bei hahsat na kachung a ahung lhun phatchun pasal kahivang in kapojou pon, chapang ka in kakap tai.

Kapen a kon’a kham nathei kiti him² tep khalou pa chun hiche nilhah chun ju kahin don pantai. Hinlah, ka insung mite in khamna thei toh eina vetbeh louhel jeh u chun ei tahsan thei pouvin, hijongle nilhah khat Kanu in ka jukham pet ahin muchun kidang asaval in ka room sunga ei kailut in akap in thu eidongtai. _“BOI. Ipi lunglhai louna lom² nanei a tunia hi ju nahin don ham? Nanu kei koma sei in, ka hinkho phalna ding hijongle phal tange”_ ahinti tan hinlah adonbut dan hahsa kasa val in ka kap den tai. Kanu in eikoi in, _“BOI. Na lunglhai louna ipi kabol khah a, ka ngailut na hi vat nasah ham?”_ tin avel in eihin dong kitan ahile kakisih val in Kanu koma ngaidam thum pum’in, _“Henu. Kasei a insung kitilou na ahisang in Keiman kachang ka thichan geijin kalung sunga kipohden tange”_ katile, ipi thu ahi ei dong² jengta’n ahile kenjong achaina in seingamlou sa² in kaseipeh tai. Kanu in kidang asaval in, _“Boi. Iba ilodiu ham? Leiset a genthei ding in moljang jengjong min a ittai. Leng leh lala te kidinte pithei ihi pouve”_ tin eikolchah in akap in ka nucha lhonin kakap lhon tan ahi.

Marriage a ding card ahung kihom tan, kavet le March lha a ding ahitan, ipi bol jongleng Shishi kachan na ding almpi umlou ahiphat chun keiding in lonlhi bouchun ei lhem lungmong tai. A programme ahingon uhin, a *palai/sakhi(witness)* ding in kei eihin gong uvin, a nikho lhunding chu kagel le thiding ma kanom jotai. Da dingla iloi ngaipen khat ahijeh chun ahithei kitpon, jaoding la keiding chun ithina dingmun kive a, ikivuina ding leiset ki chopet kive abang jengtai. Lonlhi lon tailou ka bolthei thil aum tapoi. Ka tahsan a khesuh cheh² tan, hinlah keijeh a programme a building kanom kitpon, mihon thu ahin hetsiu ka gichat jeh chun kipah tah dan in kaga vahdoh jap² ji in, hinlah ka chena jouse chun phat chesa ho eigel dohsah in koima mu lou in ka lhi kaki theh² jengtai.

Ka umchan le ka hinkho manho dan ho jouse chu Shishi in ajahdoh kit phatchun nilhah hin phone eihin bol in, _“Heu. Ipidia tunia hitia hi kisa nahi ham? Nei lhahdoh hitalou ham? Heu. Ka seisa ahi. Ka inko te sei ngaia che kahipoi. Nang sei kangai a chejoh kahibou e. Na lonlhi lonna dingbep ahile ka thulhuh nahi haimil ingting nangkom hinjon kit tange”_ ahinti phatchun ka lung ahung khangdot in, _“Ipidia hitia chu ham nahi ham? Nein ngaidam o Nao. Tukal bol taponge. Hinlah, kinung heilou ding’a che nahitai. Lonlhi pum’in vang hung kile hih in. Na lungset ken vengam ponge”_ katin chomkhat setpi chu thipchet in aumin, a lhisoh ahi kahe tan, _“Koi Tate na?”_ katile anom pon, _“Heu. Nakom a ngaichat khat kanei nalai e. Hichehi nei noppeh tei² o”_ atin _“Henge. Hinsei o.”_ katitan, jan pung 7 nungin kimuto ding in eihin kou khohten tai.Ka cheding ham? Ka chelou dingham? Kache pou² le ka na in eina lamtoding chu kamu masa in, hiche nikho chu keini dinga phat chaina ding tobang ahiding tahjeh chun kamit kasing in giltah a kakigel nungin cheding in kaki gongdoh tai. Keini hinkho thusim kliman ahe ahiloujeh chun ka umkhom lhon jongle loile gol kilhon bang in eigel tauve. Kaha kimuto lhontan, seiding chu ka lungthim a asang aja, sim joulou chu ahin, hinlah seidoh thei ding dinmun a akium tah phat chun lungsung a um thucheng hojong mitlhi in alongdoh jo ji tai. Kaki vengam lhon tapo’n, kaki nung ngat gel lhon in hichun Shishi in, _“Heu. Alam lhung louding eini ki lungset hi agil deh e na? Nang dalha ding a leiset in ahettah vang in keivang tuchan in nanga bang in kaki gel nalai e. Nangtoh kicheng dingbou in kalung a aume. Ipi tilom² a hibang a kahin lhahlel nahi hamo?”_ tia thudoh eihin neichun kakam akikah theilou bang in kaum tai. Ken ama ka ledoh kit in, _“Naoshi. Ken nang ka lungset danhi Chung Pathen le chung a nilelha hon a hethem sohkei e. *Nao. Neihin ngaina hi namil jou nadem?*“_ tin kaseitai. Kamai vengamlou in eihin donbut in, _“Kamil ding ahi vang kati ngampoi. Malam hinkho kon ipi aseithei ding ham? Heu. Hahlheh jongle phat in nang kangai na le ka lungset nahi hin pomang intin, *Kalaigil ga’n `HENU` hinti le namil tange.* Hinlah ven Heu. Vangah vom khu akan kahse in ka Sen ngai namil deh ponge. Kam in seijongle lung in vang miljou deh ponte”_ tin eihin donbut e. Kenjong kalung a ajinei ding in kakoi thei pin, kaki lungset lhonlai bang in kagel jin akah le kamoh koichah kigot ji in, hinlah kaki geldoh jiteng le lonlhi lon tailou kei lunggel seidoh na ding lamdang aum tapoi. Shishi in, _“Heu. Khonung le lonlhin neihin lha hihbeh o. Tunia hi na vangboh na thum a hung kahie. Phatthei neiboh o. Hichun lungmong tange”_ tin kakeng atuh in akap tai. Kavejou tapon, kakai ding in, _“Nao. Nachung a lhaset na neiponge. Kipah tah in na Sen-angkoi toh Christian insung nomtah le  inchen hinsem in. Vangphatna jouse kahin thumpeh e”_ tin lonlhi pum’in kasei tan, ki lhalel tah in hinkhoa achaina dingin aman jong eikoi chahkheh in, kappum in _“Heu. Kan ngaival e”_ atin ima seilou in kenjong kakoi in kahung kikhen lhon tai. In kaga lhun in angol kabang jengta’n, ka insung uva nomtah a kana nuikhom nalhon phat chesa ho aban chan ahung kilang in kavet na jouse chun geldoh khat cheh einei sah in,  kana jeng’in adimtai. Khovah kei in kalhi kaki theh in, lungmong na ding ijat kaholvang in kei ki lhamon na ding leiset a aum tapoi. Mitlhi hi kangthei hile kei mitlhi vang kang tahbeh tante.

Jing nikho, marriage bolni ding ahung lhingdoh tan, hiche nilhah ka lunggel chu athi sa tobang in kaki gellha jeng tan ahi. Phat sotpi a kon a ka imut louna jan atamval jeng tan, imut ding kativang inla ka hithei kit ji tapoi. Jan Khang laitah in lhavah nuia chun ka touin, phat dang in chollha vah emsel nuia lungset thimthu kana sut lhonin, hinlah hiche jan chun kachang in ajithi bang in kaumtai. Ka phone ka lahdoh in,  lungmong jep nading ham? Katin eimi jokes ho chu YouTube ka ve lele in ahile hoilang a kon a lakhat hung ging kit hitam? *O CHUNG CHOLLHA* kiti la khu kahin kilha khah chu gangchel in ka mitlhia hung longdoh kittai. Miching hon, _*La ei lhiso sah aki ngainom penin, Mihem ei genthei sah ho aki lungset dehset e*_ tia ana sei u chu hiche jan chun kahin hethem mong² tan, ka ngai chim thei tapon, kangai tohkop in ka mitlhi kaki theh² tan ahi. Jingkho hungvah ding kagel le ka moh tijat tho jeng in, milah a kaum dingdan kamah mo hel jeng kittai. _*Jingkho jong vahda taleh o*_ katin, phatle nikho hi eima dei dan² a ki tol thei hile hiche jan chu kho ana vahsah ponge. Hinlah keiding a Pathen in agonlou in kaki lah jeng’in, ka tao tan,lhiong pum² in, _“Paa. Kachung a thil hung lhung hohi kei dinga nagon ahitah jongle athohdan nei hil in, chuleh jing nikhoa phungdang chang dia cheding Shishi jong nangma’n a malam hinkhoa mapui jing in. Bangma lunglhai na Christian insung ahin semdoh a, phattheina na polut numei ching chuleh minu pha ahung hina dingle, atehpi lungset achan a a majon te kipana ahithei nading in amasang a hunglhung ding vangset na ho jouse lahmang peh in. A genthei thohding jouse *keichung a lhunsah jotan. A genthei thohding vengam ponge*“_ katin Shishi ding in ka tao khovah kei tai.

Jingkal bual(ahcha) jong ahung khong tan, ka hinkho a ka lungset pen ka lhahdoh ding nikho ahijeh chun keijong lungpi kengpum in mouin lam kajon tan, palai von in eihin von tauve. Hichun hall sunga amailang a ei toudoh sah tauvin, Shishi ka lungset na hethem sa kaloi le pai phabep chu a maimon lha jengta’n, hinlah ki pasal sah tah in ka tou tan ahi. Mihem chujat maia katoujeh chun mailhai mel kapu ham² in, mou teni touna a toudia ahin puilut u chun Shishi kave ngam tapoi. Milah a ka umchan dingchu kagel le min ei gelse khante katinka dadoh le amelhoi kidang tah in, vangil bang in vonkang a akivon kamu chun kamang abang jeng in, hinlah keia ding ahilou kahetdoh kit chun ka lunglai in a pojou kitpoi. Shishi in jong ei vengam deh pon, nilhumkei in kaki gel² na in ka lhaset na lungthim in apohjou lou lunga mitlhi pumin ka nilhum dentai. Programme kichai² in miho chu lim akila sao² uvin keile mounu jong kaki la lhonin, mounu in kakhut akituh a lim kaki lahpi chu keiding in ka lungset pen in ngailu tah a eitu na achaina ana hitai.

Mihem chujat aumvang chun keiding in gamthip lah a kium abang jeng in, gamsa nou vahmang bang in lung lengtah in ka um tan, lunga langlou dingcheng ahung kilang in, ka kalhah diphat in inlang kadel jeltai. In kaga lhun chun Kanu inmai a ana touvin, kenjong ima seilou in ka room a kalut in kap kiti chan kaga kap tai. Iti ka a kaka vang’in kakap chimthei mong² tapoi. Kanu in eihin mudoh chun ama jong akap in, eihung lhem in, _“Boi, *KAP TAHIH IN*. Pasal nahilou ham? Nanu ding jong gel tango Boi. Na mitlhi lon kamu le nang sang in kei in ka pona joe. Bi tan. Pathen in nanga ding Shishi sanga phajo nagon peh nante”_ tin ei lhem² in hinlah keivang ei lhembi ding leiset a mihem aum tapoi. Kanu jah a, _“Henu. Nei ngaidam o. Keivang jineilou ding kahitai. Ka hinkho sunga ka lungset masat pen Shishi ahi in, a lungset achaina jong ama hita hen”_ katin, kanucha lhon in kaki kato lhontai.

Phat ho ahung che² in, Mamang le Shishi in jong laigil ga chapa khatle numei khat anei koplhon in, phat le kum hitih Chan ana cheta sa ahivang chun ka lungset na akem deh naipon, amani cha chu keicha dan in kagel in kipanan kadim lha jengta’n ahi. Hiche phatlai tah chun keijong mihet in officer khat chu kahung hitan, government natong khat kahitah jeh chun ka insung genthei na ho jouse kiledoh dan in aum in, Kanu jong nomtah in ka koithei tai. Mamang le Shishi in naodop an ahin nei u chun keijong Mamang in loikhat hina in eihin temin keijong naosen munom jeh chun kache tai. Naosen mel kamu chun kipanan eilo dim in, Mamang in, _“Min, nang min iputsah Diu baha?”_ tin eihin tot in, thu chom² kasei uvin totna ho kasem uvin kipana ankong kahin um tauvin ahi. Shishi mel kamu chun mailhai sel in aumin, kenjong kalung a _“Akipah jing hinante”_ kati in ama kipa chu kei kipana ahijeng in, lungmong sel in kaum tan ahi.

Nilhah hin ka lupna chunga kakigel in,  kei le kei ka lunggel in kaki hou in, Shishi toh kihou bang khun _“Shi. Nangvang genthei na namil tan. Na laigil ga mel jong namutai. Pathen in ka taona asan jeh in Pathen ka thangvah e. Chun le Jo dei anglai a pah nahitai. Vangphat nan nahin jui jinge. Hinlah kei lungsung a nang tailou numei dang aum poi. Lengdang anglai pom *vonchoi nile thum pom tajongle chun. Ka sen ngai kahin miljou nadem?*“_ tin olchan kamit a kon mitlhi ahung londoh chu ka Chunnu in guhthim in eina mu in kakom a _“Minneo. Ipidia Shishi bou chu numei a nasim jeng ham? Nangjong phale sele officer khat nahi ta in, nanu keijong ka tehtan, numei nahin deijong atam e. Lungneo hih in, pasal nahi. Chapa changkhat a kahin nahi in, Boi, phat chesa ho gel nan *KAP TAHIH IN*“_ eitin, hinlah ken kalungsung a jinei ding kapum datthei tapo’n, tuchan hin jinei lou in kaum in, ka lengol cheng hon vang ji akop a neijong aum tan, cha li/nga neijong adim lha jeng tan, hinlah keivang jouthing bang a mangden dia ki gellha kahitai.

       *==•×• THE END •×•==*

_*Pontho tah a eina simpeh jouse chung a kakipana kahin phonge. Ngai nasah a seinom le comment nabol nomle anui a number kipe hi phatseh a contact jing thei ahi.*_

“`KAKI PAH E.
Keima-“`
_*~ TangpaMinneo ~*_
_(+91 8131046031)_

_*Copyright© TangpaMinneo 2019. All Rights Reserved*_

Thanks for joining me!

Good company in a journey makes the way seem shorter. — Izaak Walton